Ruma 2 - Fanawbuid tagsibaliwas Fakayabian

Matuyan Dius nu Gfaurianan

¹ Ay anggan o, wo yangay e fanlonganan ya, o fag taw taglong te, am iba gfakamulun at mauri. Aroro anggan o nu gfakamulun wayo takatanya, gfaurianan way o am sadili. Aroro nu nalong o te, am iba gfakamulun at mauri, gfakamulun yangay o takatanya.

² Nasaful tam te, Dius matuyan nu gfaurianan fagayu taw tagfakamulun takatanya.

³ O taglong gugat te, am iba e asalanan, nu gfakamulun yangay o takatanya, o gamatangan o te, malangfe ban o Dius at faurianan?

⁴ O gfae yud o e tungkul sa emu Dius at fagmalukmeun ay at fakesugun ay at fagmagwantaun? O nunda yo nasaful te, Dius at fagmalukmeun tagtaban emu laman gubun o am fagmauriun?

⁵ Ay aroro kamaogatun o siginan nu yud o gubun am fagmauriun, nafaksvn o faurianan sa emu, gina ban Dius nafadasug at dotama ay nanginsaful ngay taw at asalanan, sit nafalganan fag menit.

⁶ Ay Dius ban gfasud sas fagayu taw kata at mesa nafakamulun.

⁷ Ay Dius ban gfon leleg at yud e fakatabuan, sa sangay taw tagfakamulun tua gugat at masine, laman grvbvy fagmasineun, ay famauseganan, ay fagyudun kabul.

⁸ Dewa katanya, Dius ban gfadasug at dotama sa sangay taw takamasadiliun ay at yud gfaning at matuyan, nu bunway gfakamulun way at mauri.

⁹ Ay kanya ban fag ngay taw mauri umdasug sas fagidapun ay sas fakabulun, ngay taw Udyu taguna ay anggan yud Udyu fag ngay taw.

¹⁰ Dewa katanya, Dius ban gfon fagmasineun, ay famauseganan, ay fagmanabayanun, sas fagayu taw tagfakamulun tua at masine, taw Udyu taguna ay anggan yud Udyu fag ngay taw.

¹¹ Aroro Dius di e fagfili taw.

¹² Fagayu taw tagasalanan at yud nasaful Muisis at Faugali, umfaurianan, bunwa te, aroro wa nafaning kafag Faugali. Ay fagayu taw at nasaful kafag Faugali, ay gfataglayun way gasalanan, kanya umfaurianan aroro wa gfaning.

¹³ Aroro Dius at fagfangayanun te, sik taw at yud e asalanan, bundi tagdungugan lang at Faugali, nu bunway tagfaning tua.

¹⁴ At yud Udyu fag ngay taw dewa yud nasaful Muisis at Faugali, ay gfaning tua kafag Faugali, kanya fagayu gfalag te, saful tua gfakamulun at matuyan.

¹⁵ Aroro siginan takatatuy, yud Udyu fag ngay taw nafalag te, siwa at ngay amatanganan nu marirukan Muisis at Faugali fag ngay suguan. Tagfatuyan sa kafag ngay taw, at ngay amatanganan wan; tibaginan at amatanganan gfatuyan te, mauri at ngay fakamulun, ay tibaginan gfatuyan te, masine tua.

¹⁶ Gfaning ku foyungan sa ayu sabaliwa at Masine fag Barita te, matuyan ginanya ban fag menit Dius gfadasug at faurianan siginan tam Fun Isus, laman gfaurianan fagayu taw kata at mesa nasuksuk fag ngay fakamulun.

Taw Udyu ay Muisis at Faugali

¹⁷ Glong am te, ngay taw Udyu am, ay gfaning am Muisis at Faugali, ay kamatungudun am glong te, masadi am sas Dius.

¹⁸ Nasaful am nu setain Dius at fakaylatun, ay saful am gfakamulun at masine fag fakamulun, aroro e nafoyung wan sa ayu Muisis at Faugali.

¹⁹ Ay natuyan am te, sik ngay tagtaban am at yud glag, ay tagyamag sa sangay taw tagsisad dulum.

²⁰ Ay sik ngay tagatul am sat yud mamatanganan fag ngay taw, ay sat yud yay kasakan at fagsafulun sabaliwas Dius. Aroro siginans Muisis at Faugali natuyan am sa ay sadili te, e fagsafulun tuam ay e fagmatuyanun.

²¹ Gfoyung am gugat sa tibak taw, dewa katanya wain way am makatu gfoyung ay ngay sadili? Gfoyung am gugat sa sangay taw te, “Lag am gfangkamul,” dewa katanya, gfangkamul am.

²² Ay gfoyung am te, “Lag gfanugtug,” ay dewa katanya, am, gfanugtug way am. Ay kauri am yud Udyu fag ngay taw at ngay fagsegan, dewa katanya, gfangkamul am ngay fagagbilugun si kafag ngay fagsegan at bale.

²³ Ay kamatungudun am te, “Si emi Muisis at Faugali,” dewa katanya, nafae fakaplaun am Dius, siginan nu yud am gfaning Muisis at Faugali.

²⁴ Aroro marirukan te, “Nafoyung am yud Udyu fag ngay taw laman kanya fagayu gfauri Dius.”

²⁵ E tungkul tua ay fakatoglagan nu gfaning tuam Muisis at Faugali, dewa katanya, nu dway am gfaning, kata way nu yud am nafae fakatoglagan.

²⁶ Sik taw deyud e fakatoglagan nu gfakamulun tua kata Muisis at Faugali, Dius gtuyan tua anya te, e fakatoglagan.

²⁷ Nu katanya, at yud e fakatoglagan fag taw tagfaning tua Muisis at Faugali, kanya ban namatuyan te, ngay tagasalanan am. Aroro am wan at fagfatigwanan Muisis at Faugali, ay at ke fakatoglagan, dewa katanya kamabo way am.

²⁸ Aroro at matuyan fag taw Udyu bunwa aroro at fagtainan sik taw Udyu, ay bunwa siginan nu nke fakatoglagan.

²⁹ At matuyan fag taw Udyu, bunwa at nafae fakatoglagan aroro gfaning Muisis at Faugali, nu bunway at natubus tua at amatanganan siginan nu gfaning at Masine fag Falad. Dius guseganan tua takatanya fag taw, ngay taw deyud kaylat anya.