Ruma 16 - Fanawbuid tagsibaliwas Fakayabian

Fakatabuan at Longan

¹ Katsi kaylat au gfatoglag sa ayu tam faduksay Febi, kanya tagfangguna ngay tagafanud at maful sis furuan Senkrea.

² Aylati fia anya aroro sa tam Fun, kata ay fakamulun sa tibak faduksay, ay gubuki anya nusnga setaw at fagayudanun, aroro kanya nagubuk ngayuk taw, ay au wan at sadi at nagubuk.

³ Longi sas Prisila ay Akila fag dadwa te, O manabayan tuam? Kanya ku faudgufudan gfakamulun sa em fagmasadiun sa tam Fun Isus.

⁴ Kanya fag dadwa at leleg si was fakalimuun aroro sa angku. Ay bundi au lang taguseganan, nu bunway anggan tua at yud Udyu fag ngay tagafanud.

⁵ Longi yangay sa sangay tagafanud at maful sis dadwa at bale te, O manabayan tuam? Ay longi yangay sa ku fakesugun ku faduksay Epenetu te, O manabayan tuo? Kanya taguna gafanud sa tam Fun Isus sis talun Asya.

⁶ Ay longi yangay sas Maria te, O manabayan tuo? Kanya gugatan gfakamulun laman sa ayu.

⁷ Longi yangay sa ku ngay kaiban fag duama Andruniku ay Unya te, O manabayan tuam? Kafag duama ku ufud sis fagubungan. Ay kanya at kintoglag te, at maseganama fag ngay nasugu, ay naguna tua angku nu gafanud sa tam Fun Isus.

⁸ Longi yangay sas Ampliatu te, O manabayan tuo? Kanya ku fakesugun ku fagadgalangan sa tam fagmasadiun sa tam Fun.

⁹ Ay longi yangay sas Urbanu te, O manabayan tuo? Kanya tam faudgufudan sa tam Fun Isus at fakamulun, ay anggan sa ku fakesugun ku fagadgalangan Estakis.

¹⁰ Ay longi yangay sas Apeles te, O manabayan tuo? Kanya tam fagtoglagun at matuyan fag tagafanud sa tam Fun Isus. Ay longi yangay sas Aristobulu fag bale te, O manabayan tuam?

¹¹ Longi yangay sa ku kaiban Erudiun, ay anggan sa tam ngay faduksay sa tam Fun sis Narsisu fag bale te, O manabayan tuam?

¹² Longi yangay sas duena Trifena ay Trifusa te, O manabayan tuam? Kafag duena maseganina nu gfakamulun sa tam Fun. Ay longi yangay sa Persis te, O manabayan tuo? Kanya tam usena ngayu yangay at nafakamulun laman sa tam Fun.

¹³ Longi yangay sas Rufu ay sat mina te, O manabayan tuam? Rufu tam Fun at fagsuguan at matuyan, ay at mina tuga wa ku mina.

¹⁴ Longi yangay sa tam mangama lima Asinkritu, ay Fleguntes, ay Ermes, ay Patrubas, ay Ermas, ay anggan yangay sat ngay fadgaloan tam ngay faduksay te, O manabayan tuam?

¹⁵ Longi yangay sas Filulugu, ay Ulya, ay Nereu, ay sat faduksay fag mangena, ay anggan yangay sas Ulimpas ay fagayu at ufud fag ngay faduksay te, O manabayan tuam?

¹⁶ Mafafanyuani tua nu gkamatoan am sas galay am at sadi. Fagayu at maful tagafanud sa tam Fun Isus, glong te, O manabayan tuam?

Ngay Famamut fag Longan

¹⁷ Ku ngay faduksay, maksvn nu glong au sa ayu te, amatangani fia ay dirii nusnga sinu tagfasaruayan ayu sa ay fagmasadiun, ay tagfamomuy tibak taw at fagafanudun, ay tagfoyung tibak foyungan tagfabadbaboan ay nadungug wan fag foyungan. Ayayui siginan takatanya fag ngay taw.

¹⁸ Takatanya fag ngay taw at fagfaningan bunwa tam Fun Isus nu bunway at sadili way. Kafag ngay taw gdaya ngay taw at mamomuy at amatanganan, siginan takamaylatan ay at masine nu kadungug fag ngay foyungan.

¹⁹ Maksvn nu kadungug am sabaliwa nu gfaning am tam Fun Isus, nu katanya, maksvn nu guseganan au ayu. Dewa katanya, ku fakaylatun nu nasaful tuam fia sabaliwa at masine fagayu nusnge wain, ay nu ddi am nasaful sabaliwa at mauri.

²⁰ Dius takamon fagmanabayanun munakbang wan nu gfasa ay daga darafa ay fawayan Satanas. Sumawa nangus fia ayu tam Fun Isus at fagmagalangun.

²¹ Ku faudgufudan Timuteu glong ayu te, O manabayan tuam? Ay anggan ku kaiban fag mangama tulu Lusyu, ay Asun, ay Susipater glong yangay ayu te, O manabayan tuam?

²² Au Tersyu at nariruk tuy fag rirukan, sik tagafanud yangay sa tam Fun, glong au sa ayu te, O manabayan tuam?

²³ Gayu glong yangay ayu te, O manabayan tuam? Katsi gbanwan au sit bale, ay ste yangay fag bale ngay tagafanud at fagnangafulan. Erastu, tagalaga salapi sis furuan daul, ay anggan tam faduksay Kuwartu glong yangay ayu te, O manabayan tuam?

²⁴ Tam Fun Isus at fagmagalangun sumawa nangus fia ayu fagayu. Anud.

At Fagusegananun Taguyan

²⁵ Ay katsi segi tam Dius, tagfaksvn ay fagafanudun, gfaning ku foyungan ayu fag Masine fag Barita sabaliwas Isus tam Fun. Kanya fag Barita ngaduge wan nu masuksukan,

²⁶ dewa katanya, katsi ansure wan ay ansaful siginan Dius at ngay taglong at Rirukan, ay gfaning at yud e fakatabuan fag Dius at suguan, laman fagayu taw gafanud tua ay galo anya.

²⁷ Sadi way tam Dius tagsaful sas fagayu. Segi fia anya kabavn, siginan tam Fun Isus. Anud.