Ruma 14 - Fanawbuid tagsibaliwas Fakayabian

Lag Gfauri ay Faduksay

¹ Aylati tua sik taw at mamomuy at fagafanudun, ay lag am gfabadbaboan anya.

² Sik taw at maksvn at fagafanudun gamatangan te, “Kon kway nusnga setaw fag fakonun.” Ay dewa katanya at mamomuy at fagafanudun gamatangan te, “Kwa kon faknul.”

³ Takon nusnge wain fag fakonun, lag gfalingun at yud kon tibak fakonun, ay at yud kon tibak fakonun lag glong sabaliwa takon nusnge wain fag fakonun te, mauri at fakamulun. Aroro Dius kaylat tua anya fagdua.

⁴ Sinu o at malong sabaliwa am iba at fagsuguan te, mauri at fakamulun? At tagfayafun way lang at mafoyung te, o masine ay mannga mauri at fakamulun. Ay kanya mafakamulun tua at masine aroro tam Fun ggubuk anya.

⁵ Sik taw gamatangan te, sik menit gtungud yay tibak menit nu masine, ay tibak taw gamatangan te, gsud way fagayu menit. Fagayu taw, atuyani fia sabaliwa takatanya.

⁶ Nusnga sinu tagamatangan te, sik menit gtungud tua tibak menit, kanya gamatangan takatanya laman sa tam Fun Dius. Ay nusnga sinu takon nusnge wain fag fakonun, kanya kon laman sa tam Fun aroro gfauseganan anya. Ay nusnga sinu at yud yangay kon gfakamulun takatanya laman sa tam Fun, ay gfauseganan yangay Dius.

⁷ Watam masine gleleg ay kabul laman sa tam sadili.

⁸ Kaduge tam gleleg, gleleg tam laman gfauseganan tam tam Fun, ay nu kabul watam, kabul tam laman gfauseganan tam tam Fun. Nu katanya, dewa tam gleleg ay dewa tam anbul, tam Fun tua tam at ngay taw.

⁹ Aroro tam Fun Isus at faginbulun ay at fagnadogun naleleg laman kanya wan at ngay tagleleg ay at ngay mabulan at Fun.

¹⁰ Wain am faglongun sabaliwa am faduksay te, mauri at fakamulun? Ay wain am fagfalingunun am faduksay? Fagayu ban tam nansalubang tam sas Dius at daga salubangan.

¹¹ Aroro at Rirukan nafoyung wa te, “Tam Fun nalong te, ‘Au, tagleleg fag Fun, gfatuyan au te, fagayu ban taw nangalub sa ku daga salubangan, ay galay ban at sadi gseg angku.’ ”

¹² Nu katanya, mesa ban tam namoyung sas Dius nusnge wain tam mesa nafakamulun.

Lag Gfae Asalanan am Faduksay

¹³ Nu katanya, lag tam mesa e amatanganan at mauri sabaliwas fakonun, nu bunway amatangani tua te, lag gfakamulun nusnge wain tagfataid ay tagfae asalanan tam faduksay.

¹⁴ Aroro sa ku fagmasadiun sa tam Fun Isus, nasaful au ay natuyan kwa te, we fakonun at masuya. Dewa katanya, nusnga sinu fag taw nu gamatangan way te, sik fakonun masuya way sa anya, anud, kanya gfasuya anya.

¹⁵ Aroro siginan am naon fag fakonun, nu nafauri wayo am faduksay at amatanganan, am fakamulun takatanya bunwa fakesugun ya. Tam Fun Isus anbul laman sa anya, nu katanya, lag o gfauri am faduksay siginan sik fakonun.

¹⁶ Lag o gfakamulun nusnge wain tibak taw at natuyan te, mauri, dewa masine sa emu.

¹⁷ Dius nu gfagtainan taw wa siginans fakonun ay fanginum, nu bunway siginan tua nu gbanwan matuyan ay manabayan, ay at ke fagusegananun siginan at Masine fag Falad.

¹⁸ Tagfaning takatanya aroro sa tam Fun Isus, gfauseganan tua Dius, ay fagayu taw kaylat tua anya.

¹⁹ Nu katanya, tam fagugatanun tagfae fagmanabayanun tua sas galay antam at sadi, ay tagfaksvn tam fagafanudun.

²⁰ Lag o gfauri Dius at nafalangfe fag taw at fagafanudun aroro siginans fakonun. Fagayu fakonun we mauri. At mauri tibak taw nu nke asalanan way aroro naon o sik fakonun.

²¹ Nu katanya, at masine lag kon ya faknul ay lag ginum ya fanlangu, ay lag o gfakamulun ya nusnga setaw nu gfae asalanan way am faduksay.

²² O way lang ay Dius tagsaful sabaliwa takatanya am fagafanudun. Mauseganan sik taw nu ddi gamatangan te, mauri sabaliwa at natuyan te, masine.

²³ Dewa katanya, nusnga sinu fag taw nu gawabilugan way at amatanganan nu kon sik fakonun, Dius gfaurianan anya aroro at fakamulun wa gfaning at fagafanudun. Asalanan way nusnga setaw tam fakamulun nu dway gfaning tam fagafanudun.