Ruma 11 - Fanawbuid tagsibaliwas Fakayabian

Dius Kesug Tua ngay Taw Israel

¹ Katsi ginto au te, O Dius naiyan wan at nafili fag ngay taw Israel? Duan. Anggan au taw Israel kyangay, siginan Abrayam at kasugfunanan ay katap kyangay sas Benamin at kasugfunanan.

² Dius wa naiyan at furuan at nafili siginans fakasigadan. O nunda yam nasaful at marirukan sis Dius at Longan sabaliwas Elyas? Kanya gdarangin sas Dius aroro sa sangay taw Israel at fakamulun mauri.

³ Kanya nadarangin te, “Ku Fun, kanya fag ngay taw nafabul wan am ngay taglong ay narufa at fagnamonan sa emu ngay fanggalangun. Au way lang at sawad, ay sarokta kanya fag ngay taw gyafabulun yangay angku.”

⁴ Dewa katanya, setain Dius at famalus? “Nafasawad kyay fituk libuk mangama at yud gseg Baal.”

⁵ Ay dasug katsi Dius at fagmagalangun katanya tua gugat e nafili yay gugat at matuyan sa anya.

⁶ Dius nu gfili ngay taw siginan tua at fagmagalangun, ay bundi siginan kafag ngay taw at fakamulun. Aroro Dius nu gfili taw nu siginan way taw at fakamulun, wa ro e masuad Dius at fagmagalangun.

⁷ Katsi malong tam te, ngay taw Israel wa nafabul at fagyabulun. At nafabul, Dius way lang at nafili fag ngay taw. Ay tiba kamaogatun way at ngay amatanganan.

⁸ At Rirukan nafoyung te, “Dius nafon sanya fag ngay taw sik maksvn fag fantiugun, laman at mata wa glag, ay at talinga wa gdungug dasug katsi.”

⁹ Ay Dabid nalong yangay te, “Kafag ngay taw at falganan fag ngay fakonun umkata wa nangus fia sik litag ay sik sangdaw sa anya fagayu, ay kanya tagfatong ay tagfadasug anya fagayu sas faurianan.

¹⁰ Kafag ngay taw ban nangus at ngay mata fagumlikbug wan laman ban wa glag ya, ay kanya nangus fagayu umbarukung wan sat maksvn fag fagidapun kabavn.”

¹¹ O at masuad, ngay taw Israel nu ntaid way, kanya fagayu anfaurianan wan? Ida, duan. Ay siginan at fakamaboun, andasug fakalangfean sas yud Israel fag ngay taw, ay siginan takatanya, ngay taw Israel galabian.

¹² Taw Israel at nafamaboan maksvn at fanggubukun sas fagdaul daga at taw. Ay kafag ngay taw at nafangulanan nafadasug ngayuk fanggubukun sat yud Israel fag ngay taw. Kaugat waban nu kae fanggubukun, fagayu ban taw Israel nu nfoli tua sas Dius.

Yud Udyu fag ngay Taw at Fakalangfean

¹³ Nu sa ayu yud Udyu fag ngay taw, katatuy ku longan. Dakngani sik nasugu au sas yud Udyu fag ngay taw, guseganan au ku fakamulun.

¹⁴ Bangaran ban manga siginan ku fakamulun, tiba ku kaiban fag ngay taw Udyu nalabian, ay laman ban tiba umlangfe yay.

¹⁵ Dius at fagnaiyanun taw Udyu, kanya namasadi fagdaul daga at ngay taw sa anya. Nu katanya, kaugat yay ban Dius nu kaylat kafag ngay taw, kata nu nafaleleg at mabulan.

¹⁶ Taguna fag afud tinapay nu nafon way sas Dius, fagdaul tinapay nafon yangay. Ay nu nafon way sas Dius sik fun kayu at lalid, anggan fagayu at sanga nafon yangay.

¹⁷ Am at yud Udyu fag ngay taw kata wayam sik malyaman fag fun kayu at ngay sanga at kinsugfun sat matuyan fia fag fun kayu. Ay nafaungbus ayu sat kin-gatvng fag sanga at fakagatvngan. Nu katanya, ankaksvn am siginan kafag fun kayu at lalid.

¹⁸ Dewa katanya, lag am kamatungudun te, gtungud tuam at kin-gatvng fag ngay sanga. Amatangani te, bunwa am tagfaleleg at lalid, nu bunway at lalid tua tagfaleleg ayu.

¹⁹ Malong wam te, “Tibak sanga an-gatvng laman nangasugfun ami.”

²⁰ Anud kanya. Kanya fagayu an-gatvng aroro we fagafanudun, ay am, ansugfun am aroro gafanud tuam. Dewa katanya, lag am kamatungudun, nu bunway alimui tua.

²¹ Dius ro nu nagatvng way at matuyan fag ngay sanga, kaugat wa ro ayu.

²² Fakatanyaun, nalag watam Dius at fakesugun, ay nu kadotama. Kanya maksvn nu gfaurianan sik tagasalanan, dewa katanya, kesug tua ayu, nu gbanwan tuam fia sat fakesugun. Ay nu dway ban katanya ay fakamulun, kanya ban ggatvng yangay ayu.

²³ Ay nu saman baliwa ngay taw Udyu, nu ddi ban gfataglayun nu yud gafanud kanya ban fagayu gdog yay kasugfun sat fun, aroro Dius makatu gfasugfun.

²⁴ Ay am at dan malyaman fag ngay sanga, nu nsugfun tuam sat matuyan fia fag fun, ay ugali dewa yud kata at ugali, kaugat wan Dius nu gfasugfun at matuyan fia fag ngay sanga at kin-gatvng sanya fag fun kayu.

Dius Kesug Fagayu Taw

²⁵ Ku ngay faduksay, kaylat au nu sumaful am tuy fag masuksukan at masuad, laman diam kamatungudun. Wa ban glugo ngay taw Israel nu kamaogatun at ngay amatanganan. Kanya ban fagayu di kamaogatun ya, gina ban ansak at kayuan at yud Udyu fag ngay taw tagafanud sas Dius.

²⁶ Nu katanya, umlangfe tua ban fagayu taw Israel, kata at Rirukan te, “Kadasug ban at Tagfalangfe siginans furuan Erusalem, kanya ban tagfalyam taw Israel at fagmauriun.

²⁷ Katanya ku fatuyanan sanya fag ngay taw, gina kban nafalyam at ngay asalanan.”

²⁸ Ngay taw Israel wa kaylat at Masine fag Barita, ay katanya Dius nafangayan anya fagayu te, at ngay fawayan. Ay am yud Udyu fag ngay taw anke buknga am gbul fakalangfean. Dewa katanya, nu saman baliwa Dius nu gfili, Dius kesug tua gugat ngay taw Israel aroro sat ngay mangaguyang.

²⁹ Dius di gbadbalian at amatanganan sabaliwa nu gfon ay nu gfili.

³⁰ Am fag ngay yud Udyu, ebi kamabo am Dius, ay dewa katanya katsi, kanya kafanyu tua ayu aroro siginan taw Israel at nafamaboan.

³¹ Ngay taw Israel dewa kamabo Dius, Dius kafanyu yangay ban anya fagayu kata nu kafanyu ayu.

³² Aroro Dius kata nu naubung fagayu taw sas fakamaboun, laman namalag at fakafanyun sa anya fagayu.

Alubad Famauseganan Dius

³³ Maksvn tua Dius at fagmagalangun ay at fagmamatanganun ay at fagsafulun. We taw nasaful Dius nu gfili, ay we taw matogdungug at ngay balyawvtan.

³⁴ “Sinu tagsaful tam Dius at amatanganan? Ay sinu at mafalu anya?”

³⁵ “Ay sinu at mafon sas Dius nusnge wain laman Dius e bedan sa anya”

³⁶ Aroro fagayu nusnge wain ankawat wan siginan anya, ay sia wan tagagbilug fagayu nusnge wain. Si wa anya famauseganan kabavn! Anud.