Nu Galin 2 - Fanawbuid tagsibaliwas Fakayabian

Muisis nu Kasalug

¹ Ay ginanya, e sik taw siginans Lebi at kasugfunanan at nafamubay yangay sat gaban.

² Ay wa ngaduge, kanya fag mangena nafafion ay nafasalug sik munama. Kafag mangena nu nalag te, at ngenge mataglu, kanya nafasuksuan kaduge tuluk magdanun.

³ Dewa katanya, kanya nu dway mafasuksuan ya at ngenge, nabul sik buyug at mawatan siginans sigbo, ay nararus sik fanrarus at madafut. Ay sanya ginan, kanya nasuad at ngenge sasad buyug ay nanamasas wa faltu sis tigyangan Liskung Nilu.

⁴ Ay kafag ngenge at kaka munina wa ngayayu nu malindug laman gulit takadasug sat arian.

⁵ Ay ginanya, Igiptu at fun at baguina natagbung sasad Liskung Nilu laman nangigus. Ay kaduge kanya gigus, at fagsuguan fag ngay mangena kamanlaoan way sis tigyangan liskung. Ay Igiptu at fun at baguina nalag kafag buyug sisad liskung sis wa faltu ay nasugu sat fagsuguan at sadi te, “Namul o.”

⁶ Ay kanya nalunggab kafag buyug ay nalag kafag ngenge nu gwayway ay kanya kafanyu, ay nalong te, “Tuy fag ngenge sik taw Ebreu.”

⁷ Ay sanya ginan, kanya fag ngenge at kaka ankakbang sas Igiptu at fun at baguina ay ginto te, “O kaylat o nu nanrvbvy au sik mangena siginans taw Ebreu tagfasusu ay tagfagurang anya laman ban am ngenge?”

⁸ Ay fun at baguina gbalus anya te, “Agvd.” Nu katanya, kafag munina nalao wan ay nanantaban at mina sas fun at baguina.

⁹ Ay Igiptu at fun at baguina nalong sa kafag mangena te, “Bubai wan tuy fag ngenge ay fasusui laman sa angku. Ay alagai anya ay namayad kban sa emu.” Nu katanya, kafag mangena nabul at ngenge laman galaga.

¹⁰ Ay kafag ngenge gina yud gsusu ya, at mina fia nabuba anya sas Igiptu at fun at baguina. Ay kafag baguina natuyan fia te, kanya at sadili wa fia sisian. Ay nafangayan kafag sisian te, Muisis, aroro nalong te, “Nabul au anya siginan sad lino.”

Muisis Nalagyu sas Talun Midyan

¹¹ Ay Muisis nu mabaguama wan, sik menit, kanya nalao sat ngay kaiban ay nalag te, maksvn nu gidapan. Ay kanya nalag sik taw Igiptu nu gfalang at sadi at kaiban fag taw Ebreu.

¹² Muisis kamanawan sat ligung, ay nu nalag te, di e glag anya, kanya nafabul kafag taw Igiptu, ay nalubgub at bilug sasad lagnas.

¹³ Ay balabag di, kanya anfoli ay nalag duak taw Ebreu nu gawayan. Kanya nainto sat ke asalanan te, “Wain ro am fagfalangun am kaiban Ebreu?”

¹⁴ Ay kanya gbalus Muisis te, “Sinu at nafili emu laman o em fun ay em tagwabilug? O namabul yangay o angku kata am nafakamulun egmenit sa sik taw Igiptu?” Nu katanya, Muisis kalimu ay gamatangan te, “E nalag way mangaro ku nafakamulun.”

¹⁵ Ay Igiptu at fun nu nasaful Muisis at nafakamulun, gyafabulun anya. Nu katanya, Muisis nalagyu wan sas talun Midyan laman namanwan sanya. Ay Muisis nu ndasug sanya, namalunggung si sik day bubun.

¹⁶ Ay ginanya, fituk baguina andasug laman nanagub ay namainum at mama at ngay fagbaugun. Kafag ngay baguina at mama sik tagfon fanggalangun sanya fag talun.

¹⁷ Ay e ngay tagulit yangay fagbaugun at kindasug sanya, ay kanya fagayu naiyan kafag ngay baguina ay at ngay fagbaugun. Dewa katanya, Muisis nagubuk kafag ngay baguina ay nafainum at ngay fagbaugun.

¹⁸ Ay kafag ngay baguina nu noli wan sat mama Etru, at mama nalong sa anya fagayu te, “At kasakit nu guli am.”

¹⁹ Ay kafag ngay baguina gbalus te, “E sik ngay tagulit fagbaugun nafalingun emi, dewa katanya, e sik taw Igiptu nagubuk emi, ay kanya nafanagub ay nafainum em ngay fagbaugun.”

²⁰ Ay at mama ginto te, “Dada wan kanya katsi? Wain ay fagnaubunun anya? Nantaban am anya stie ay fafangoni.”

²¹ Ay Muisis nanangalo kafag ngay baguina ay naylat gbanwan sis Etru at bale. Ay nu glugo wan, Etru nafadadwa at baguina Sipura sas Muisis.

²² Ay Sipura nafafion ay nafasalug sik munama, ay Muisis nafangayan kafag sisian te, Gersum. Aroro Muisis nalong te, “Sik betaw kway ste fag talun.”

²³ Nu nlangfe ngayuk banwa, Igiptu at fun anbul wan. Ay dewa katanya, ngay taw Israel gidapan yay gugat siginan nu gafagsuguanan. Ay kanya fagayu naet gubuk sas Dius, ay Dius nadungug at fagetun.

²⁴ Ay Dius nadungug kanya fagayu nu gdarangin aroro gidapan, ay Dius namatang at nasadian sas Abrayam, sas Isak, ay sas Akub.

²⁵ Dius nalag kanya fagayu nu mabanwan ay anfanyu anya fagayu.