Nemyas 9 - Fanawbuid tagsibaliwas Fakayabian

Ngay Taw Israel Nafoyung at ngay Asalanan

¹ Gina sis faduak safulu e ufatk menit, ginanya yay fia fag magdanun, ngay taw Israel anful ay wa gfangon laman gdarangin. Ay kanya fagayu nasulun saku, ay nafoli dafug sat ngay mesa alfuyu laman gfalag te, kabalu.

² Ay wa nataban at ngay betaw sat fagmafulan. Kanya fagayu namalindug ay nafoyung at ngay asalanan ay anggan at ngay mangaguyang at ngay asalanan.

³ Ay kaduge e gtap at Dius Yawi at Faugali, ngay taw malindug kaduge tuluk uras. Ay kaduge yangay tuluk uras, kanya fagayu nafoyung at ngay asalanan ay gseg at Dius Yawi.

⁴ Ay tibak taw Lebi malindug sit ngay agdan ay guro gdarangin sat Dius Yawi. Kafag ngay taw Lebi: Eswa, Bani, Kadmiel, Sebanya, Buni, Serebya, Bani ay Kenani.

⁵ Ay Eswa, Kadmiel, Bani, Kasabneya, Serebya, Udya, Sebanya ay Petakya, kanya fagayu sik ngay taw Lebi ay sik ngay tagfangguna ay kanya wan fagayu at nananguro ngay taw laman nanseg. Kanya fagayu glong sa sangay taw te, “Alindugi, ay segi ay Dius Yawi aroro kanya di e fakatabuan.” Ay kanya fagayu glong te, “Yawi, o wan at mauseganan aroro mabalyanan o, ay maksvn nu gfauseganan ami emu.

⁶ Yawi, o wan at nawat banwa, ngay galeme, daga ay dagat, ay fagayu tagbanwan sanya. Ay nafae leleg o fagayu am awatan tagleleg, ay am ngay tagbarita sis banwa gseg tua gugat emu.

⁷ O wan Yawi em Dius at nafili Abram ay at nafalao anya siginans furuan Ur, Kaldea at fagagbilugun. Ay nafangayan o anya te, Abrayam.

⁸ Ay natuyan o te, kanya matuyan tua sa emu, ay nawat yangay o nasadian sa anya te, namon ban o sat ngay kasugfunanan ngay talun. Tagagbilug kafag ngay talun: taw Kanaan, taw Ket, taw Amur, taw Peres, taw Ebus, ay ngay taw Girgas. Ay nafafasludan tuo am fatuyanan sa anya, aroro matuyan tuo.

⁹ “Ay gina em ngay mangaguyang gidapan gina sis talun Egiptu, nalag tuo. Ay gina kanya fagayu sis Dagat Maraska, nabalus tuo at ngay fagetun.

¹⁰ Ay nafasure o at ngay madulo sas Igiptu at fun ay sat ngay tagfangguna, ay anggan sat ngay taw, aroro nasaful tuo kanya fagayu nu gfauri em ngay mangaguyang. Ay am ngayan kabavn ban di gbadbalian.

¹¹ Ay dagat ankafud dua ay ansik matat fag daga laman am ngay taw at fagnanlaoan. Ay nafapnut o at ngay fawayan, ay kanya fagayu anlubgub kata sik ngay gang sisad dagat.

¹² Ay gina am ngay taw glao swa menit, gfangguna o siginan sik turuk linyabu, ay gina sad yabi, gfangguna o siginan sik turuk afuy, laman glag sat ngaba dalan.

¹³ “Ay nasa o sbuksul Sinay, ay nafakamatoan anya fagayu. Ay nafon o at kasakan fag foyungan ay at masine fag faugali.

¹⁴ Nafoyung o sa anya fagayu sabaliwa at fakamulun sis Famiangalay fag Menit. Ay siginan am fagsuguan Muisis, nasugu o anya fagayu te, faningi am ngay suguan, am ngay foyungan, ay am ngay faugali.

¹⁵ Ay gina kanya fagayu kalunus, nafon tuo fakonun tagsiginans banwa, ay gina kadanum, nafon yangay o at fanginum tagsiginans gang, ay nalong o te, ‘Mananakbo ban am ay manangagbilug ku nafatuyanan sa ayu fag talun.’

¹⁶ Dewa katanya, em ngay mangaguyang nafamaogatun at ngay amatanganan, ay wa nafaning am ngay suguan.

¹⁷ Kanya fagayu wa nafaning am ngay longan, ay wa namatang am ngay nafakamulun at madulo. Kanya fagayu nafamaogatun, ay nafamabo siginan nu gfili at ngay tagfangguna laman gdog nangasik fagsuguan sas talun Igiptu. Dewa katanya, o wan Dius at mafalganan gfalyam ngay asalanan, at mafangafanyu, at yud gfangalyam, at yud masakit gfangadotama, ay at mafangesug. Nu katanya, di o nafabayan anya fagayu,

¹⁸ dewa nawat at fagsegan baka, ay nalong te, ‘Tuy wan em dius at nafaduksun emi siginans talun Igiptu.’ Siginan takatanya at fakamulun, maksvn nu gfadotama emu.

¹⁹ Dewa katanya, aroro kesug tuo anya fagayu, di o nafabayan gina sis talun at yud e taw, ay di o nafalyam kafag turuk linyabu tagfangguna anya fagayu gina swa menit, ay turuk afuy tagyamag sat ngaba dalan gina glao sad yabi.

²⁰ Nafadasug o am Masine fag Falad laman tagfoyung anya fagayu. Ay nafon tuo mana laman at fakonun, ay nafon yangay o mamam gina kadanum.

²¹ Ay nafon yangay o sa anya fagayu at ngay fagayudanun kaduge ufatk safuluk banwa gina sis talun at yud e taw, ay at ngay lanbung di nrasras, ay gina glao, at ngay darafa di nbaga.

²² “Ay nafababo o anya fagayu sat ngay fawayan fag ngay fagfagtainanan, ay nafagbilug o sa anya at fakbangan fag ngay talun, talun Kesbun, fun Sikun at fagfunanun, ay talun Basan, fun Ug at fagfunanun.

²³ Nafayu o at ngay sugfun kata ngay galeme sis banwa. Ay nataban o anya fagayu sas talun am nafatuyanan sat ngay mangaguyang, laman nangadasug ay nangagbilug kanya fag talun.

²⁴ Kanya fagayu andasug sanya ay nagbilug wan. Ay nafababo o anya fagayu sat fawayan fag ngay taw Kanaan. Nafatigwanan wo ngay taw Kanaan anggan at ngay fun sa sangay taw Israel laman mafakamulun at fakaylatun sanya fag ngay taw.

²⁵ Am ngay taw nagbilug ngay furuan ayu daul at ke ngay alad ay anggan at masine fag ngay daga. Ay nagbilug yangay ngay bale at mapnu ngay fagagbilugun, ngay bubun, ngay tanuman ubas, tanum ulibu ay ngayu yak fun kayu tagrawvg. Kanya fagayu nafangon ay napsug ay antaglu. Ay maksvn nu guseganan sam ngay nafakamulun at masine.

²⁶ “Dewa katanya, kanya fagayu kamabo yay gugat ay gasalanan sa emu. Ay natalyuyan am ngay suguan, ay nafabul am ngay taglong takaylat kafoli sa emu, ay maksvn nu kauri emu.

²⁷ Nu katanya, nafababawan o anya fagayu sat ngay fawayan laman gfaidapan anya. Dewa katanya, gina kanya fagayu gidapan, naet gubuk sa emu ay nagubuk tuo. Aroro mafangafanyu tuo, nafili o sik ngay tagfangguna laman gfalangfe anya fagayu siginan at ngay fawayan.

²⁸ “Dewa katanya, am ngay taw nu mabayan wan nu gbanwan, gdog yay fia gfakamulun at ngay mauri. Nu katanya, nafabayan o at ngay fawayan nu gbabo anya. Ay nu nadarangin sa emu, ggubuk tuo. Ay aroro mafangafanyu tuo, nafalangfe o anya fagayu.

²⁹ Ay nalong o sa anya fagayu te, Lag kalyam ngay faugali. Dewa katanya, kanya fagayu kamatungudun way gugat ay wa nafaning am ngay suguan. Ay wa yangay nafaning am ngay suguan tagfon leleg. Ay kanya fagayu nafamabo ay natalyuyan emu ay wa kaylat gdungugan.

³⁰ Dewa katanya, aroro mafangesug tuo, nagwantan tuo ngayuk banwa, ay am Falad nafoyung anya siginan am ngay taglong. Dewa katanya, kanya fagayu wa gfaning, ay nafabayan wo anya fagayu laman gababawan sit ligung fag ngay talun at taw.

³¹ Aroro sik mafangafanyu tuo, di o nafabayan nu kamin, aroro o wan at mafangafanyu ay at yud gfangalyam fag Dius.

³² “O wan em Dius at mabalyanan, at matuyan ay at madulo. Gfafasludan tuo am nasadian ay gfasure am fagmafangesugun. Falangfei emi siginan em fagidapun. Ay katsi gagwantan ami at maksvn fag fagidapun, anggan em ngay fun, ngay tagfangguna, ngay tagfon fanggalangun, ngay taglong, ay anggan em ngay mangaguyang, siginan yay Asirya at ngay fun gfaidapan emi dasug katsi.

³³ Matuyan gfaurianan o emi. Ay matuyan yangay o sa emi, dewa katanya, sik ngay tagasalanan waymi.

³⁴ Em ngay fun, em ngay tagfangguna, em ngay tagfon fanggalangun, ay em ngay mangaguyang wa nafaning am ngay faugali. Ay wa gamatangan ya sabaliwa am suguan ay sam ngay famararang.

³⁵ Ay kanya fagayu dewa anke talun laman at fagbanwanan, ay dewa nalag am fagmasineun, ay dewa o nafon tagbia ay at masine fag daga, wa gfaning emu ay wa gubun at ngay fakamulun at mauri.

³⁶ Kanya wan em fagafagsuguananun katsi si em ngay mangaguyang at daga am nafon sa anya fagayu laman manangon at gutluan ay nusnge wain at masine.

³⁷ Siginan em ngay asalanan, am fagfagbilugan emi fag ngay fun nagbilug wan em ngay gutluan. Ay kanya fagayu nafakamulun sa emi ay anggan sa em ngay fagbaugun kata at fakaylatun, nu katanya, maksvn nu gidapan ami.”

Ngay Taw Nawat sik Nasadian

³⁸ “Nu katanya, ami fag ngay taw Udyu, nawat ami sik nasadian. Ay em ngay tagfangguna, anggan ngay tagfon fanggalangun, ay ngay taw Lebi, nafadiuganan.”