Nemyas 5 - Fanawbuid tagsibaliwas Fakayabian

Nemyas Nagubuk at ngay Yud e Kwa

¹ Tibak mangama ay at mesa mangena naet gubuk sat ngay kaiban fag ngay taw Udyu.

² Kanya fagayu glong te, “Galay ami sik talanan, ngayu ami, ay katsi, gayudan ami fakonun.”

³ Ay tiba glong yangay te, “Nafalo wami em ngay daga, ay em ngay tanum wat ubas, ay anggan em ngay bale, gina anke fanlunus, laman e fakonun tuami.”

⁴ Ay tiba glong yangay te, “Nafangulbus ami salapi laman em famayad sas fun, ay sa em ngay gamasun, ay anggan sa em ngay tanum wat ubas.

⁵ Ami, ay anggan em ngay sisian, dewa ami sik ngay taw Udyu, nafafagsuguan wami em ngay sisian sa em ngay kaiban Udyu, laman e salapi tuami. At matuyan, tiba em ngay baguina, nafalao wami laman sik ngay fagsuguan, wami e tiba yak balyawvtan, aroro tibak taw gagbilug wan em ngay tanum wat ubas.”

⁶ Ay nu nadungug au kanya fagayu at ngay nalong, andotama au maksvn.

⁷ Ay nu namatangan au fia at kayaunanan, nalao kwa vtv, laman nangagras ngay tagfangguna ay at ngay fun sirut. Nalong au sa anya fagayu te, “Nafaidapan am ay ngay kaiban aroro nu get am sa anya at famayad at bedan nafae famamut yayam.” Sanya ginan, nafaful au ay nafakamatoan ngay taw.

⁸ Ay nalong au te, “Nangugatan tam namafoli tam ngay kaiban taw Udyu tagafagsuguanan sa tibak gaban taw. Takatanya ay nafakamulun, kanya fagayu nafabulunan wan nanga sik ngay fagsuguan. O nunda ban tam fakamulun tagfafoli way tam lang anya fagayu sa antam?” Ay kanya fagayu naragangan way lang aroro we fagmalongun ya.

⁹ Ay gfataglayun au glong te, “Wa masine ay fakamulun. Banwani tua suyui Dius, laman tam fawayan fag ngay talun at taw di gfalingun antam.

¹⁰ Anggan wa au, ay ku ngay kalongan, anggan ku ngay fagsuguan at nafaulbus salapi ay trigu sa tam ngay kaiban tagayudan. Dewa katanya, lag tam get ya famayad sat ngay naulbus!

¹¹ Katsi fafolii wan at nafaulbus sa ayu fag ngay fagtanuman, ngay wat ubas, ngay tanum ulibu, ay anggan at ngay bale. Fafolii yangay ay nafafamut at famayad ay ngay nafaulbus fag ngay salapi, ay trigu, fanlangu at bagu ay langis.”

¹² Kanya fagayu nabalus te, “Kin, namafoli wami sa anya kanya fagayu. Ay wa ban mi get ya at ngay famayad. Ay namaning ban mi am ngay longan.” Sanya ginan, nafauro au ngay tagfon fanggalangun, ay sit daga salubangan nafafatuyanan au sa sangay tagfangguna ay sa sangay fun sirut laman namafasludan at fatuyanan.

¹³ Ay nafagfag au ku lanbung sa ku fagwan ay nalong au te, “Katatuy yangay ban nangus Dius at fakamulun sa ay bale ay sa ay ngay ramraman nu dway am nafafasludan ay ngay fatuyanan. Dius ban nangus gbul tuy fagayu siginan ayu.” Ay sanya fag ngay taw nabalus te, “Anud,” ay kanya fagayu nafauseganan Yawi. Ay kafag ngay tagfangguna ay ngay fun sirut nafafasludan at fatuyanan.

Nemyas at Kamalukmean

¹⁴ Kaduge labi duak banwa nung au sik fun sirut sis talun Uda, siginans faduak safuluk banwa sitsigons fatuluk safulu e duak banwa fun Artaserses nu gfunan, au ay anggan ku ngay kalongan wami batang kon fakonun laman sas fun sirut.

¹⁵ Dewa katanya, at naguna angku fag ngay fun sirut, nafaidapan way ngay taw, aroro kanya fagayu get ngay fakonun ay at fanginum, saman ya at fagetun gugat fag ufatk safuluk salapi. Ay anggan at ngay tagfangguna kamalingun wan. Dewa katanya, au kdi gfakamulun takatanya, aroro gsuyu ktua Dius.

¹⁶ Abat ngate, nafakamulun au fagayu laman gdog gfalindug alad, siginan ku ngay taw at fanggubukun. Ay kdi gfangagbilug daga.

¹⁷ Ay gfafangon au gugat sadik sandan limak safuluk tagfangguna taw Udyu, saman ya ngay betaw tagsiginans ligung fag ngay talun.

¹⁸ Galay menit gfafilas au sik baka, unumk tupa at mataglu, ay ngay manuk. Ay galay fasafuluk menit gfaduksun au saman wa saman kfanlangu. Dewa katanya, kwa gbul fakonun at mafalganan laman sas fun sirut, aroro nasaful au te, ngay taw gidapan wan.

¹⁹ Ay gdarangin au te, “Ku Dius, amatangi angku ay gubuki nu gfakamulun au laman stae fag ngay taw.”