Nemyas 1 - Fanawbuid tagsibaliwas Fakayabian

¹ Katatuy at fansulitan sabaliwas Nemyas, Kakalya at baguama, at ngay nafakamulun. Gina sis fasiamk magdanun, at nafangayan te, Kisleb, ay fun Artaserses at faduak safuluk banwa nu gfunan sis Persya, ginanya si au at maaladan fag furuan daul Susa.

Nemyas at Darangin sas Furuan Erusalem

² Ay ku faduksay Kanani natungul angku. Kanya siginans talun Uda gadgaloan sik ngay mangama. Ay nainto au anya fagayu sabaliwas Erusalem ay sa sangay taw Udyu at kinfoli siginan at fagatabananan fag talun Babilunya.

³ Ay kanya fagayu nabalus angku te, “Fagayu at kinfoli sas Uda maksvn nu gidapan, aroro tagsit ligung fag ngay furuan at ngay taw, gfalingun anya fagayu. Dasug katsi, Erusalem at alad maiklasan, ay at ngay sakbawan mairugan.”

⁴ Ay nu nadungug au takatanya, namalunggung au ay nawayway. Ngayuk menit nu kabalu au, ay nadarangin yud gfangon, sas Dius tagsis banwa at daga salubangan.

⁵ Ay nalong au te, “Yawi, o wan at mabalyanan ay at madulo fag Dius. Nafafasludan tuo am nasadian ke fakesugun sas fagayu takesug emu ay sa tagfaning am ngay Faugali.

⁶ Kayu menit ay yabi gdarangin au, laman sa am fagsuguan fag ngay taw Israel. Dungugi ay balusi ku darangin. Ay gfoyung au sa emu em ngay asalanan, anggan ku mangaguyang at ngay asalanan.

⁷ Maksvn em ngay nafakamulun mauri sa emu, aroro wami nafafaning am ngay faugali ay anggan am ngay fagaloan am nafon sa emi siginan am taglong Muisis.

⁸ “Amatangi ebi am nalong sas Muisis te, ‘Ngay taw Israel, nu dway ban am matuyan sa angku, namasaruayan kban ayu sa sangay talun.

⁹ Dewa katanya, nu kafoli tuam sa angku ay namafasludan ku ngay suguan, dewa ban am nasaruayan sa tangayayu fag ngay talun, namaful kyay ban fia ayu sa ku nafili fag talun, laman namauseganan am angku.’

¹⁰ “Kafag ngay taw am ngay fagsuguan ay am ngay taw am nafalangfe siginan am fagmabalyananun ay am fagmabitsugun.

¹¹ Ku Fun, dungugi ku darangin, au am fagsuguan, ay anggan tibak taw at darangin, am ngay fagsuguan taguseganan gfaning emu. Ay gubuki ro angku gina au nansalubang sa em fun. Nangus masine tua ro at famalus sa angku.” Ginanya fag buknga, sik tagfon au fun at fanginum.