Mikas 1 - Fanawbuid tagsibaliwas Fakayabian

¹ Katatuy Yawi at longan sabaliwas Samarya ay Erusalem at nafoyung sas Mikas fag taw Mureset ebi gina Utam, ay Akas, ay Esekyas gtudtubusan gfunan sis talun Uda. Mikas nalong te,

² Fagayu am tagbanwan sas fagdaul daga, dungugani. Aroro Fun Dius Yawi nangaringang sabaliwa ayu siginan at Bale yud e malong.

Faurianan sas Talun Israel ay Talun Uda

³ Fagayu am dungugani! Yawi gduksun siginan at fagbanwanan. Ay kanya nanlao sa tangabat fag ngay afud sas fagdaul daga.

⁴ Ay at fagnanloan ban fag ngay buksul umtinas kata sik ngay lune at mafasalungan. Ay at fagnanloan ban fag ngay datag umke karang kata mamam nu nabuntuk siginan tangabat fag afud daga.

⁵ Takatanya ban fagayu umfasludan aroro ngay taw Israel ay ngay taw Uda at ngay asalanan. Ay ngay taw Samarya nafaylat ngay taw Israel laman gasalanan. Ay ngay taw Erusalem nafamatangan ngay taw Uda laman gseg tibak fagsegan.

⁶ Nu katanya, Yawi nalong te, “Nangiklas kban Samarya laman umsik fagtanuman wat ubas. Ay namabaras kban ngay gang sanya ginan fag furuan yakmay andasug sas datag ay yakmay ansure kafag furuan at ngay fagfatungkudan turuk.

⁷ Ay fagayu ban fagsegan tagsis Samarya umkirug wan, ay ngay mangama ban at famayad sa sangay mangena tagfaebayad umkirug yangay sat fagnansegan fag bale. Furuan Samarya anke ngay fagsegan siginan ngay mangama at famayad sa sangay tagfaebayad fag ngay mangena sit fagnansegan fag bale. Nu katanya, at ngay fawayan ban namul salapi ay gintu at mafasafungan sanya fag ngay fagsegan, laman at famayad yangay sa sangay tagfaebayad fag ngay mangena sit fagnansegan fag ngay bale.”

⁸ Nu katanya, Mikas nalong yay fia te, Aroro Samarya ban kaiklas wan, maksvn nu gwayway au ay kabalu, ay kwa galapakan ya, ay kwa galanbungan ya laman gfalag te, kabalu au. Maksvn nu gwayway au kata sik idu talun nu gsubang ay kata sik liaw nu guni.

⁹ Aroro Samarya ban nu maiklasan kata sik buyu yud kafafia, ay umfasludan yangay ban takatatuy sas Uda, anggan sa ku ngay kaiban at fagbanwanan tiba tungud fag furuan Erusalem.

¹⁰ Ngay taw Uda, lag ban am kamansulit sa tam ngay fawayan fag ngay taw Gat sabaliwa faurianan takadasug sa antam. Lag ban am gfalag te, kabalu am. Nu gfalag ban am ay fakabaluun sa yakman sfuruan Bet-Leafra, siginan nu gdagingan am sa sangaba daga.

¹¹ Ngay taw Safir, nangatabanan ban ginkaplan malulasan. Ay ngay taw Saanan, kalimu ban gduksun siginan at furuan laman nanggubuk ayu. Ay ngay taw Bet-Esel wa yangay ban mananggubuk ayu aroro gwayway yangay ban siginan takadasug sa anya fag faurianan.

¹² At matuyan, ngay taw sis furuan Marut kanbang wa daul awayan nu karagang. Dewa katanya, kanya ban fagayu wa gbayan aroro Yawi nafoyung sat ngay fawayan Erusalem at sakbawan laman ban at dalan.

¹³ Am fag ngay tagbanwan sis furuan Lakis, fasayangi sa ay ngay kabayu ay ngay faguyudan ay lagyui wan. Aroro nafaning wayam ngay taw Israel at nafakamulun mauri, ay taw Siun nafaning yangay ayu nafakamulun at mauri.

¹⁴ Am fag ngay taw Uda, famatoi sik famonun nu glo wam siginans furuan Mureset-Gat. Israel at ngay fun wa ban e fagsegun fanggubukun siginans furuan Aksib.

¹⁵ Am tagbanwan sis furuan Maresa, Yawi ban gsugu sa ayu ngay fawayan laman nangagbilug ayu. Ngay tagbanwan sis Uda, ay ngay tagfangguna ban nanuksuan sas luib tagsis Adulam.

¹⁶ Ay e nangago ban siginan ayu ay fakesugun fia ay ngay sisian ay gtaban sa tibak furuan, nu katanya, at kaksvnan ban nu kabalu am, sak ban am gufo ay buk kata sik uling at alfuyu nu malanu.