Mateu 28 - Fanawbuid tagsibaliwas Fakayabian

Isus nu Gdog Gleleg

¹ Ay Famiangalay fag Menit nu nlangfe wan, gina sbalabag sirut sLinggu, Maria Magdalena, ay anggan sadi yak Maria, andasug laman nanlag sas fagfolian.

² Ay gina sanya, maksvn daga nu guigan. Ay tam Fun at tagbarita at sadi andasug siginans banwa, ay nafadaging faningding sakbawan fag gang daul, ay gmalunggung sanya.

³ At kamasuloan kaksvn sik limbad, ay at lanbung malaksi.

⁴ Ay tagulit fag ngay tagfawayan maksvn nu gtadtaruyan aroro kalimu, ay kata wan nu mabulan.

⁵ Ay kafag tagbarita nalong sa kafag ngay mangena te, “Lag am kalimu, aroro nasaful au te, grvbvy am Isus, ebi at natuktuk sas fasulungan kayu.

⁶ Kanya wa ste ya, aroro nadog yay naleleg, kata ebi at longan. Wainyayam, damai at fagfolian anya.

⁷ Masakiti, namoyung am sat ngay tagadal te, kanya gdog yay gleleg siginan at fagmabulanan. Ay kanya gguna ban ayu sas talun Galilea. Sanya ban nu glag am anya. Amatangi ku longan ayu.”

Isus Ansure sas Duena Gina sa sangaba Dalan

⁸ Ay kanya fag duena nalo masakit siginans fagfolian, ay nafasaful at nalag sa sangay tagadal. Ay dewa kalimu, guseganan daul.

⁹ Ay kaduge sangaba dalan, Isus nafablang duena ay nafakamatoan. Ay duena ankakbang sas Isus ay nated at darafa, ay naseg anya.

¹⁰ Ay arodi Isus nalong sanya fag duena te, “Lag kalimu. Loi wan ay foyungi sa ku ngay faduksay, laman sabans talun Galilea. Ay sanya ban nu glag angku.”

¹¹ Ay gina kafag ngay mangena nalo, tibak tagfawayan tagulit sis fagfolian, anfoli sas furuan ay nafoyung sa sangay fun tagfon fanggalangun fagayu at nalag.

¹² Ay ngay fun tagfon fanggalangun nu nafaful taw Udyu at ngay fagtainan ay nu nasulitanan, kanya nafon sik ngay salapi sanya fag ngay tagfawayan,

¹³ ay nalong te, “Foyungi te, ‘Isus at ngay tagadal andasug sas fagfolian aro sad yabi ay nabul at bilug kaduge ami gtiug.’

¹⁴ Ay tam fun ro nu nadungug katanya ay longan, ay nu nkuri way, ami waban tagfalukmeanan anya, laman di gfauri ayu.”

¹⁵ Ay kafag ngay tagfawayan nabul kafag ngay salapi ay gfaning at longan. Ay dasug katsi ngay taw Udyu gfoyung yay gugat takatanya.

Isus Nasugu at ngay Tagadal Laman Kamoyung

¹⁶ Ay Isus at labi sadik tagadal nalo sas Isus at longan ebi ataw fag buksul sis talun Galilea.

¹⁷ Ay at ngay tagadal nu nalag Isus, gseg anya. Ay tiba gaduanun yay.

¹⁸ Ay Isus ankakbang sat ngay tagadal ay nalong anya fagayu te, “Fagayu fagmabalyananun sis banwa ay sis daga nafon wan sa angku.

¹⁹ Loi wan ay faetagadali angku sas fagayu talun at ngay taw. Fasurungi anya fagayu sa tam Mama at ngayan ay at Baguama at ngayan ay at Masine fag Falad at ngayan.

²⁰ Foyungi sa anya fagayu, laman gfaning fagayu ku longan sa ayu. Matuyan, si ktua ban gugat ayu, sitsigons fagdaul daga at fakatabuan.”