Mateu 27 - Fanawbuid tagsibaliwas Fakayabian

Nataban Isus sas Pilatu

¹ Ay balabag di, fagayu fun tagfon fanggalangun ay taw Udyu at ngay fagtainan anful, ay gkamatoan sabaliwa nu setain ban nu namabul Isus.

² Ay kanya fagayu nasugu laman gsiuk Isus ay gtaban sas fun Pilatu.

Udas Nu Kabul

³ Ay Udas, at nafoyung Isus sat mauri fag ngay taw, nu nadungug te, namabul wan Isus, kanya kabalu daul aroro sat nafakamulun, ay nanamafoli ebi at nabul fag tuluk safuluk salapi sa sangay fun tagfon fanggalangun ay sa sangay fagtainan.

⁴ Ay nalong anya fagayu te, “E asalanan au, aroro nafoyung au sa ayu sik taw at yud e asalanan.” Ay ngay fagtainan nabalus anya te, “Am longan we tungkul sa emi. Nusnga setaw wa am algan.”

⁵ Ay Udas naukas kafag tuluk safuluk salapi sas Dius at basad bale ay nalo wan ay narabing anya.

⁶ Ay ngay fun tagfon fanggalangun nafuyut kafag ngay salapi ay gkamatoan te, “Gsalan way ro tam tam faugali nu gfoli tuy fag salapi sas Dius at fagsuadan salapi, aroro tuy sik famayad sik taw at taguk.”

⁷ Ay kanya fagayu ansadi te, kafag ngay salapi at famayad sa sik takawat tikung at daga, at fagnamolian ban tagsiginan tibak talun fag ngay taw at kinbul.

⁸ Ay nu katanya nafangayan kafag daga te, Daga Gatagukun. Ay dasug katsi kanya wan at ngayan.

⁹ Nu katanya, anfasludan Dius at taglong Eremyas at nafoyung te, “Kafag ngay taw nabul kafag tuluk safuluk salapi, ngay taw Israel at longan at famayad sa anya.

¹⁰ Ay kanya nafon kafag ngay salapi laman namul sik takawat tikung at daga, kata Dius at Longan sa angku.”

Isus sis Pilatu at Daga Salubangan

¹¹ Ay Isus malindug sis fun Pilatu at daga salubangan, ay Pilatu nainto anya te, “O o wan taw Udyu at Fun?” Ay Isus gbalus anya te, “O wan at nalong takatanya.”

¹² Ngay fun tagfon fanggalangun ay taw Udyu at ngay fagtainan nafoyung at yud matuyan sabaliwas Isus, ay Isus wa gbalus.

¹³ Ay Pilatu ginto sas Isus te, “O wo gdungug at ngay fantabugan sa emu?”

¹⁴ Ay Isus wa nabalus nusdi sadik longan, ay kafag fun kadulo daul.

Pilatu Nafalfas Barabas

¹⁵ Galay fagmafulun sabaliwas Tagbarita nu Glangfe, fun Pilatu gfalfas sik maubungan, nusnga sinu sanya fag ngay taw at fakaylatun.

¹⁶ Ay ginanya at sadi at maubungan at ngayan Barabas, ay fagayu taw toglag anya.

¹⁷ Ay gina ngay taw maful, Pilatu ginto sa anya fagayu te, “Inday kanya fag dua ay fakaylatun ku fagfalfasun, o Barabas ay mannga Isus, tiba at ngayan te, Dius at nafili fag Fun?”

¹⁸ Aroro Pilatu nasaful te, ngay fagtainan at fagnatabanun Isus sa anya aroro galabian.

¹⁹ Ay gina Pilatu malunggung sat fanginsafulan fag fagmalunggungan, at bubay nasugu sik fagsuguan sa anya te, “Lag o nangasalag kafag taw at matuyan, aroro sad yabi e taginfan au sabaliwa anya ay wa mabayan ku amatanganan sabaliwa anya.”

²⁰ Ay kafag ngay fun tagfon fanggalangun ay taw Udyu at ngay fagtainan naatul ngay taw, laman nanget sas Pilatu te, “Falfasi Barabas ay fabuli Isus.”

²¹ Ay arodi Pilatu ginto sa sangay taw te, “Inday ro kanya fag dua ay fakaylatun ku fagfalfasun?” Ay kafag ngay taw gbalus te, “Barabas.”

²² Ay Pilatu ginto te, “Nataw ro ku fakamulun sas Isus, tiba at ngayan te, Dius at nafili fag Fun?” Ay fagayu taw gbalus te, “Tuktuki anya sas fasulungan kayu!”

²³ Ay Pilatu ginto te, “Ay wain? Nataw nunda at asalanan?” Ay kafag ngay taw kaugat way nu guro te, “Tuktuki anya sas fasulungan kayu!”

²⁴ Ay Pilatu nu nasaful te, we tungkul ya at ngay longan sa sangay taw, aroro kanya fagayu ganangawayanun wan, kanya nabul sik mamam ay gfegus at daluap si sangay taw at daga salubangan. Ay kanya nalong te, “Kwe asalanan sa kafag taw at fakabulun. Siwa ayu.”

²⁵ Ay kafag ngay taw nabalus te, “Kin, dewa ami ay em ngay sisian ke asalanan sat fakabulun.”

²⁶ Ay Pilatu nafalfas Barabas si sangay taw at wabilug. Ay nu nafafalangan Isus, nafatigwanan sa sangay tagfawayan, laman nantuktuk sas fasulungan kayu.

Ngay Tagfawayan Gfalingun Isus

²⁷ Ay fun Pilatu at ngay tagfawayan nataban Isus sas Pilatu at bale, ay nafaful fagayu tagfawayan ay naligung Isus.

²⁸ Ay kafag ngay tagfawayan nabul Isus at lanbung ay natubus sik umut maraska.

²⁹ Ay kanya fagayu nafabalulang sik sangbo madugi ay nafasulun sas Isus at alfuyu. Ay nafated sas Isus at siun fag daluap sik anyamu, ay natudan sit daga salubangan ay gfalingun anya te, “Tubus, taw Udyu at Fun!”

³⁰ Ay kanya natufe Isus, ay nabul siginan anya kafag anyamu ay nafalang at alfuyu.

³¹ Ay nu ntabu wan nu gfalingun Isus, kafag ngay tagfawayan nabul at umut ay nafasulun aro taw at lanbung ay nafaduksun anya laman nantuktuk sas fasulungan kayu.

Nu Gtuktuk Isus sas Fasulungan Kayu

³² Ay nu naduksun siginans fun at bale, kanya fag ngay tagfawayan nalag sik taw tagsiginans furuan Sirene at ngayan Simun. Ay kafag ngay tagfawayan nafabuba sa anya Isus at fasulungan kayu.

³³ Ay kanya fagayu andasug sa sik talun at ngayan te, Gulguta, at masuad Talun Butul Alfuyu. Ay nu sanya wan,

³⁴ e nafon sas Isus sik fanlangu at mafasuglatan at mayat, laman gfalay nu ganini. Ay Isus nu nafaskud, wa kaylat ginum.

³⁵ Ay nu natuktuk wan Isus sas fasulungan kayu, kanya fagayu gukas gang laman ginsaful te, sinu ro at nangagbilug Isus at ngay lanbung.

³⁶ Ay sanya ginan kafag ngay tagfawayan malunggung sanya ay gulit.

³⁷ Ay kanya fagayu nadafut sik rirukan sis Isus at tungud alfuyu, sik fakasafulan at fantabugan sa anya: Tuy Isus, ngay Taw Udyu at Fun.

Ngay Taw Gfalingun Isus

³⁸ Ay ginanya natuktuk yangay duak tagfangkamul sas duak fasulungan kayu gsumbalian Isus.

³⁹ Ay kayu at nadalan sanya gfainsingian at alfuyu ay gfalingun anya te, “O wan at nalong te,

⁴⁰ ‘Nanrasras kban Dius at bale ay mafatabu kway nu ntabu tuluk menit.’ Falangfei am sadili, nu o wan Dius at Baguama, ay alfasi siginans fasulungan kayu.”

⁴¹ Ay anggan ngay fun tagfon fanggalangun ay ngay tagfoyung Muisis at Faugali ay ngay fagtainan gfalingun yangay anya te,

⁴² “Kanya dewa mafalangfe tibak taw, wa mafalangfe at sadili. Ay kanya taw Israel oma at Fun. Nu nkalfas di ro siginans fasulungan kayu, gafanud wa ro tam.”

⁴³ Ay ngay tagfangguna nalong yangay te, “Kanya gafanud tua sas Dius, ay Dius nu kaylat tua anya, agvd, gulit watam, o namalfas ro anya katsi. Aroro kanya nalong te, ‘Au wan Dius at Baguama.’ ”

⁴⁴ Ay anggan kafag duak tagfangkamul at kintuktuk gasfuan Isus, gfalingun yangay.

Isus nu Kabul

⁴⁵ Ay siginans wabilug menit, andulum way lang sanya fag talun. Ay nu madulum, sitsigon sfatulu sas fafun baliwa.

⁴⁶ Ay gina sfafun sfatulu, Isus nauro daul te, “Eli, Eli, lama sabaktani?” At masuad te, “Ku Dius, ku Dius, wain am fagnaubunun angku?”

⁴⁷ Ay tiba at malindug sanya, nu nadungug, nalong te, “Kanya guro Elyas.”

⁴⁸ Ay arodi vtv sadik taw masakit nu namul sik fanrarus ay nafasurung sat mayat fag sanggvtan, ay natvgdan sa sik anyamu ay nafasupsup sas Isus.

⁴⁹ Ay tibak taw nasalag te, “Toyap. Gfanya yap tam o Elyas ro kadasug ay namalangfe anya.”

⁵⁰ Ay Isus gdog nauro maksvn, ay kanya wan taguyan at engasan.

⁵¹ Ay ginanya, fantaba fag ramit sad basad Dius at bale an-girat siginan at tungud sitsigon tdaga, ay ankafud dua. Ay daga nauigan ay ngay gang nafangabaltakan way lang,

⁵² ay ngay fagfolian anluang, ay Dius nafadog yay nafaleleg tiba at ngay taw at kinbul.

⁵³ Ay kanya fagayu naduksun siginans fagfolian, ay abandi, gina Isus nadog naleleg, anggan kanya fagayu andasug sas Erusalem ay ngayuk taw at nalag anya fagayu.

⁵⁴ Ay tagfawayan at fun ay anggan at ngay ufud tagulit Isus, namatang daga nu guigan ay nalag yangay at kinfasludan. Ay kanya fagayu maksvn nu kalimu ay nalong te, “Anud, kanya wa fia Dius at Baguama.”

⁵⁵ Ay ngayuk mangena tagdama sit dayu vtv. Kanya fag ngay mangena ebi ginan galo Isus siginans talun Galilea laman ggubuk anya.

⁵⁶ Sanya yangay Maria Magdalena, ay Maria, Santiagu ay Use at mina, ay Sebedeu at mangena.

Nu Namoli Isus at Bilug

⁵⁷ Ay nu gakayabiun wan, sik taw at maramraman andasug siginans furuan Arimatea, at ngayan Use. Kanya Isus at tagadal at sadi.

⁵⁸ Ay kanya nalo sas Pilatu ay get sa anya Isus at bilug. Ay arodi Pilatu e nasugu laman namon.

⁵⁹ Ay Use nabul Isus at bilug ay nasifig sa sik bagu fag ramit,

⁶⁰ ay nanamoli sat nafawat fag fagfolian at bagu, at falganan at fagnamolian ban anya. Ay arodi, nafadagingan sik gang daul sas sakbawan laman gdingding, ay nalo wan.

⁶¹ Sanya yangay Maria Magdalena ay anggan sadi yak Maria gmalunggung sis aturunan fagfolian.

Taw Udyu at ngay Fagtainan Nasugu Tagulit sis Fagfolian

⁶² Balabag di, nu nlangfe wan Famalganan ngay fakonun fag menit, ngay fun tagfon fanggalangun ay ngay taw Fariseu nanangakbang sas Pilatu,

⁶³ ay nalong te, “Namatang ami kafag tagfandaya at longan gina gleleg te, ‘Nu nlangfe tuluk menit, gdog kyay gleleg.’

⁶⁴ Nu katanya, sugui laman e gfaksvn nu gdingding kafag fagfolian, yakmay anlangfe kafag tuluk menit, laman at ngay tagadal dewa ndasug, wa mafabul Isus at bilug ay wa gfoyung sa sangay taw te, kanya nadog yay naleleg. Ay nu gfandayan ban, gtungud yay ebi taguna.”

⁶⁵ Ay Pilatu nalong sanya fag ngay taw te, “E ngay tagfawayan am. Sugui te, faksvni tua nu gdingding am kafag fagfolian, kaksvn ay fagmakatuun.”

⁶⁶ Ay kanya fag ngay taw nalo wan ay nafaksvn kafag fagfolian siginan nu gdafut sik taru laman ngay taw kalimu tua gluang. Ay nasugu yangay sanya sik ngay tagfawayan laman gulit.