Mateu 24 - Fanawbuid tagsibaliwas Fakayabian

Isus Nafoyung sabaliwa at Fakatabuan fag ngay Menit

¹ Ay Isus naduksun siginan Dius at bale ay kaduge glao, at ngay tagadal ankakbang sa anya laman namalag sa anya Dius at bale ay tiba yak afud bale.

² Ay Isus nalong sat ngay tagadal te, “O glag am in fag ngay afud bale? Matuyan nu glong au ayu te, abandi ban we gang ya gtudtungudan. Fagayu ban umrasras wan.”

³ Ay gina Isus malunggung sis Buksul Ulibu, at ngay tagadal ankakbang sa anya gina yud sanya tibak taw ay glong anya te, “Foyungi emi te, seduge ban nu kafasludan takatanya, ay setain ban nu saful ami te, gakadasugun wo, ay nu kadasug at fakatabuan fag ngay menit?”

⁴ Ay Isus nabalus te, “Mataganani tua laman diam gadayan nusnga sinu.

⁵ Aroro ngayu bank taw kadasug ay glong te, ‘Au wan Dius at nafili fag Fun,’ ay gdaya ban ngayuk taw.

⁶ Ay dewa ban am nadungug ngay awayan at munakbang si ayu, ay e dungganan am te, e gawayan ngayayu, lag kalimu. Matuyan, umfasludan ban takatanya, dewa katanya, bunya kanya at fakatabuan fag ngay menit.

⁷ Aroro tibak talun ban at ngay taw at fagfawayanun tiba yangayk talun at ngay taw. Ay sik fun at ngay taw gfawayan yangay ban sik fun at ngay taw, ay sa ban tibak talun maksvn nu malunus ay nu e faleleg.

⁸ Takatanya fagayu famasigad takadasug fag ngay fagidapun, kata sik mangena nu gidapan gina gafasalugun.

⁹ “Ginanya ban e ggamat ayu ay gtaban sat mauri fag ngay taw, laman gfauri ay namabul ayu. Fagayu talun ban at ngay taw kauri yangay ayu, aroro gafanud am sa angku.

¹⁰ Ay ginanya ban ngayuk taw gubun at fagafanudun. Ay kanya ban fagayu gfoyung at ngay iba sat mauri fag ngay taw ay kadkaurian.

¹¹ Ay ngayu ban takadasug ay kamuagan te, ‘Au wan Dius at taglong at sadi,’ ay nandaya ban ngayuk taw.

¹² Ay ngayu bank taw wa kesug ya angku, aroro umkayu ban at fagmauriun.

¹³ Ay dewa katanya at namabakvd sat fagafanudun sitsigons fakatabuan, umlangfe tua ban.

¹⁴ Ay e gfoyung ban sas fagdaul daga at Masine fag Barita sabaliwas Dius nu gfagtainan, laman sas fagayu talun at ngay taw sumaful. Ay sanya ginan, kadasug wan at fakatabuan.

Tagfayud e Masuad Dius at Bale

¹⁵ “Ay lumag ban am at maksvn fag mauri tagfayud e masuad Dius at bale. Dius at taglong Daniel nalong sabaliwa takatanya. (Nusnga sinu tagtap tuy fag longan, atogdungugi.)

¹⁶ Ginanya ban, fagayu taw tagsis talun Udea lagyui sa sangay buksul.

¹⁷ Ay sik taw tagsit tungud bale, nu natustus, lag gsakbo ya sat bale laman namul nusnge wain.

¹⁸ Ay sik taw tagsit gamasun, lag guli ya sat bale laman namul at lanbung.

¹⁹ Ay ginanya ban fag ngay menit, afanyuan ngay tagfafion ay anggan at ke fagfasusuun.

²⁰ Darangini te, nu glagyu am bunwa sis abagat, ay anggan sis Famiangalay fag Menit.

²¹ Aroro ginanya ban fag ngay menit, maksvn takadasug fag faurianan, gtungud yay fagayu faurianan siginan Dius nu kawat fagdaul daga dasug katsi, ay wa ban e gtungud ya.

²² Dius ban nu dway ban nafagud kanya fag buknga, wa ban e gleleg ya. Ay dewa katanya, aroro kesug tua at nafili fag ngay taw, gfagud way ban ginanya fag buknga.

²³ “Ay ginanya ban, dewa e nalong ayu te, ‘Iste wan Dius at nafili fag Fun,’ ay dewa e nalong te, ‘Sanya wan,’ lag gafanud.

²⁴ E kadasug ban ay kamuag te, ‘Au wan Dius at nafili fag Fun,’ ay ‘Au wan Dius at taglong at sadi.’ Ay kanya ban namalag at madulo ay at mabalyanan fag ngay fakamulun, laman nanfamaskudan nanfandaya anggan Dius at nafili fag ngay taw.

²⁵ Amatangi, nafoyung kwan sa ayu takadasug ban.

²⁶ “Nu katanya, dewa tibak taw glong ayu te, ‘Sanya wan Dius at nafili fag Fun sis talun at yud e taw,’ lag am sanya. Ay dewa e glong ayu te, ‘Sanya wan siwa sad bale,’ lag am gafanud.

²⁷ Aroro au, Taw at Baguama, nu kadasug au, kata sik limbad nu gdamlag siginans fakamenitan ay kadasug sas fakayabian.

²⁸ Kata sik faydayuanan te, ‘Nusnga nday ke mabulan, ugak nangaful sanya.’

Taw at Baguama nu Kadasug Ban

²⁹ “Ay nu nlangfe wan kafag faurianan, ‘menit ban umdulum, ay magdanun wa gyamag ya, ay anggan ban ngay galeme katong siginans banwa, ay fagayu ke fagmabalyananun sis banwa muigan.’

³⁰ Ay sanya ginan umsure Taw at Baguama at fakatoglagan sis banwa. Ay ginanya, fagayu taw sas fagdaul daga kabalu. Ay kanya ban fagayu lumag angku Taw at Baguama nu kadasug au sis linyabu sis banwa, ay e fagmabalyananun au ay e fagmasineun au daul.

³¹ Ay gina ban e gbudyung daul gsugu kban ku ngay tagbarita, laman namaful ku nafili fag ngay taw siginans fagayu talun ay dewa ndaginan fag fungfung daga.

Isus at Faydayuanan sabaliwas Malagu

³² “Amatangani ku faydayuanan sabaliwas malagu. At sanga nu maragbuk wan, ay at don nu karabas wan, saful wam te, gakamanguneun wan.

³³ Katanya yangay nu lumag ban am ku longan aro nu kafasludan, sumaful wam te, au, Taw at Baguama, gakadasugun kwan.

³⁴ Matuyan nu glong au ayu te, katsi fag ngay taw tiba ya kabul yakmay ban anfasludan fagayu ku longan.

³⁵ Banwa ay daga kalyam way ban, dewa katanya, ku longan ban sanya tua gugat kabavn.

We Taw Saful te, Ginain Ban Taw at Baguama nu Kadasug

³⁶ “We taw nasaful te, ginanya ban fag menit ay fag buknga nu kafoli au. Anggan Dius at ngay tagbarita sis banwa wa yangay nasaful. Ay au oma, Dius at Baguama, kwa nasaful. Ku Mama way lang tagsaful.

³⁷ Au, Taw at Baguama, nu kadasug kban, ngay taw at fakamulun kata ebi gina Nui at buknga.

³⁸ Ginanya, gina lino daul gakadasugun, ngay taw mabayan way fia gfangon ay ginum ay gdaddadwaan, yakmay Nui nasakbo sas sakayan lino.

³⁹ Ay kafag ngay taw wa nasaful takafasludan, yakmay kafag lino daul andasug ay nafapnut anya fagayu. Ay katanya yangay ban nu kadasug au, Taw at Baguama.

⁴⁰ Ginanya ban fag menit e sik duama sis gamasun. Ay e nabul wan at sadi, ay at usama anfamato way.

⁴¹ Ay e sik duena glubuk, ay e nabul wan at sadi, ay at usena anfamato way.

⁴² Nu katanya, mafalganani tua gugat, aroro wam nasaful te, ginain ay Fun nu kadasug.

⁴³ Amatangani te, sik taw nu nasaful di te, ginanya ro tagfangkamul nu kadasug sat bale, kanya ro mafalganan tua, ay wa ro gfabayan nu gsakbo sat bale.

⁴⁴ Nu katanya, anggan am mafalganani tua. Aroro nu kadasug au, Taw at Baguama, gina way ban am yud gamatangan te, kadasug kwan.

At Matuyan ay at Mauri fag Fagsuguan

⁴⁵ “Katatuy at matuyan ay at mamatanganan fag fagsuguan. At tagfayafun nasugu anya te, ‘Alagai ku ngay fagsuguan ay fafangoni tua anya fagayu galay fanfangonan.’

⁴⁶ Mauseganan kafag fagsuguan, gina at tagfayafun kadasug, nu gfakamulun tua fia at fakamulun.

⁴⁷ Matuyan nu glong au ayu te, at tagfayafun namatigwanan sanya fag fagsuguan fagayu at fagagbilugun.

⁴⁸ Ay sik fagsuguan nu mauri way, kanya gamatangan way te, ‘Glugo yay ban ku tagfayafun nu guli,’

⁴⁹ ay gfasigad gfalang at ngay iba, ay gfangon ay ginum gfasfuan ngay kinnanad glanguan.

⁵⁰ At tagfayafun umdasug gina kanya fag fagsuguan yud mafalganan fag menit ay fag buknga,

⁵¹ ay namaurianan anya maksvn, ay namalo sa sangay takamaningan. Ay kanya ban gwayway gugat sanya ay gfaringgit at bagang.