Mateu 20 - Fanawbuid tagsibaliwas Fakayabian

Isus at Faydayuanan sabaliwa sik Tagagbilug Tanuman ay at ngay Taggubuk

¹ Ay Isus nalong yangay te, “Dius nu gfagtainan kata yangay sik tagagbilug tanuman wat ubas. Ay tagagbilug mayabas nu nanrvbvy sik ngay taw at namakamulun sat tanuman.

² Ay nu nalag wan, nadiuganan te, gfon at kasakan fag famayad sik menit at nainlufuyan. Ay kanya nasugu kafag ngay taw sat tanuman.

³ “Ay gina sbalabag sfasiam, tagagbilug nalo yay fia ay nalag tibak taw at malindug yud e fakamulun, sis furuan at fagawean.

⁴ Ay nalong sa anya fagayu te, ‘Anggan am, loi wan ay namakamuluni sa ku tanuman, ay gfon kro ayu at kasakan fag famayad.’

⁵ Ay kafag ngay taw nalo wan sat tanuman wat. “Ay gina swabilug menit ay sfafun sfatulu, katanya yangay tagagbilug at fakamulun.

⁶ Ay gina sfafun sfalima, tagagbilug nalo yay gayvd ay nalag sik ngay taw yud e fakamulun. Ay kanya nalong anya fagayu te, ‘Wain ay fagsteun lang fagngabak menit ay yud e fakamulun?’

⁷ “Ay kafag ngay taw nalong te, ‘Aroro we gfafakamulun sa emi.’ Ay tagagbilug nalong anya fagayu te, ‘Ay kin, nu katanya, anggan am, loi wan, namakamuluni sa ku tanuman.’

⁸ “Ay menit nu kafalyu wan, kafag tagagbilug nalong sat tagalaga te, ‘Fastei at ngay nanamakamulun sa ku tanuman, ay bayadi at nalufuyan. Nu gbayad o, fasigadi siginan taguyan at kindasug ay fatabui sat taguna.’

⁹ “Ay at ngay kindasug gina sfafun sfalima ankakbang, ay nafon anya fagayu famayad sat nainlufuyan sik menit.

¹⁰ Ay taguna fag ngay taw at kindasug laman namakamulun, nu glong ro, ayu yap tua at fon sa anya. Ay at nafon sas mesa sik taw, kayu at famayad sat nainlufuyan sik menit.

¹¹ Ay kafag ngay taw nu nabul at famayad, ankuri tagagbilug aroro nafalabo.

¹² Glong te, ‘At ngay kindasug taguyan fag tagfakamulun sik kadugayan way sirut nu gfakamulun, ay ami nu gfakamulun ami, dewa masugba, fagngaba tuak menit. Ay gsudsudan way am famayad sa emi fagayu.’

¹³ “Ay tagagbilug nabalus anya te, ‘Kwa nadaya emu. Ansadi wata fia te, kayu way nya ku famayad sa emu.

¹⁴ Kanya ku famayad, buli wan ay ulii wan, aroro gsud way nu gfon au sat nafakamulun taguyan ay anggan sa emu.

¹⁵ Kwe asalanan dewa au gfaning ku algan sa ku salapi. O kadotama o sa am amatanganan aroro nafakamulun au at masine sam iba?’ ”

¹⁶ Ay Isus nalong te, “Nu katanya, at naguyanan, kanya ban gumuna, ay at naguna, kanya ban gaguyanan.”

Isus at Fatulu Ginan Gfoyung sabaliwa nu Kabul Ban

¹⁷ Ay Isus gina glao sas Erusalem, nataban at labi duak tagadal sat dayu. Ay kaduge glo, Isus glong anya te,

¹⁸ “Amatangani, katsi sa watams Erusalem. Ay sanya ban e moyung angku, Taw at Baguama, sa sangay fun tagfon fanggalangun ay sa sangay tagfoyung Muisis at Faugali. Ay kafag ngay taw ban nanfantabugan angku laman namabul,

¹⁹ ay namatigwanan sas yud Udyu fag ngay taw. Ay kanya ban gfalingun ay gfalang angku anggan tumuktuk ban angku sas fasulungan kayu. Ay nu nlangfe ban tuluk menit gdog kyay gleleg.”

Sik Duksay at Mina at Fagetun sas Isus

²⁰ Ay arodi Sebedeu at mangena nanangakbang sas Isus gadgaloan at baguama fagdua, ay natudan sas Isus at salubangan aroro e fagetun sa anya.

²¹ Ay Isus ginto anya te, “Nataw am fakaylatun?” Ay kafag mangena nabalus te, “Nu masine di, gina ban o gfagtainan, falunggungi ban ku baguama fagdua gsumbalian emu.”

²² Ay Isus nabalus te, “Duan, wam nasaful ay fagetun at masuad. O nunda manandalan ban am ku fagnandalanun fag fagidapun?” Ay duksay nabalus anya te, “Sabv.”

²³ Ay Isus nalong yangay te, “E kin. Gdalan ban am takatanya fag fagidapun. Ay dewa katanya, at nanmalunggung ban gsumbalian angku bunwa au tagfili. Kafag ngay faglunggungan ku Mama tua at nafalganan sat ngay nafili.”

²⁴ Ay at safuluk tagadal nu nadungug katanya, kauri kafag duksay.

²⁵ Ay Isus nafaful at ngay tagadal sa anya ay nalong te, “Nasaful wam te, at yud Udyu fag ngay taw at ngay fun maksvn nu gsugu, ay nusnga setaw at fakaylatun, at fagfanggunaun fag ngay taw gfaning.

²⁶ Ay am, lag katanya. Nusnga sinu am takaylat nangabalyanan, afagsuguani way ay iba.

²⁷ Ay nusnga sinu am takaylat tagtungud tibak taw, katai yakman sik fagsuguan.

²⁸ Ay au Taw at Baguama, katanya kyangay, ku fagindasugun bundi taw at fagnanggubukun, nu bunway nanggubuk au ngay taw, ay namon au ku leleg laman namul au ngayuk taw siginans fakabulun.”

Isus Nafafia Duak Mangama at Yud Glag

²⁹ Ay gina Isus ay at ngay tagadal glo siginans Eriku, ngayuk taw galo anya.

³⁰ Ay sanya duak taw yud glag malunggung sis tigyangan dalan. Ay kafag duama nu nadungug te, Isus galangfeun, kanya nauro te, “Em Fun, fun Dabid at kasugfunanan, afanyui emi.”

³¹ Ay sanya fag ngay taw maksvn nu gsalag kafag duama laman wa garingang. Abat ngate gasalagan, kaugat yay nu guro te, “Em Fun, fun Dabid at kasugfunanan, afanyui emi.”

³² Ay Isus anragang ay nabalus kafag duama te, “Nataw ro ay fakaylatun ku fakamulun sa ayu?”

³³ Ay kafag duama nabalus Isus te, “Em Fun, fafiai em mata laman glag ami!”

³⁴ Ay Isus kafanyu kafag duama ay nated at ngay mata. Ay arodi vtv kafag duama glag wan ay nangalo wa Isus.