Mateu 19 - Fanawbuid tagsibaliwas Fakayabian

Isus at Longan sabaliwa at Naubun at Mangena

¹ Ay Isus nu ntabu wan nu gfoyung, nalo wan siginans talun Galilea ay andasug sa sik afud talun Udea sis dife Liskung Urdan.

² Ay ngayuk taw naguyan anya. Ay sanya, Isus nafafia ngay taw at ke fakasaitun.

³ Ay sik ngay taw Fariseu ankakbang sas Isus laman namaskud anya. Ginto te, “O gfaning tam faugali sik mangama nu naubun at mangena dewa snga setaw at fanlonganan?”

⁴ Ay Isus nabalus anya te, “O nunda yam natap te, sis fakasigadan, Takawat ‘nawat mangama ay mangena.’

⁵ Ay kanya nalong te, ‘Nu katanya, sik mangama gubun at mama ay at mina ay nangalo at mangena, ay kanya fag dua ansadi wan.’

⁶ Nu katanya, bunwa dua ya, sadi wan. Ay nusnga sinu Dius at nafasadi, lag e namasaruayan ya.”

⁷ Ay kafag ngay taw Fariseu nainto Isus te, “Nu katanya, wain Muisis at fagnalongun te, ‘Nu gaubunun wo am mangena, foni anya sik famatuyan te, nasaruayan wata, ay aiyani wa anya’?”

⁸ Ay Isus nabalus te, “Fakatanyaun aroro kamaogatun am ay amatanganan, ay wa katanya ebi taguna.

⁹ Ay glong kyangay ayu te, nusnga sinu at naubun at mangena, ay kafag mangena nu doma nanamatugtug, kafag mangama way tagfanugtug nu ndadwa yay sa tibak mangena.”

¹⁰ Ay Isus at ngay tagadal nalong anya te, “At faugali sabaliwa sik dadwa nu katanya way, at masine lag kadadwa ya.”

¹¹ Ay Isus nalong sat ngay tagadal te, “Bunwa fagayu taw at mafaning kafag longan, nu bunway Dius tua tagfamatangan.

¹² Saman wan sik mangama at fanlonganan at fagyudun kaylat kamubay. Tibak mangama wa gafamubayun aroro katanya wan siginan ngay nu kasalug. Ay tibak mangama wa gafamubayun aroro e naluasan anya. Ay tiba yangayk mangama wa gafamubayun aroro kesug Dius nu gfagtainan. Nusnga sinu at makatu gfaning, faningi.”

Isus Nafadante sik ngay Sisian

¹³ Ay arodi e nataban sik ngay sisian ayu sirut sas Isus, laman Isus namatayuk at daluap sa anya ay nandarangin. Ay at ngay tagadal gsalag kafag ngay taw tagtaban.

¹⁴ Ay Isus nalong te, “Fabayani wan kafag ngay sisian, lag am gsalag nu kakbang sa angku. Aroro takata kanya fag ngay sisian katap ban sas Dius at fagfagtainanan.”

¹⁵ Ay Isus nu nafatayuk wan at daluap sanya fag ngay sisian, nalo wan sanya ginan.

Sik Maramraman fag Mangama

¹⁶ Ay ginanya sik baguama nanangakbang sas Isus ay ginto te, “Takamoyung, setain manga ku fakamulun at matuyan laman e leleg ktua at yud e fakatabuan?”

¹⁷ Ay Isus nabalus anya te, “Wain am fagintoun angku sabaliwa at matuyan? Sadi way at matuyan. Nu kaylat o gleleg kabavn, faningi Dius at ngay suguan.”

¹⁸ Ay kafag baguama nainto yangay te, “Inday manga kafag ngay suguan at masine ku fagfaningun?” Ay Isus nabalus anya te, “Lag gfabul, ay lag gfanugtug, ay lag gfangkamul, ay lag kamuag nu gfatuyan sabaliwa am iba,

¹⁹ ay suyui am mama ay am mina, ay esugi am iba kaksvn nu kesug o emu.”

²⁰ Ay kafag baguama nabalus Isus te, “Nafaning kwan takatanya fagayu. Ay nataw ya ku yud nafakamulun?”

²¹ Ay Isus nabalus te, “Nu kaylat o laman di o e malong, falaoi fagayu am ramraman, ay at nagbulan foni sa sangay yud e kwa, laman e ramraman tua ban o sas banwa. Ay sanya ginan, aloi angku.”

²² Ay kafag baguama nu nadungug Isus at longan, nalo mabaluanan, aroro maksvn nu maramraman.

²³ Ay Isus nalong sat ngay tagadal te, “Matuyan nu glong au ayu te, maidap tua sik maramraman fag taw nu manangatap sas Dius at fagfagtainanan.

²⁴ Ay glong kyangay ayu te, amasakit yap sik kamelyu nu nansulun sasad fansimat ramit at sulat, sa sik maramraman fag taw nu manangatap sas Dius at fagfagtainanan.”

²⁵ Ay at ngay tagadal andulo maksvn nu nadungug Isus at longan ay nalong te, “Nu katanya, sinu ban at kumlangfe.”

²⁶ Ay Isus nadama at ngay tagadal ay glong te, “Ngay taw at fagyudun mafafakamulun, Dius mafafakamulun tua.”

²⁷ Ay Pedru nalong sas Isus te, “Ami, naubun wami fagayu em ngay ramraman laman nangalo ami emu. Ay nataw ban manga emi em fagnamulun?”

²⁸ Ay Isus nabalus anya te, “Matuyan nu glong au ayu te, Dius ban gfabagu nusnge wain, ay au, Taw at Baguama, gmalunggung au sa ku fagmalunggungan ke fagmasineun, laman namagtainan. Ginanya ban, am tagalo angku, malunggung yangay ban am sas labi duak faglunggungan kata sik ngay fun. Ay nanginsaful ban am at masine ay at mauri sas labi duak kasugfunanan Israel.

²⁹ Ay nusnga sinu at naubun at bale ay at ngay faduksay ay at mama ay at mina ay at sisian ay at daga aroro gafanud sa angku, kanya ban fag taw mul ayu yap tua at naubun, ay e leleg tua ban at yud e fakatabuan.

³⁰ Ay katsi at naguna tiba, kanya ban gaguyanan, ay at naguyanan, kanya ban gumuna.”