Mateu 15 - Fanawbuid tagsibaliwas Fakayabian

Taw Udyu at Fagfaningun at Faugali

¹ Ginanya tibak taw Fariseu ay tagfoyung Muisis at Faugali andasug siginans Erusalem ay nananginto sas Isus te,

² “Wain am ngay tagadal at fakamaboun tam mangaguyang at faugali? Aroro kanya fagayu nu nanfangon wa gfegus at daluap.”

³ Ay Isus nabalus kafag ngay taw te, “Ay am, wain ay fakamaboun Dius at suguan? Ay fagfaningun ay mangaguyang way at faugali.

⁴ Aroro ebi Dius nasugu te, ‘Suyui tua am mama ay am mina,’ ay ‘Fabuli wan nusnga sinu fag taw nu glong way at mauri sat mama ay sat mina.’

⁵ Ay dewa Dius nasugu katanya, gfoyung am te, masine way sik taw nu glong sat mama ay sat mina te, ‘Nafon kwa sas Dius ku fanggubukun ma sa ayu.’

⁶ Ay nu katanya, gfae yud wam e tungkul Dius at Longan siginan nu gfaning am ay mangaguyang at faugali.

⁷ Sik takamaningan wayam! Matuyan Isayas at foyungan ebi sabaliwa ayu te,

⁸ ‘Tuy fag ngay taw, nu gseg angku si way lang at aringang, dewa katanya at amatanganan ngayayu way siginan angku.

⁹ Nu katanya way we tungkul, dewa gseg angku, aroro at ngay foyungan siginan way ngay taw at longan.’ ”

Nataw Tagfasuya Taw

¹⁰ Ay Isus nafaful sanya fag ngay taw ay nalong te, “Dungugani ay asafuli ku longan.

¹¹ Bunwa fakonun tagfasuya taw, at longan way at mauri tagfasuya anya.”

¹² Ay Isus at ngay tagadal ankakbang ay nainto anya te, “O saful wo te, ngay taw Fariseu ankuri nu nadungug am nalong?”

¹³ Ay Isus nafaydayuanan te, “Fagayu tagtugbung nu bunway ku Mama sas banwa at natanum, e ggulad yay ban.

¹⁴ Fabayani wa anya, aroro kafag ngay taw takata way sik taw yud glag tagtabanan sik taw at yud yangay glag. Ay fagdua ro kabulsu way sasad lusung.”

¹⁵ Ay Pedru ginto sas Isus te, “Foyungi emi kanya am faydayuanan at masuad.”

¹⁶ Ay Isus nabalus anya te, “O nunda anggan am, yam e fagsafulun?

¹⁷ O nunda yam nasaful te, nusnge wain sik taw at naon kadasug sat ungdan ay gtaglayun sas alangan?

¹⁸ Tagfasuya taw siginan way at aringang, kanya tagsiginan at amatanganan.

¹⁹ Aroro tagsiginan sik taw at amatanganan kasure at mauri fag ngay algan, kata nu gfabul, ay nu gfanugtug, dewa sat ke indugan ay dewa sat yud batang e indugan, ay nu gfangkamul, ay nu kamuag, ay nu kamuagan gfatuyan sabaliwa at iba.

²⁰ Takatanya tagfasuya sik taw. Sik taw deyud nafegus at daluap gina nanfangon, bunwa kanya tagfasuya anya.”

Sik Mangena at Baguina e Mauri fag Falad

²¹ Ay abandi Isus nalo wan sanya ginan ay andasug sa sik talun munakbang sis furuan Tiru ay Sidun.

²² Ay arodi sik mangena siginans talun Kanaan andasug sanya ay maksvn nu get te, “Ku Fun, fun Dabid at kasugfunanan, afanyui angku. Aroro sik mauri fag falad maksvn nu gfaidapan ku baguina.”

²³ Ay Isus wa gbalus anya. Ay Isus at ngay tagadal ankakbang sa anya ay maksvn nu glong anya te, “Ida. Aiyani wan kafag mangena. Ankuri ami nu guro gugat si tam guyan.”

²⁴ Ay Isus gbalus te, “Ku fagindasugun sa way lang ngay taw Israel takata at nalyam fag ngay tupa.”

²⁵ Ay kafag mangena ankakbang sas Isus ay namalub ay glong te, “Ku Fun, gubuki angku.”

²⁶ Ay Isus nabalus te, “Wa masine gbul ngay sisian at fakonun ay gukas sa sangay idu.”

²⁷ Ay kafag mangena nabalus te, “Sabv ngaro, ku Fun. Dewa katanya, ngay idu kon at agbilug at nagfatongan siginan at fagfangonan.”

²⁸ Ay Isus nabalus anya te, “Fagmangena, maksvn am fagafanudun. Umfasludan am fagetun.” Ay ginanya yay, kafag mangena at baguina anfia wan.

Isus Nafafia at ke ngay Fakasaitun

²⁹ Ay Isus nalo wan sanya ginan fag talun, ay nalao sa sangaba tigyangan Lino Galilea, ay naundaud sa sik buksul ay malunggung sanya.

³⁰ Ay ngayuk taw nanangakbang sa anya, ay nataban sa anya at yud malao, ay at yud mafalelegan at take ay at bitis, ay at yud glag, ay at yud maringang, ay e tiba yay, ay nafataygilidan anya fagayu sas Isus at salubangan. Ay Isus nafafia kanya fagayu.

³¹ Ay kafag ngay taw andulo nu nalag te, at yud maringang, garingang wan, ay at yud mafalelegan at take ay at bitis anfia wan, ay at yud malo, malo wan, ay at yud glag, glag wan. Ay kafag ngay taw naseg taw Israel at Dius.

Isus Nafayafun Ufatk Libuk Mangama

³² Ay ginanya Isus nafaful at ngay tagadal sa anya ay nalong te, “Kafanyu au in fag ngay taw, aroro katsi tulu wak menit nu maful ste si angku, ay katsi we fakonun ya. Ay kwa kaylat gfauli anya fagayu ginlunusan, laman ro di karanug sat ngaba dalan.”

³³ Ay at ngay tagadal nalong anya te, “Daginan ro nu namul ami at kasakan fag fakonun, tam famafangon ro takayu nya fag ngay taw, ay ste fag talun we bale?”

³⁴ Ay Isus nainto sat ngay tagadal te, “Seyu nunda ay ba tinapay?” Ay at ngay tagadal gbalus te, “Fitu way ay wa ngayu em ba albon.”

³⁵ Ay Isus gsugu sa sangay taw laman malunggung.

³⁶ Ay Isus nagalumutan kafag fituk tinapay ay fag ngay albon ay naseg Dius, ay nalungud ay nafon sat ngay tagadal. Ay at ngay tagadal nafon sa sangay taw.

³⁷ Ay fagayu taw naon ay napsug. Ay at ngay tagadal nafaful at nagsawadan, at kayuan fituk balulang mapnu.

³⁸ Ay at nafangon, ufatk libuk mangama, saman yay ngay mangena ay at ngay sisian.

³⁹ Ay Isus nafauli wan kafag ngay taw ay arodi nasakay wa sa sik sakayan lino ay andasug sa sik furuan, at ngayan Magadan.