Mateu 1 - Fanawbuid tagsibaliwas Fakayabian

Isus at ngay Mangaguyang

¹ Katatuy Isus tam Fun at ngay mangaguyang nu gdaddagan. Kanya Dabid ay Abrayam at kasugfunanan.

² Abrayam at baguama, Isak, ay at fufu, Akub, ay at fufu tud, Uda fag duksayan.

³ Uda at ngay baguama siginans Tamar, Peres ay Sera. Peres at baguama, Esrum, ay at fufu, Aram.

⁴ Aram at baguama, Aminadab, ay at fufu, Naksun, ay at fufu tud, Salmun.

⁵ Salmun at baguama siginans Rakab, Buas, ay Buas at baguama siginans Rut, Ubed, ay at fufu, Ese.

⁶ Ese at baguama, fun Dabid, ay fun Dabid at baguama, Sulumun, siginan Uryas at fagbubayun.

⁷ Sulumun at baguama, Reubuam, ay at fufu, Abyas, ay at fufu tud, Asa.

⁸ Asa at baguama, Eusafat, ay at fufu, Uram, ay at fufu tud, Usya.

⁹ Usya at baguama, Utam, ay at fufu, Akas, ay at fufu tud, Esekyas.

¹⁰ Esekyas at baguama, Manase, ay at fufu, Amus, ay at fufu tud, Usyas.

¹¹ Usyas at ngay baguama, Ekunya fag duksayan. Ginanya, ngay taw Udyu natabanan sas talun Babilunya.

¹² Ay nu natabanan wan, katatuy at ngay kasugfunanan: Ekunya at baguama, Sealtiel, ay at fufu, Serubabel.

¹³ Serubabel at baguama, Abyud, ay at fufu, Elyakim, ay at fufu tud, Asur.

¹⁴ Asur at baguama, Saduk, ay at fufu, Akim, ay at fufu tud, Elyud.

¹⁵ Elyud at baguama, Eleasar, ay at fufu, Matan, ay at fufu tud, Akub.

¹⁶ Akub at baguama, Use, ay Use, Maria at indugan. Maria, Isus at mina. Isus at ngayan tiba te, Dius at nafili fag Fun.

¹⁷ Kayu nya at mangaguyang siginans Abrayam sitsigons Dabid, labi ufatk kasugfunanan. Ay siginans Dabid sitsigon ngay taw Israel nu gatabanan sas talun Babilunya, labi ufat yangayk kasugfunanan. Ay siginan nu gatabanan sas talun Babilunya sitsigon Dius at nafili fag Fun, labi ufat yangayk kasugfunanan.

Isus nu Kasalug

¹⁸ Katatuy Isus, Dius at nafili fag Fun nu kasalug. At mina ban Maria, Use at bubay ban. Ay gina kafag dua yud an-gamut, Maria nasaful te, gfafion wan siginan at Masine fag Falad.

¹⁹ Ay Use, Maria at indugan ban, kanya sik taw matuyan, ay wa kaylat gfaplan Maria, ay nu katanya at amatanganan gsuksuk nu gfasaruayan anya.

²⁰ Ay gina Use namatangan katanya, tam Fun at tagbarita at sadi ansure sa anya sit taginfan ay glong te, “Use, fun Dabid at kasugfunanan, lag kalimu nangadadwa sas Maria, am bubay ban, aroro at fagfafionun siginan at Masine fag Falad.

²¹ Ay kanya gfasalug ban sik munama. Fangayani ban anya te, Isus, aroro kanya at namalangfe ban at ngay taw siginan at ngay asalanan.”

²² Ay ansure wan katanya laman gfafasludan tam Fun at longan ebi ataw siginan at taglong at sadi te,

²³ “Sik baguina ban gfafion ay namasalug sik munama. Ay e gfangayan ban anya te, Emanuel.” (At masuad te, Dius si antam.)

²⁴ Ay Use nu nfulo wan, kanya nafaning tam Fun at tagbarita at longan, ay andadwa wan.

²⁵ Ay Use ya gfataladan Maria yakmay ansalug at fagfafionun fag munama. Ay nu nsalug wan, Use nafangayan anya te, Isus.