Markus 3 - Fanawbuid tagsibaliwas Fakayabian

Isus Nafafia sik Mangama at Yud Mafalelegan at Daluap

¹ Isus gdog yay nasakbo sas taw Udyu at bale fakafulan. Ay sanya e sik taw at yud mafalelegan at daluap.

² Ay tibak taw gulit, laman sumaful te, o Isus ro gfafia gina Famiangalay fag Menit, aroro at algan kaylat namoyung sa tibak taw te, Isus e asalanan.

³ Ay Isus nalong sat yud mafalelegan at daluap te, “Gewan, stei sfagunan.”

⁴ Ay Isus glong sanya fag ngay taw te, “Inday tagfaning tam faugali sabaliwas Famiangalay fag Menit: o nu gfakamulun at masine, ay mannga nu gfakamulun at mauri; o nu gfalangfe sik taw ay mannga nu gfabul sik taw?” Ay kanya fag ngay taw wa gbalus.

⁵ Ay Isus nu gdama kafag ngay taw kadotama ay kabalu, aroro kanya fag ngay taw kamaogatun at amatanganan. Ay Isus nalong sat yud mafalelegan at daluap te, “Falugdei am daluap.” Ay kafag taw nafalugde, ay at daluap anfia wan.

⁶ Ay ngay taw Fariseu nalo ay namakamatoan sas Erudes at ngay taw sabaliwa nu namabul ban Isus.

Isus Kamoyung sas Ngayuk Taw sis Tigyangan Lino

⁷ Ay Isus anggan at ngay tagadal nalao sas tigyangan lino. Ay ngayuk taw siginans talun Galilea tagalo.

⁸ Ay anggan ngay taw siginans talun Udea, ay furuan Erusalem, ay talun Idumea, ay dife Liskung Urdan, ay tagligung Tiru ay Sidun fag ngay furuan galo yangay. Ngayuk taw at nanangakbang sas Isus nu nadungug at fakamulun.

⁹ Ay Isus nasugu at ngay tagadal laman gfalganan sik sakayan lino, at fagsakayan, ngay taw ro nu namasidsikfitan way anya.

¹⁰ At fagnasuguun katanya aroro nafafia ngayuk taw, nu katanya, fagayu at ke fakasaitun gtudtuludan laman nantayuk anya.

¹¹ Ay at mauri fag ngay falad nu nalag Isus, namalub sit daga salubangan ay guro te, “O wan Dius at Baguama.”

¹² Ay maksvn Isus nu gsalag sanya fag ngay mauri fag falad laman di kamarita sabaliwa anya.

Isus Nafili at Labi Duak Nasugu

¹³ Isus naundaud sa sik buksul ay nafaful sa anya at fakaylatun gfili, ay kanya fagayu nanangakbang sa anya.

¹⁴ Ay Isus nafili labi dua, at nangalo ban anya ay at fagsuguun laman ban at nanfamoyung sa sangay taw. Isus nafangayan anya fagayu te, at ngay nasugu.

¹⁵ Ay Isus nafon sa anya fagayu fagmabalyananun gaiyan mauri fag ngay falad siginans taw.

¹⁶ Tuy Isus at ngay nafili: Simun, Isus at nafangayan yangay te, Pedru.

¹⁷ Ay Santiagu ay anggan at arian Uan, Sebedeu at baguama fagdua. Isus nafangayan yangay te, Buanerges, at masuad, “Kata sik Lingsi.”

¹⁸ Ay Isus nafili yangay Andres ay Felipe ay Bartulume ay Mateu ay Tumas ay Santiagu, Alfeu at baguama, ay Tadeu, ay Simun Maseganama,

¹⁹ ay Udas Iskariute, at namoyung ban Isus sat mauri fag ngay taw.

Isus ay Satanas

²⁰ Ay Isus nu nfoli sat fagtaglayunan fag bale, sik ngay taw gdog yay anful. Nu katanya, Isus ay at ngay tagadal wa karan ya gfangon.

²¹ Ay Isus at ngay kalongan nu nasaful takatanya, nalao laman nantaban anya, aroro kafag ngay taw glong te, “Kanya nalyam at amatanganan.”

²² Ay ngay tagfoyung Muisis at Faugali siginans Erusalem glong te, “Lango at Fun antayuk sas Isus. At fagmabalyananun gaiyan mauri fag ngay falad siginan way mauri fag ngay falad at fun.”

²³ Ay Isus nafaful sa anya kanya fag ngay taw ay nafaydayuanan te, “Tain ro Satanas nu gaiyan at sadili?

²⁴ Sik fun at fagfagtainanan fag ngay taw nu gawayan way gugat, abandi kalyam wan kanya fag fagfagtainanan.

²⁵ Ay katanya yangay at kumfasludan sa sik talafuan tagawayan gugat.

²⁶ Ay Satanas nu gfawayan way at sadili, ay at ngay taw nu gawayan yangay, wa ban gtaglayun at fagmafunanun, ay kanya wan at fakatabuan.

²⁷ “Sik taw wa masakbo sa sik maseganama at bale laman nanfangkamul at ramraman nu dway nasiuk kafag taw at maseganama. Ay kanya nu nasiuk tua, mafangkamul wan sanya fag bale at ngay ramraman.

²⁸ “Matuyan nu glong au ayu te, fagayu taw at asalanan Dius gfalyam yay, ay nusnga sinu at nalong mauri sabaliwa Dius gfalyam yangay.

²⁹ Ay dewa katanya, nusnga sinu at nalong mauri sabaliwa at Masine fag Falad, Dius wa gfalyam ya. Kafag taw e asalanan kabavn.”

³⁰ Isus at fagnalongun katanya aroro tibak taw nalong te, “At mauri fag falad antayuk sas Isus.”

Isus at Mina ay at ngay Faduksay

³¹ Isus at mina ay at ngay faduksay andasug. Ay gina malindug sis lod bale, nafauro Isus.

³² Ay ngayuk taw malunggung maligung sis Isus, ay kanya fagayu glong sa anya te, “Isna, am mina ay am ngay faduksay sis lod bale, gyalagun emu.”

³³ Ay Isus glong te, “Sinu nunda ku mina ay ku ngay faduksay?”

³⁴ Ay Isus nalingaman tagligung anya, ay glong te, “In ku mina ay ku ngay faduksay.

³⁵ Nusnga sinu tagfaning Dius at fakaylatun, kanya tua ku ngay faduksay ay ku mina.”