Lukas 1 - Fanawbuid tagsibaliwas Fakayabian

Lukas at Famasigad fag Longan

¹ Fagtainan Teufilu, ngayuk taw nariruk sa baliwa at kinfasludan wan si antam.

² Kanya fagayu nariruk kata em nadungug fag ngay fansulitan siginan at nalag at kinfasludan ebi taguna ay at nafoyung Dius at Longan.

³ Ay nu nadal au fia at kinfasludan takatanya fagayu, naylat kyangay griruk laman gfasaful sa emu. Aroro, glugo wan nu gadal au tuy fagayu siginans fakasigadan.

⁴ Nariruk au sa emu, laman sumaful o te, matuyan at ngay foyungan sa emu.

Nu Gfoyung sabaliwa Uan Tagfasurung nu Kasalug Ban

⁵ Gina Erudes gfunan sis talun Udea, e sik tagfon fanggalangun at ngayan Sakaryas. Kanya kataip yangay sa sik ngay tagfon fanggalangun tagsis Abyas fag gaban. Sakaryas at bubay, Elisabet, kanya siginan yangay Arun at kasugfunanan.

⁶ Kafag dadwa matuyan tua sas Dius at daga salubangan, ay gfaning tam Fun at ngay longan ay at ngay faugali.

⁷ Ay kafag dadwa we sisian, aroro Elisabet garanas, ay anggan dadwa gsud wan mafagtainan.

⁸ Ay andasug at menit, Sakaryas at gaban at namon fanggalangun sas Dius at daga salubangan.

⁹ Kata at faugali, kafag ngay tagfon fanggalangun nafafidfilian laman ginsaful te, sinu ban at nansakbo sa tam Fun at bale laman nangirug famaebebanglu. Ay at nafili, Sakaryas.

¹⁰ Ay gina Sakaryas girug famaebebanglu, ngay taw gdarangin sis day bale.

¹¹ Ay ginanya, tam Fun at tagbarita at sadi ansure sas Sakaryas. Ay kanya malindug sis day fagirugan famaebebanglu, sis fasiunan baliwa.

¹² Ay Sakaryas anlipsik ay maksvn nu kalimu.

¹³ Ay kafag tagbarita nalong te, “Sakaryas, lag o kalimu, aroro Dius nadungug am darangin. Am bubay Elisabet gfasalug ban sik munama, ay gfangayan ban o anya te, Uan.

¹⁴ Ay gina ban ansalug, guseganan o ay kaylat anya, ay ngayu yangay ban ktaw taguseganan.

¹⁵ Aroro am baguama ban sik mabalyanan sa tam Fun at daga salubangan, ay kanya ban wa ginum fanlangu, ay siginan yay nu yud ansalug, at Masine fag Falad siwa anya.

¹⁶ Ay kanya ban namafoli ngayuk taw Israel sat Fun Dius,

¹⁷ ay kanya ban gguna tam Fun, laman namafalganan ngay taw gina tam Fun kadasug. Ay siginan at Masine fag Falad at gubuk ay at fagmabalyananun, kanya ban namakamulun, kata Elyas at nafakamulun ebi. Kanya ban namoyung ngay fagtainan, laman kesug tua at ngay sisian, ay namae fagsafulun ngay takamabo, laman umsik matuyan. Nu katanya, kanya namalganan sik ngay taw laman sa tam Fun.”

¹⁸ Ay Sakaryas nalong sa kafag tagbarita te, “Mafufuama kwan, ay anggan ku bubay mafufuina wan. Tain ban nu sumaful au te, umfasludan am longan?”

¹⁹ Ay tagbarita nabalus Sakaryas te, “Au wan Gabriel, kabavn gfakamulun au sis Dius at daga salubangan. Kanya nasugu angku laman namadungug au sa emu tuy fag barita at masine.

²⁰ Ay aroro wo gafanud, wa ban o maringang yakmay ban anfasludan ku nalong sa emu. Aroro matuyan, umfasludan waban fia nu ndasug tam Dius at nafalganan fag buknga.”

²¹ Ay kafag ngay taw kaduge gfanya Sakaryas, kanya fagayu kadulo te, “Wain manga at fagngadugeun nu masakboan sis Dius at bale?”

²² Sakaryas nu naduksun wan, wa maringang ya, gyafe way lang at take. Nu katanya, kanya fagayu namatangan te, tam Dius nafalag sa anya sik taginfan. Ay siginan ginanya, Sakaryas wa maringang ya.

²³ Ay nu ntabu wan nu gfakamulun, Sakaryas noli wan.

²⁴ Abandi, Elisabet gfafion wan, ay kaduge limak magdanun, wa batang gduksun siginan sad bale.

²⁵ Ay Elisabet nalong te, “Tam Fun matuyan tua. Kanya nafalyam tua ku fakaplaun sa sangay taw.”

Nu Gfoyung Isus nu Kasalug ban

²⁶ Ay gina sis faunumk magdanun Elisabet nu gfafion, Dius nasugu at tagbarita, Gabriel, sas Nasaret, sik furuan sis talun Galilea.

²⁷ Sanya sik baguina at yud batang e nasa anya. Kanya fag baguina, Use at algan ban at bubay, at ngayan Maria. Use, Dabid at kasugfunanan.

²⁸ Ay kafag tagbarita nu ndasug, nalong sas Maria te, “Useganani, aroro tam Fun ggubuk tua emu ay si yangay emu.”

²⁹ Ay Maria nu nadungug, gafanawa, ay gamatangan te, “Nataw manga at longan angku at masuad?”

³⁰ Ay kafag tagbarita nalong te, “Maria, lag o kalimu, aroro Dius kesug emu.

³¹ Dungugani. Gfafion ban o, ay gfasalug ban o sik munama, ay gfangayan ban o anya te, Isus.

³² Kanya ban mabalyanan ay gfangayan ban te, Tiba Tungud at Baguama. Ay Dius tam Fun namon ban anya at mangaguyang Dabid at fagmafunanun.

³³ Ay kanya ban gfagtainan Akub at ngay kasugfunanan, ay wa ban e fakatabuan nu gfagtainan.”

³⁴ Ay Maria nalong sanya fag tagbarita te, “Tain ro nu kafasludan, ay kye indugan?”

³⁵ Ay tagbarita nabalus te, “At Masine fag Falad umdasug ban sa emu, ay anggan Tiba Tungud at fagmabalyananun umtayuk ban sa emu, laman ban am fagfasalugun fag sisian yud e malong gfangayan ban anya te, Dius at Baguama.

³⁶ Ay katanya yangay anggan am kalongan Elisabet, dewa mafufuina wan, katsi gfafion. Fagayu taw saful te, sia sik tagaranas way. Ay katsi nu gfafion unum wak magdanun,

³⁷ aroro Dius mafafakamulun nusnge wain.”

³⁸ Ay Maria nalong te, “Tam Fun au at fagsuguan. Umfasludan ban nangus am longan sa angku.” Ay tagbarita nalao wan.

Maria Nansibo Elisabet

³⁹ Ginanya fag ngay menit, Maria nafalganan ay gabanganan glao sa sik furuan sis talun Udea at fagagbilugun fag ngay buksul, nu inda Sakaryas at fagbanwanan.

⁴⁰ Ay kanya nu ndasug sanya fag furuan, nasakbo sas Sakaryas at bale laman namakamatoan Elisabet.

⁴¹ Ay Elisabet nu nadungug Maria at aringang, at fafionan maksvn nu gfanleleg, ay at Masine fag Falad antayuk sas Elisabet.

⁴² Ay Elisabet maksvn nu glong te, “Dius nu ggubuk emu gtungud tua tibak mangena. Ay Dius nagubuk yangay anggan am fagfafionun.

⁴³ Sinu au, laman ku Fun at mina nangadasug sa angku?

⁴⁴ Nu nadungug au emu, ku fafionan maksvn nu gfanleleg aroro guseganan.

⁴⁵ Ay mauseganan tuo, aroro gafanud tuo te, umfasludan ban tam Fun at longan sa emu.”

Maria at Alubad

⁴⁶ Maria nalong te, “Gseg au tam Fun sas fagdaul ku basad taw.

⁴⁷ Ay ku falad guseganan sas Dius, ku Tagfalangfe.

⁴⁸ Aroro Dius namatang tua angku at mafalingun fag fagsuguan. Dungugani, siginan katsi, fagayu taw at sugfun gfangayan angku te, sik mauseganan.

⁴⁹ Aroro at Mabalyanan fag Dius at nafakamulun sa angku maksvn nu madulo. At ngayan we malong.

⁵⁰ Ay kanya kafanyu fagayu kasugfunanan tagseg anya.

⁵¹ Dius nafalag at mabalyanan fag fakamulun. Ay kanya naiyan wan fagayu takamatungudun sat amatanganan.

⁵² Dius nafababa ngay funan siginan at fagmafunanun, ay nafabat ngay taw tagafalingunan.

⁵³ Dius nafon at masine sa takalunus, laman kapsug. Ay kanya naiyan at maramraman, yud e buba.

⁵⁴ Dius nagubuk at fagsuguan fag ngay taw Israel, laman namafasludan at nafatuyanan te, ‘Kafanyu au anya fagayu kabavn ban.’

⁵⁵ Katanya at longan sa tam ngay mangaguyang, sas Abrayam ay sat ngay kasugfunanan.”

⁵⁶ Maria nu gbanwan sis Elisabet, malgau tuluk magdanun, ay sanya ginan, noli wan.

Uan Tagfasurung nu Kasalug

⁵⁷ Andasug wan at buknga Elisabet nu gfasalug, ay kanya nafasalug sik munama.

⁵⁸ Elisabet at ngay fasabale, anggan at ngay kalongan, nadungug te, tam Fun maksvn nu ggubuk Elisabet. Ay kanya fagayu gfasfuan Elisabet guseganan.

⁵⁹ Ay nu siwas fawaluk menit siginan kafag ngenge nu kasalug, at ngay fasabale ay at ngay kalongan andasug laman namae fakatoglagan kafag ngenge kata ngay taw Udyu at ugali. Ay kanya fagayu nafangayan kafag ngenge te, Sakaryas, kata at mama at ngayan.

⁶⁰ Ay kafag ngenge at mina nasalag te, “Duan! Uan way at ngayan.”

⁶¹ Tiba nalong anya te, “Wam e ngay kalongan at ke ngayan takatanya.”

⁶² Ay kanya fagayu nayafe sat mama laman sumaful at fangayan sat ngenge.

⁶³ Ay Sakaryas get sik fagrirukan, ay nariruk te, “At ngayan Uan.” Ay sanya fag ngay taw andulo.

⁶⁴ Ginanya yay, Sakaryas maringang wan, ay gfauseganan Dius.

⁶⁵ Fagayu at fasabale andulo maksvn. Ay fagayu taw sis talun buid Udea gfoyung at nadungug.

⁶⁶ Ay fagayu at nadungug gamatangan maksvn ay ginto te, “Nataw ban manga kafag sisian at fakamulun nu nfagtainan? Aroro matuyan, tam Fun at fagmabalyananun si anya.”

Sakaryas Gseg Dius.

⁶⁷ At Masine fag Falad antayuk sas Sakaryas, Uan at mama, ay kanya gfoyung te,

⁶⁸ “Segi tam Fun, taw Israel at Dius, aroro kanya andasug laman namalangfe at ngay taw.

⁶⁹ Kanya nafadasug sa antam sik mabalyanan fag tagfalangfe siginan at fagsuguan Dabid at kasugfunanan,

⁷⁰ kata Dius at fatuyanan ebi at nalong sat ngay taglong.

⁷¹ Ay Dius namalangfe antam siginan tam ngay fawayan ay siginan fagayu takadotama antam.

⁷² Ay Dius nafalag at fakafanyun at nafatuyanan sa tam ngay mangaguyang, ay namafasludan ban at yud e malong fag nasadian,

⁷³ at nafatuyanan sa tam mangaguyang Abrayam.

⁷⁴ Kanya namalangfe antam siginan tam ngay fawayan, laman nu gfaning tam anya wa tam e fakalimuun ya,

⁷⁵ ay laman masine tua ay matuyan tua tam fakamulun sis Dius at daga salubangan, kaduge tam gleleg.

⁷⁶ Ay o, ku munama, gfangayan ban emu te, Tiba Tungud fag Dius at Taglong. Aroro gumuna ban o tam Fun, laman ban namasine o at dalan,

⁷⁷ ay laman namoyung ban o sas Dius at ngay taw te, ‘Dius wan tagfalangfe ay tagfalyam ay ngay asalanan,’

⁷⁸ aroro tam Dius mafangafanyu tua ay mafangesug sa antam, ay namadasug sa antam sik tagfalangfe, kata menit nu bagu kasure,

⁷⁹ laman nandamlag ngay taw tagsi yay sad dulum, ay takalimu sas fakabulun, ay laman namoyung ban antam, laman tam darafa lumao sat manabayan fag dalan.”

⁸⁰ Ay kafag sisian an-gurang wan ay anbitsug at amatanganan, ay kanya nanamanwan sas talun at yud e taw yakmay namoyung wan sa sangay taw Israel.