Lebitiku 8 - Fanawbuid tagsibaliwas Fakayabian

Nu Gfadante Arun Talamean

¹ Yawi nalong sas Muisis te,

^2-3 “Tabani Arun talamean sa ku sakbawan bale, ay fauroi yangay sanya fagayu taw Israel. Ay bubai yangay sanya at mafilian fag lanbung laman sas Arun talamean, ay langis, ay sik tama baka laman famalyam asalanan fag fanggalangun, ay duak riangan tupa ay sik bang tinapay at yud e famabia.”

⁴ Ay Muisis nafaning Yawi at suguan fagayu, ay ngay taw Israel anful sis Yawi at sakbawan bale.

⁵ Ay ngay taw Israel nu nful wan, Muisis nalong sa anya fagayu te, “Namakamulun au kata Yawi at suguan angku.”

⁶ Nu katanya, Muisis natabanan Arun talamean sa sangay taw at wabilug, ay nafaigus.

⁷ Sanya ginan, kanya nafasulun sas Arun lanbung tagtayuk at bilug ay anggan famutus fagwan. Ay kanya nafasulun yangay tangaba fag lanbung, ay anggan at mafamilian fia fag lanbung famalanib at ke famutus at masine fia nu mawatan fag famutus fagwan.

⁸ Ay kanya nafasulun yangay sik lanbung at ke fagsuadan tagsis dubdub ay nasuad sanya Urim ay Tumim.

⁹ Ay sanya ginan, nafasangboan, ay nafoli sanya fagrirukan mawatan siginans gintu, sik fagtoglagan te, mafasamanan laman sas Yawi. Muisis nafakamulun takatanya fagayu kata Yawi at suguan anya.

¹⁰ Sanya ginan, Muisis nabul famadante fag langis ay naugwag sas bale ramit ay sas fagayu fagagbilugun tagsisad bale, ay gfadante kanya fagayu laman sas Yawi.

¹¹ Muisis nafaramsig langis fitu ginan sas fagirugan fanggalangun ay fagayu fagagbilugun tagsanya, anggan ngay fagsuadan mamam ay at fagfatungkudan. Muisis nafakamulun takatanya laman sik fanggalangun sas Yawi.

¹² Sanya ginan, kanya naugwag langis sas Arun at alfuyu laman famatoglag te, sik nafili laman sas Yawi.

¹³ Ay Muisis nataban yangay Arun at ngay baguama sa sangay taw at wabilug, ay nafasulun yangay at ngay lanbung tagtayuk at bilug, ay sangbo ay famutus fagwan. Muisis nafakamulun fagayu kata Yawi at suguan sa anya.

¹⁴ Sanya ginan, Muisis nasugu te, “Tabanani sa anya baka tama fanggalangun famalyam asalanan.” Ay Arun talamean namasa kafag baka at tungud alfuyu at ngay daluap.

¹⁵ Ay Muisis nafabul kafag baka tama ay nabul sik alay at taguk. Kanya nafasurung at sumyu sas taguk ay nararus sa sangay sunge tagsis fagirugan at ngay fugungan laman umsine. Ay naugwag at sawad sas daga fagirugan. Takatanya fag balyawvtan, Muisis nafadante ngay fagirugan laman sas Yawi, ay laman sik masine fag fagirugan ngay fanggalangun laman famalyam asalanan.

¹⁶ Muisis nabul kafag baka at taba tagsisad ungdan, ay tagbia fag afud dangdangun, ay at amuslun fagdua ay anggan at taba, ay nairug sas fagirugan.

¹⁷ Ay kanya nairug at sawad fag ngay afud sas day fagmafulan; at balat, at faknul, ay at bitua. Muisis nafakamulun takatanya fagayu kata Yawi at suguan anya.

¹⁸ Ay Muisis nafon yangay sik tupa riangan laman sik fagirugun fag fanggalangun. Ay Arun talamean nafoli at ngay daluap sas tupa at tungud alfuyu.

¹⁹ Ay Muisis nafilas kafag tupa ay nafaramsig at taguk sas fagirugan at ligung.

^20-21 Kanya nafilas kafag tupa ay nafegus fagayu tagsisad basad ungdan ay anggan at ngay si, ay nairug sas fagirugan gasfuan at alfuyu ay at ngay taba, laman sik fagirugun fag fanggalangun. Ay at mabebanglu fag ayuk siginans fagirugan, sik famauseganan Yawi. Muisis nafakamulun takatanya fagayu kata Yawi at suguan anya.

²² Sanya ginan, Muisis nadog yay nasugu te, “Tabanani sa anya sadi yak tama tupa laman sik fanggalangun sa nu gfadante.” Ay Arun talamean nadog yay nafoli at ngay daluap sa kafag fanggalangun at tungud alfuyu.

²³ Sanya ginan, Muisis nafabul kafag tupa, ay nabul sik alay at taguk ay nararus sas Arun at talinga tagsis siun baliwa, ay sat sumyu tama fag ufat.

²⁴ Ay Muisis nataban yangay Arun at ngay baguama sas wabilug fagmafulan, ay nararus yangay taguk sat ngay talinga tagsit siun baliwa, anggan sat ngay sumyu tama tagsit daluap ay sit darafa. Ay at sawad fag taguk nafaramsig sas fagirugan at ligung.

²⁵ Kanya nabul kafag fanggalangun at ngay taba, tagsit faknul, ay tagsit basad ungdan, ay at dangdangun, ay at amuslun fagdua ay at madafut sanya fag taba, ay anggan at siun fag balangbang.

^26-27 Sanya ginan, Muisis nabul yangay siginans bang tinapay at yud e famabia laman fanggalangun sas Yawi; sik tinapay at madamvl ay sik tinapay at ke famasuglat langis, ay sik tinapay at mayangfis. Muisis nafon sas Arun talamean kanya fagayu, anggan tupa at ngay taba ay at siun fag balangbang. Ay talamean nafabat kanya fagayu sis Yawi at daga salubangan laman sik fanggalangun.

²⁸ Sanya ginan, Muisis nabul kanya fagayu siginans talamean ay nairug sas fagirugan gasfuan fagirugun fag fanggalangun. Kanya at fanggalangun laman gfadante Arun talamean. Ay at mabebanglu fag ayuk tagsiginan sad afuy nafauseganan Yawi.

²⁹ Muisis nabul yangay kafag tupa at dubdub ay nafabat sis Yawi at daga salubangan laman sik fagfabatun fag fanggalangun. Kanya anya at afud siginans ngay fanggalangun fag tupa. Muisis nafakamulun takatanya fagayu kata Yawi at suguan anya.

³⁰ Ay Muisis nabul sik langis ay taguk siginans fagirugan ay nafaramsig sas Arun talamean, anggan sat ngay lanbung. Katanya nu gfadante talamean ay anggan at ngay lanbung laman sas Yawi.

³¹ Muisis nalong sas Arun talamean te, “Bubai ay fatamai ngay fagbaugun at yamas sas Yawi at sakbawan bale, ay kata ku longan ayu, oni kanya fag yamas gasfuan ngay fanggalangun fag ngay tinapay at masuadan sis bang laman sik fanggalangun gina gfadante.

³² Ay at sawad fag yamas ay fag tinapay, irugi wan.

³³ Lag am glao siginans Yawi at sakbawan bale kaduge fituk menit, yakmay antabu nu gfadante ayu.

³⁴ Katatuy Yawi at suguan sa antam tam fakamulun katsi fag buknga laman famalyam ay ngay asalanan laman sik masine am sa anya.

³⁵ Banwani ste, menit ay yabi, kaduge fituk menit, ay fakamuluni Yawi at suguan sa ayu laman diam kabul, aroro katanya wan Yawi at suguan angku ay fakamulun.”

³⁶ Nu katanya, Arun talamean nafaning Yawi at ngay suguan siginans Muisis.