Lebitiku 6 - Fanawbuid tagsibaliwas Fakayabian

¹ Ay Yawi nalong yay fia sas Muisis te,

² “Sik taw nu dway nafaning at faugali, siginan nu gfandaya ay nu gfangkamul tibak taw at ngay nafatigwanan sa anya,

³ ay nu nafamuag way te, we nabul sik fagagbilugun at nalyam, ay nu gfatuyanan yangay kamuag te, we nafakamulun takatanya fag ngay asalanan,

⁴ ay arodi ntuyan te, anud kanya nafakamulun takatanya, masine kanya nu gfafoli at ngay nafangkamul, ay at nafandayan nabul ay anggan nusnga setaw at nasuksuk,

⁵ ay at nafamuagan te, we si anya at nalyam fag fagagbilugun. Masine kanya nu gfafoli at ngay nabul sa sangay taginsaful, ay nu gfon yangay fia duak safuluk afud nu seyu at nabul fag ngay fagagbilugun nu kabayad, nu gfon fasfuani gina kafag taw gfon famalyam asalanan fag fanggalangun.

⁶ Kanya foni yap fia sa tagfon fanggalangun sik riangan tupa at yud e malong, laman at fanggalangun sas Yawi, famalyam at asalanan; ay mannga foni salapi nu sefanud famalyam asalanan fag fanggalangun nu kabayad.

⁷ Tagfon fanggalangun nu nafakamulun tua takatanya, Yawi gfalyam kanya fag taw at ngay asalanan.”

Fagirugun fag Fanggalangun

^8-9 Yawi nasugu Muisis laman namoyung sas Arun talamean tuy fag ngay faugali sabaliwa nu gfon fagirugun fag fanggalangun: Masine kafag fanggalangun nu sis fagirugan fagngabak yabi ay faigangi way gugat kadugenya.

¹⁰ Balabag di, kafag tagfon fanggalangun gsulun at mafilian fag lanbung at mawatan siginan at masine fag ramit: taguna at lanbung tagtayuk fia at bilug, anggan at lanbung aba. Sanya ginan, kanya gbul kafag fanggalangun at nagdafugan ay namoli sas day fagirugan.

¹¹ Sanya ginan, kanya nantubus yay at lanbung, ay namuba kanya fag nagdafugan sas day fagmafulan.

¹² Ay lag gfabayan afuy nu karabung sis fagirugan fanggalangun. Galay balabag, ngay tagfon fanggalangun nantungui tua gugat famaygang, ay folii sas tungud famaygang ngay fanggalangun ay anggan ngay taba siginans fanggalangun laman sas fagmanabayanun.

¹³ Faygangi tua gugat sis fagirugan fanggalangun ay lag gfabayan nu karabung.

Famauseganan Yawi fag Fanggalangun

¹⁴ Katatuy ngay faugali sabaliwa famauseganan fag fanggalangun: Arun at ngay kasugfunanan fag ngay tagfon fanggalangun at namuba kafag ngay fanggalangun sas Yawi, sa salubangan fagirugan.

¹⁵ Ay tagfon fanggalangun gbul sik galumut kafag fangawat tinapay at mafasuglatan langis, ay anggan famaebebanglu at mafasuglatan fangawat tinapay, ay nangirug sas fagirugan kafag fangawat tinapay magamut at mabebanglu. Ay kafag fanggalangun at ayuk at mabebanglu sik famauseganan Yawi.

^16-17 Ay at sawad fag fangawat tinapay namatama laman sa sangay tagfon fanggalangun. Dewa katanya, wa masine gfasuglat famabia tinapay gina gfatama fanggalangun fag fangawat tinapay laman sa sangay tagfon fanggalangun, ay kanya fag ngay tagfon fanggalangun nangon kafag tinapay sis Yawi at bale at basad alad. Yawi nafon kafag fangawat tinapay sa sangay tagfon fanggalangun laman sik mafilian fag afud fanggalangun. Fagayu famauseganan Yawi fag fanggalangun, kanya sik yud yangay e malong kata tibak fanggalangun.

¹⁸ Arun at kasugfunanan fag ngay mangama anggan sat fadogan fag ngay kasugfunanan at masine kon kafag fakonun, aroro kanya sik nafasaman fag afud fanggalangun, famauseganan Yawi. Nusnga sinu at nanted kanya fag fanggalangun at yud tua e malong.

¹⁹ Katatuy Yawi at foyungan sas Muisis,

²⁰ sabaliwa fanggalangun Arun at fagnamonun sas Yawi, gina e gfili anya laman sik fun tagfon fanggalangun, ay katanya yangay ban at fakamulun sat kasugfunanan tagungbus anya. Ay kanya gfon duak fabudbungguan at masine fag fangawat tinapay. Ay kanya fag fanggalangun famauseganan Yawi, fakamuluni ban katanya kabavn. Kanya fag fanggalangun gafud sas dua, sik afud nu girug sbalabag ay sik afud sad yabi.

²¹ Kafag fangawat tinapay gfasuglat sas langis ay namatama sas awali, ay nu ntama wan ramyuki kanya fag tinapay laman fanggalangun famauseganan Yawi. Ay kanya fag fanggalangun at anus tagsiginans fagirugan, sik famauseganan Yawi.

²² Irugi kanya fag ngay fanggalangun laman sas Yawi. Fakamuluni takatanya fag faugali kabavn ban. Katanya yangay ban at fakamulun sas Arun at kasugfunanan at nangungbus ban anya laman sik fun tagfon fanggalangun.

²³ Ngay tagfon fanggalangun at famauseganan Yawi fag fanggalangun, irugi way, ay wa masine kon.

Famalyam Asalanan fag Fanggalangun

²⁴ Yawi gdog yay nasugu Muisis

²⁵ laman namoyung sas Arun ay sat ngay baguama sik ngay faugali te, Sik fanggalangun famalyam asalanan, masine nu gfabul sis Yawi at daga salubangan sis fagfabulan ngay fagirugun fag ngay fanggalangun. Kanya fag fanggalangun sik mafilian fia.

²⁶ Nusnga sinu fag tagfon fanggalangun at nangirug kafag fanggalangun, masine nu kon yangay ay nu nangon sis Yawi at bale at basad alad.

²⁷ At nanted kafag fanggalangun at matuyan tua fag taw. Ay at lanbung nu natagukun way bakbaki sas Yawi at bale at basad alad.

²⁸ Ay fagfatamaan fanggalangun fag tikung rufai wan. Dewa katanya, at fagfatamaan nu sik bisu tua, masine nu glisgis ay nu gfafegusun fia.

²⁹ Ngay tagfon fanggalangun at ngay baguama, masine way kon kafag ngay fanggalangun. Kanya at mafasamanan fag fanggalangun.

³⁰ Dewa katanya, nu nabuba way kanya fag fanggalangun at taguk sas Mafasamanan fag Suluk sis Yawi at bale laman famalyam asalanan, kanya fagayu wa masine kon kafag fanggalangun, irugi way sas fagirugan.