Lebitiku 25 - Fanawbuid tagsibaliwas Fakayabian

Nu yud Gtanum fag Banwa

¹ Muisis gina sis Buksul Sinay, Yawi nasugu anya

² laman nanlong sa sangay taw Israel te, “Gina ban am andasug sa ku nafon ayu fag talun laman ay fagbanwanan, lag ban am gfakamulun nusnga setaw sa ay ngay gamasun galay fafituk banwa laman famauseganan angku.

^3-4 Kaduge unumk banwa masine am gtanum ay ggutlu. Ay sis fafituk banwa, lag yap gtanum sa ay ngay gamasun ay lag yangay glifung ay ngay wat ubas at ngay sanga laman gsanga tua ay grawvg.

⁵ Ay lag ggutlu ya ay yud natanum at ngay rawvg, ay lag yangay gbul at natugbung mandi fag wat ubas at rawvg.

⁶ Dewa katanya, ginanya fag banwa, masine wayam gbul kanya fag ngay rawvg laman e fakonun tuam, anggan ay ngay fagsuguan, ay ngay tagfakamulun, ay ngay taw tagsiginans tibak talun tagbanwan si ayu,

⁷ ay laman e fakonun yangay ay ngay fagbaugun, ay anggan ngay mangilafang tagsi ay talun.

Nu Gfalfas ngay Fagsuguan ay nu Gfafoli fag Banwa

^8-9 “Galay sis faufatk safulu e siamk banwa, sis fasafuluk menit ay sis fafituk magdanun, nu gfafoli nusnga setaw, ginanya fawangi ngay budyung sas fagdaul ay talun.

¹⁰ Ay sis falimak safuluk banwa, tuyani te, at nafili fag banwa, aroro ginanya nu gfalfas ngay fagsuguan laman kanya fagayu umfoli ban sat ngay kalongan. Ay ginanya yangay nu gfafoli at nafaebayad fag ngay gamasun sat ngay agbilug.

^11-12 Ginanya fag banwa, lag gtanum nusnga setaw sa ay ngay gamasun ay lag yangay ggutlu ay gfungsu ay yud natanum at ngay rawvg, dewa katanya, masine way am gbul kanya fag ngay rawvg laman e fakonun tuam. Aroro kanya fag banwa at mafilian laman sa ayu.

¹³ “Ginanya yangay fag banwa, fafolii wan sa tagbilug at nafalao sa ayu at ngay fagagbilugun.

¹⁴ Nu katanya, nu namalao wayam ay daga ay mannga namayad ay kaiban at daga, lag am kamalingun.

¹⁵ Sik gamasun nu kabayad fasudsudani nu seyuk banwa at fananumun nu grawvg sitsigon nu gfalfas ay nu gfafoli fag banwa.

¹⁶ Nu dyay ndasug nu gfalfas ay nu gfafoli fag banwa, famuti yap sirut at famayad gamasun, dewa katanya, nu dway ngaduge ya at buknga buini way at famayad. Aroro ay fagbayadun bunwa kafag gamasun nu bunway ngay tanum way at ngay rawvg.

¹⁷ Lag gdaya ay iba, abat ngate, alimui tua angku, aroro au wan ay Dius Yawi.

^18-19 “Faningi tua ku ngay faugali ay ku ngay suguan sa ayu laman ban mabayan tua nu gbanwan am sa ay fagnamanwanan fag talun, ay di ban am gayudan ay ngay fakonun, aroro ngayu ban ay ngay gutluan.

²⁰ Lag am gamatangan te, ‘Nataw ban em fakonun sis fafituk banwa nu dway ban mi gtanum ya ay ggutlu.’

²¹ Ay galay ban sis faunumk banwa gfadante au ay ngay gamasun laman ban ngayu tua ay gutluan kaduge tuluk banwa.

²² Nu katanya, gina ban am gtanum, sis fawaluk banwa, ay fakonun ay gutluan yay sis faunumk banwa, ay kasakan tua ban gugat ay fakonun yakmay andasug sis fasiamk banwa fag fanggutluan.

²³ “Lag ban am gfalao ay ngay gamasun way ban am mabul ya, aroro kanya fag gamasun siginan way angku; nafatigwanan kway sa ayu laman ay fagtanuman.

²⁴ Nu katanya, aylati sik taw nu gfafoli sa ayu at famayad laman gbul at daga. Fakamuluni takatanya sa ay nabayad fag ngay gamasun.

²⁵ “Ay ay kaiban fag ngay taw Israel nu nke fagayudanun way ay nu nafalao way at daga, at kalongan yakman at namafoli at famayad kafag gamasun sat fagfaloan.

²⁶ Dewa katanya, kanya nu dway e kalongan laman at namafoli sa anya at gamasun, kanya gfanya yay sik buknga nu makatu gbayad sat fagfaloan.

²⁷ Ay nu nfasludan way ban takatanya, kanya ban gfafoli at famayad sat fagfaloan nu seyu at gutluan yakmay andasug gina gfalfas ay gfafoli fag banwa, ay ginanya ya kanya nu mabul at daga.

²⁸ Dewa katanya, nu kurang yay at famafoli fag salapi, at fagfaloan gfataglayun yay gagbilug kanya fag gamasun, yakmay andasug gina gfalfas ay gina gfafoli fag banwa. Ay nu ndasug wan ginanya fag banwa, at fagfaloan gfafoli wan sa tagbilug kafag daga.

²⁹ “Sik taw nu nafalao way at bale tagsisad basad furuan at alad, kanya masine yay gfafoli at famayad at bale, nu nlangfe sik banwa siginan nu gfalao.

³⁰ Dewa katanya, kanya nu dway mafafoli ya at famayad sat fagfaloan, nu nlangfe sik banwa, at fagfaloan ay at ngay kasugfunanan ban gagbilug wan kanya fag bale. Ay kafag tagagbilug bale wa masine ya gbul at bale dewa andasug gina gfalfas ay gfafoli fag banwa.

³¹ Ay fagayu ay nafalao fag ngay bale at yud sit maaladan fag furuan, masine wayam gfafoli at famayad, gina gfalfas ay gfafoli fag banwa.

³² “Dewa katanya, ngay taw Lebi masine way gugat gfafoli famayad sat fagfaloan at bale sit furuan.

³³ Ay taw Lebi nu dway mafafoli ya at famayad, sat fagfaloan gfafoli wan at nabul fag ngay bale nu ndasug gina gfalfas ay gfafoli fag banwa, aroro kanya way lang fag ngay taw at magbilug at ngay bale sit furuan, aroro kanya wan at afud siginan at ibama fag ngay taw Israel.

³⁴ Ay we mafalao ngay fagfafangonan fagbaugun sit ligung furuan aroro kanya ban at fagagbilugun wan kabavn.

³⁵ “Ay kaiban fag taw Israel nu nke fagidapun way ay nu dway makatu ya gbul at ngay fagayudanun, gubuki anya kata nu ggubuk am sik betaw, laman kanya mafataglayun gbanwan gasfuan ayu.

^36-37 Faulbusi tua sa anya ay salapi ay lag gfamut ya at famafoli, ay faloi sa anya fakonun yud e famamut at famayad, laman kanya mafataglayun gbanwan gasfuan ayu. Fakamuluni ban takatanya laman gfalag am te, gsuyu tuam angku ay Dius.

³⁸ Au wan ay Dius Yawi at nafalfas ayu siginans talun Igiptu laman namon au ayu talun Kanaan, ay laman au tua ay Dius.

³⁹ “Ay kaiban fag taw Israel nu nke fagidapun way ay kanya nu nafaebayad way at sadili laman sik fagsuguan, lag am gfaksvn nu gfafakamulun am anya kata sik ngay fagsuguan.

⁴⁰ Tuyani anya te, kanya sik betaw tagbanwan si ayu. Ay kanya gfakamulun kata sik fagsuguan yakmay andasug nu gfalfas ay nu gfafoli fag banwa.

⁴¹ Ay ginanya ban fag banwa, kanya ay at ngay baguama, guli wan sat ngay kalongan, ay gdog nangagbilug at mangaguyang at ngay fagagbilugun.

⁴² Am wan ku ngay fagsuguan, am fag ngay Israel ku nafalfas siginans talun Igiptu. Nu katanya, lag am gfae bayad ay ngay sadili laman sik fagsuguan.

⁴³ Lag gfaidapan ay kaiban fag ngay taw Israel ay fagsuguan. Falagi anya te, gsuyu tuam angku ay Dius.

⁴⁴ “Nu kaylat am sik fagsuguan, bayadi yakman ngay taw tagsiginan ay ligung fag ngay talun.

⁴⁵ Nu kaylat am kae fagsuguan bayadi sik taw tagsiginan tibak talun tagbanwan si ayu, ay mannga at ngay sisian at kinsalug si ay talun. Ay am wan at ke fagsuguan ay nabayad fag taw,

⁴⁶ ay masine yangay gfon sa ay ngay sisian kanya fag ngay fagsuguan, ay kaduge ban kanya fag ngay fagsuguan gleleg kanya ban fagayu namakamulun sa ay ngay sisian yakmay anbul. Dewa katanya, lag gfaidapan ay kaiban fag ngay taw Israel.

⁴⁷ “Sik taw Israel nu nke fagidapun way maksvn, ay kanya nu nafaebayad way at sadili sa sik taw tagsiginan tibak talun ay dewa sanya fag betaw at kalongan,

⁴⁸ masine yay gfafoli kanya fag betaw at famayad laman gbul kanya fag taw Israel. At namafoli kafag betaw at famayad kanya tua fag taw Israel at faduksay,

⁴⁹ at sai, at lagbe, ay nusnga sinu at kalongan. Ay kanya fag taw Israel nu makatu tua kanyai wan tagbayad.

^50-52 Kanya fag taw Israel gasfuan at nabayad anya, nantap nu seyuk banwa nu gafagsuguanan, ay nu seyu at bulan laman sik fagsuguan kata tibak fagsuguan. Ay nu seyu at bulan kanya wan at famamut at famafoli sat nabayad anya. (At kayuan at famayad nu seyu at bulan siginan nu gfagsuguan anya yakmay andasug nu gfalfas ay nu gfafoli fag banwa.) Ay nusnga seyu at sawad, kayu way kanya at fanbayad laman sat sadili.

⁵³ Ay kafag betaw masine nu gtuyan sa kafag taw Israel te, sik tagfakamulun, ay lag gfaksvn nu gfafakamulun.

⁵⁴ Ay kanya fag taw Israel nu dway makatu gfafoli, takata kanya fag balyawvtan, gfalfas wan anya ay anggan at ngay baguama gina gfalfas ay gfafoli fag banwa.

⁵⁵ Nu katanya, lag am nangafagsuguan sa ay kaiban, aroro am wan ku ngay fagsuguan, nafalfas au ayu siginans talun Igiptu. Au wan ay Dius Yawi.