Lebitiku 21 - Fanawbuid tagsibaliwas Fakayabian

Ngay Faugali laman sa sangay Tagfon Fanggalangun

¹ Yawi nasugu Muisis laman nanlong sas Arun at kasugfunanan fag ngay tagfon fanggalangun te, “Lag gfauri ay sadili siginan nu kakbang am ay gted sik taw at mabulan,

² nu dway ay kalongan, ay mina, ay mama, ay sisian, ay faduksay mangama,

³ ay faduksay fag mangena yud e fagsegun ya nu bunway siginan ayu.

⁴ Lag gfasuya ay sadili siginan nu nangalo am namoli ay mangena at kalongan.

⁵ Nu kabalu am, lag gufo ay buk ay ay umi ay lag gfilas ay afud bilug.

⁶ Fatigwanani wan ay sadili sa angku ay Dius, ay lag gfae fakaplaun ku ngayan. Fakamuluni ban gugat takatanya aroro am wan tagirug ngay fanggalangun laman ku fakonun.

⁷ “Lag am kadadwa sa tagfaebayad fag ngay mangena, ay sa sangay mangena at nasaruayan siginan at mangama, aroro nafili au ayu laman sa angku.

⁸ Masine ay kaiban fag ngay taw Israel nu gtuyan te, diam e malong, aroro am wan tagirug ngay fanggalangun laman sa angku. Ay kaiban fag ngay taw Israel masine nu gtuyan te, diam e malong, aroro au Yawi kdi e malong, ay nafayud kyangay e malong ayu.

⁹ “Nu e baguina wayam tagfae fakaplaun ayu siginan nu gfae bayad at sadili, tuyani anya te, masuya ay irugi wan anya.

¹⁰ “Sik fun tagfon fanggalangun at kalongan nu nbul way, kafag fun tagfon fanggalangun lag burago at buk ay lag ggirat at lanbung laman gfalag te, kabalu.

¹¹ Kanya wa masine nangakbang sat mabulan dewa at mina ay at mama, laman kanya di msik masuya.

¹² Aroro nafili au anya laman sik fun tagfon fanggalangun siginan nu gugwag au sat alfuyu langis. Kanya wa masine gduksun siginan ku bale aroro nu naduksun way ro, ay nanangalo gina namoli at kalongan, kanya nafasuya ku bale. Au Yawi.

^13-14 “Sik fun tagfon fanggalangun nu kaylat way gfanmangena, masine kanya fag mangena nu sik taw Israel ay sik baguina yay. Kanya wa masine gfili sik fagbubayun ay sik mangena at nasaruayan siginan at mangama, ay sik tagfaebayad fag mangena,

¹⁵ laman ban ngay taw di gtuyan te, mauri at ngay sisian. Au Yawi at nafili anya laman sik yud e malong.”

¹⁶ Yawi nasugu Muisis

¹⁷ laman nanlong sas Arun te, “Kabavn ban wa masine sik taw at yud maugali siginan am kasugfunanan nu gfon fakonun fag fanggalangun laman sa angku.

¹⁸ Wa masine nangakbang sas fagirugan sik yud glag, tagalbi, ay at yud maugali fag taw,

¹⁹ sik taw at ke aslu at darafa ay at daluap,

²⁰ ay at mabarukung, ay talay fag taw, ay ke fakasaitun sit mata ay sit balat, ay tagaranas.

^21-23 Nu katanya, Arun at kasugfunanan nu nke yud way maugali, kanya wa masine gfon fanggalangun sa angku siginans afuy laman sa angku. Ay kanya wa yangay masine gsakbo sat Mafasamanan fag Suluk, ay wa manangakbang sas fagirugan aroro kanya gfauri ku bale. Dewa katanya, kanya masine way kon at mafalganan fag afud fakonun laman sa sangay tagfon fanggalangun siginan at yud e malong fag ngay fanggalangun. Au Yawi at nafili ayu laman sa angku.”

²⁴ Muisis nalong takatanya fagayu sas Arun ay sat ngay baguama anggan sa sangay taw Israel.