Lebitiku 20 - Fanawbuid tagsibaliwas Fakayabian

Famaurianan sa sangay Asalanan

¹ Yawi nasugu Muisis

² laman nanlong sa sangay taw Israel ay anggan sa sangay betaw tagbanwan sanya te, “Nusnga sinu si ayu at nafon at sisian laman sik fanggalangun sas Mulek fag fagsegan, ngay taw sis furuan masine nu gfana anya gang yakmay anbul.

^3-4 Kadotama au anya ay lag gtuyan ya anya te, ay kaiban, aroro kanya nafon at sisian sas Mulek fag fagsegan laman at fanggalangun, kanya nafasik masuya ku bale nu inda nu gseg am angku ay kanya wa nasuyu ku ngayan yud e malong. Nu dway am nasalag ya takatanya fag taw,

⁵ au wan at namaurianan anya gasfuan at talanan ay at kalongan ay anggan fagayu tagfaning anya. Ay kwa ban gtuyan ya anya fagayu te, ay ngay kaiban.

⁶ “Kadotama au ngay taw taget gubuk sa sangay taw tagfakamatoan ngay kinbul at ngay at ngay falad. Kwa ban gtuyan ya anya fagayu te, ay ngay kaiban.

⁷ “Falganani ay sadili laman sa angku, ay dangay am e malong aroro au ay Dius Yawi.

⁸ Faningi tua ku ngay suguan ayu aroro au Yawi at nafili ayu laman ku ngay taw.

⁹ “Nusnga sinu fag taw at nalong mauri sat mama ay sat mina, fabuli wan. Sia yay ro at ke mamalong dewa nbul.

¹⁰ “Sik mangama nu natugtug way tibak mangama at mangena, fabuli wan kafag mangama ay kafag mangena.

¹¹ “Sik mangama nu natugtug way at mama at mangena, kanya nafauri at mama. Nu katanya, fabuli wan kafag mangama ay kafag mangena. Sia yay ro at ke mamalong dewa nbul.

¹² “Sik mangama nu natugtug way at nugang fag mangena, masine nu gfabul kanya fag dua aroro maksvn nu mauri at nafakamulun. Ay kanya yay ro fag dua at ke mamalong dewa nbul.

¹³ “Sik mangama nu natugtug way sik mangama, fabuli wan anya fag dua aroro kanya fag dua nafakamulun at maksvn fag fagmauriun. Ay kanya yay ro fag dua at ke mamalong dewa nbul.

¹⁴ “Sik mangama nu ndadwa way sa sik talanak, fabuli wan ay irugi anya fag tulu aroro at nafakamulun maksvn nu mauri. Falyami wan takatanya fag fagmauriun si ayu.

^15-16 “Sik mangama ay mannga sik mangena nu natugtug way fagbaugun, fabuli wan kanya fag taw gasfuan kanya fag fagbaugun. Sia yay ro at ke mamalong dewa nbul.

¹⁷ “Sik mangama nu ndadwa way sat faduksay fag mangena, nu duksay way sat mama ay mannga sat mina, kafag mangama nafae fakaplaun at faduksay, ay kanya anke malong. Kanya fag dua nafakamulun at maksvn fag fagmauriun, nu katanya, lag gtuyan ya anya fag dua te, ay kaiban.

¹⁸ “Sik mangama nu natugtug way sik tagfangigusan fag mangena aroro kafag mangena kaylat yangay, lag gtuyan ya anya fag dua te, ay kaiban.

¹⁹ “Sik mangama nu natugtug way at bay, kanya nafae fakaplaun at bay. Kanya fag dua at ke mamalong sat nafakamulun.

²⁰ “Sik mangama nu natugtug way at sai at mangena, kanya nafae fakaplaun at bay. Kanya fag dua at ke mamalong, ay wa ban gsisian.

²¹ “Sik mangama nu natugtug way at faduksay at mangena, kanya nafae fakaplaun at faduksay. Aroro sat nafakamulun mauri, kanya ban fag dua wa gsisian ya anggan anbul.

²² “Faningi fagayu ku ngay suguan ay ku ngay faugali, laman ban kdi gaiyan ayu siginan ku nafon ayu fag talun laman ay fagbanwanan.

²³ Fagayu ban tagfakamulun takatanya fag ngay fakamulun at mauri gaiyan kwan, ay kadotama kban anya fagayu. Nu katanya, lag gfaning kanya fagayu at fakamulun.

²⁴ Kata ku longan ayu, gagbilug ban am kafag ngay taw at talun. Ay gfon kban sa ayu kanya fag talun, at masine ay at maramraman, laman ban ay fagagbilugun. Au wan ay Dius Yawi, at nafili ayu siginan fagayu taw.

²⁵ “Tuyani fia te, nataw fag fagbaugun ay fag manuk tungud at masine ay at mauri. Lag gfasuya ay ngay sadili siginan nu kon am at masuya fag ngay fagbaugun ku nalong sa ayu.

²⁶ Dangay am e malong aroro au Yawi kdi e malong. Sas fagayu talun am wan ku nafili laman ku ngay taw.

²⁷ “Si ayu nung way e gfakamatoan sat ngay kinbul at falad, fanai anya ngay gang yakmay anbul. Sia yay ro at ke mamalong dewa nbul.”