Lebitiku 19 - Fanawbuid tagsibaliwas Fakayabian

Tiba yak Suguan

¹ Yawi nasugu sas Muisis te,

² “Longi sa sangay taw Israel te, “Dangay am e malong aroro au ay Dius Yawi, kwe malong.

³ Suyui tua ay mama ay ay mina. Faningi ku suguan ayu galay Famiangalay fag Menit. Au wan ay Dius Yawi.

⁴ “Lag am gseg ngay fagsegan, ay lag yangay kawat at fakatoglagan laman ay fagsegan. Au wan ay Dius Yawi.

⁵ “Nu gfon am fanggalangun laman sas fagmanabayanun, fakamuluni kata ku suguan ayu fag faugali, laman mauseganan tua sa angku.

⁶ Oni wan kanya fag fanggalangun ginanya fag menit ay at fadogan fag menit. Dewa katanya, nu nke sawad way sis fatuluk menit, irugi wan.

⁷ Ay nu siwas fatuluk menit nu kon am kanya fag fanggalangun wa mauseganan ya sa angku, aroro maksvn wan nu masuya.

⁸ Nusnga sinu at naon takatanya, umke asalanan, aroro kanya nafayud e masuad at mafasamanan fag fanggalangun laman sa angku. Ay tuyani kafag taw te, bunwa ya ay kaiban.

⁹ “Nu ggutlu am, lag yap gfamin ngay rawvg sa sangay tigyangan, ay lag am kafoli ya laman namul ay nagsawadan.

¹⁰ Ay lag yangay gfamin nu ggutlu am ay ngay tanum ubas, ay lag gfuyut ya ay ngay nafatong, kanya fagayu famatoi wan laman sa sangay taw at yud e kwa, ay sa sangay taw tagsiginan tibak talun. Au wan ay Dius Yawi.

¹¹ “Lag am gfangkamul, lag am kamuag ay lag yangay gfanlukan.

¹² “Lag gfatuyanan at yud matuyan sa ku ngayan, aroro takatanya gfauri wayam ku ngayan. Au Yawi.

¹³ “Lag am gdaya ay gfangkamul ay ngay iba at ngay fagagbilugun. Lag am gfalangfe nu gbayad am sat nafakamulun sa ayu.

¹⁴ “Lag am gfaidapan at yud gdungug fag ngay taw, ay lag am gfoli sik mataid sat yud glag fag taw at dalan. Faningi tua ku ngay suguan ayu laman gfalag tuam te, kalimu tuam angku ay Dius. Au Yawi.

¹⁵ “Dangay e fagfili nu gfawabilugan am ngay taw at yud e kwa, ay ngay taw at maramraman.

¹⁶ “Lag glong te, ay iba mauri nu dway matuyan. Lag am gfatuyan te, ay iba mauri laman gfae fakalimuun anya. Au Yawi.

¹⁷ “Lag am kauri ay ngay iba, foyungi anya gina nafakamulun at mauri laman ban diam e malong.

¹⁸ Lag am kadotama ay ngay iba, abat ngate, esugi way kata nu kesug am ay sadili. Au Yawi.

¹⁹ “Faningi ku ngay suguan ayu. Lag am gfaulul sik fagbaugun sa tagsaman fag fagbaugun. Lag am gtanum duak dalan bvtang sa sik fagtanuman. Lag am gsulun lanbung tagduak dalan ramit at fangawat.

²⁰ “Sik fagsuguan fag mangena at tagakadadwaun sa sik mangama, at yud yay nalfas siginan nu gafagsuguanan, ay tibak mangama nu nafataladan way anya, faurianani wan kanya fag dua. Dewa katanya, lag yap gfabul aroro kanya fag mangena sik fagsuguan yay.

^21-22 Ay kafag mangama at nafataladan kafag mangena, masine nu gbuba sik tama tupa sas Yawi at sakbawan bale, laman at fanggalangun famalyam at asalanan. Tagfon fanggalangun namon kanya fag fanggalangun si ku daga salubangan, ay gfalyam kwan kanya fag mangama at asalanan.

²³ “Gina ban am andasug sa ku nafon ayu fag talun, lag yap ban kon ay ngay tanum at rawvg kaduge tuluk banwa. Tuyani yap te, masuya.

²⁴ Ay si ban sfaufatk banwa, foni sa angku ay ngay tanum at ngay rawvg laman ay fanggalangun sa angku.

²⁵ Ay si bans falimak banwa, masine wam kon ay ngay tanum at rawvg. Ay nu nafaning tua ban am takatatuy fag ngay faugali, ngayu tua ban ay ngay fananumun at rawvg. Au wan ay Dius Yawi.

²⁶ “Lag am kon yamas tagatagukun yay. “Lag am gfaning ngay taginsaful ay ngay tagfangabalo at ngay fakamulun.

²⁷ “Ay gina am kabalu, lag am gufo ay buk ay ay ngay umi.

²⁸ Ay lag am gfilas ay ngay afud bilug. Lag am griruk si ay ngay bilug. Au Yawi.

²⁹ “Lag gfae fakaplaun ay sisian mangena, siginan nu gfabulun am laman namakamulun at mauri, aroro siginan takatanya fagsigadan fagmauriun nu kafagdaul sa ay furuan.

³⁰ “Faningi ku ngay suguan ayu sa baliwas Famiangalay fag Menit, ay famafanudi tua ku bale. Au Yawi.

³¹ “Lag am nanget gubuk sa sangay taw tagfakamatoan ngay kinbul at falad, aroro nu nafakamulun ban am takatanya, umsik masuya am. Au wan ay Dius Yawi.

³² “Suyui tua at ngay mafagtainan, ay suyui yangay angku ay Dius. Au Yawi.

³³ “Lag am gfauri ngay betaw tagsiginans tibak talun tagbanwan si ayu.

³⁴ Ay tapi anya fagayu te, ay kaiban, ay esugi anya fagayu kata nu kesug am ay sadili, aroro ebi, sik ngay betaw yangay am sis talun Igiptu. Au wan ay Dius Yawi.

³⁵ “Lag am gfanluk gina am gfabudbungguan, ay gfasudsudan ay gtas.

^36-37 Ay fagagbilugun at masinei tua fag famabudbungguan ay fag fantas ay fag famasudsudan. “Au wan ay Dius Yawi at nafalfas ayu siginans talun Igiptu. Faningi fia fagayu ku faugali ay ku ngay suguan ayu. Au Yawi.”