Lebitiku 10 - Fanawbuid tagsibaliwas Fakayabian

Nadab ay Abyu Anbul

¹ Arun at baguama fagdua, Nadab ay Abyu, nabul sik fagsuadan famaebebanglu. Ay duksay nasuad sik singsing afuy ay sik famaebebanglu, ay nafon laman fanggalangun sas Yawi. Dewa katanya, duksay at nafakamulun wa kata Yawi at suguan, aroro at nabul fag afuy wa siginans fagirugan.

² Nu katanya, Yawi nafadasug sik afuy ay nairug duksay ay kanya fag dua anbul sis Yawi at daga salubangan.

³ Nu katanya, Muisis nalong sas Arun te, “Katanya Yawi at longan at masuad te, ‘Nusnga sinu fag tagfon fanggalangun at nangakbang sa angku masine nu gsaful te, dakdi e malong, ay masine fagayu taw nu gfauseganan tua angku.’ ” Ay Arun wa naringang.

⁴ Sanya ginan, Muisis nafauro Misael ay Elsafan, Usyel at ngay baguama. (Usyel Arun at sai). Ay Muises nalong sas Misael ay sas Elsafan fag duksay te, “Namul am ay lagbe siginans aturunan Yawi at bale, ay namuba sas day fagmafulan.”

⁵ Nu katanya, duksay nanamul, dewa katanya, nu gted si way at lanbung ay nabuba sas day fagmafulan kata Muisis at suguan.

⁶ Ay Muisis nalong sas Arun ay sat baguama at dua, Elyasar ay Itamar te, “Lag am gufo ay buk ay ggirat ay lanbung laman gfalag am te, kabalu am. Nu nafakamulun way ro am takatanya, umbul ro am, ay Yawi ro umdotama ngay taw Israel. Ay ngay kalongan yakman lang tagfalag te, kabalu duksay, Yawi at nairug.

⁷ Lag am glao siginans Yawi at sakbawan bale. Kabul ro am nu nalao wayam, aroro am wan Yawi at nafili laman sik ngay tagfon fanggalangun siginan nu grarus sa ayu langis.” Ay Arun talamean nafaning Muisis at longan.

⁸ Yawi nalong sas Arun te,

⁹ “Nusnga sinu am talamean at nanakbo sa ku bale, lag am ginum at malangu fag mamam. Nu nafakamulun wayam takatanya, kabul am. Tuy fag faugali ay fagaloan ban kabavn, anggan ay ngay kasugfunanan.

¹⁰ Masine nu gtuyan am ngay fakamulun laman sas Yawi ay laman sa sangay taw, ay asafuli yangay at masine ay at masuya.

¹¹ Foyungi fia sa sangay taw Israel sabaliwa ku ngay suguan ku nafon sas Muisis.”

¹² Muisis nalong sas Arun ay sat baguama at dua, Elyasar ay Itamar te, “Namul am at sawad fag fanggalangun laman famauseganan Yawi. Fatamai kafag tinapay yud e famabia ay oni munakbang sis fagirugan aroro kanya sik nafili fag fanggalangun.

¹³ Nangon am kafag fanggalangun fag tinapay sis Yawi at bale at basad alad, aroro kanya ay afud siginan sangay fagirugun fag fanggalangun. Katanya Yawi at suguan angku.

¹⁴ Ay masine way am kon gasfuan ay ngay talnayan, at nafabat fag fanggalangun at dubdub ay at balangbang laman sas Yawi, sit nafili fag buknga. Kanya wan ay afud siginan sangay taw Israel at ngay fanggalangun laman sas fagmanabayanun.

¹⁵ Sik taw Israel nu gfon way at fanggalangun, masine nu gfon at fanggalangun fag fagbaugun at dubdub ay at balangbang gasfuan at ngay taba laman sik fagirugun fag fanggalangun. Fabati sis Yawi at daga salubangan kafag fanggalangun at dubdub ay at balangbang. Kanya wan ay ekwan ay anggan sa ay ngay kasugfunanan kabavn ban, kata Yawi at suguan.”

¹⁶ Ay Muisis nu nananginsaful sabaliwas fanggalangun fag kambing laman famalyam asalanan, kanya nasaful te, nirug wan. Nu katanya, kanya andotama Elyasar ay Itamar ay nalong te,

¹⁷ “Wain ay fagyudun naon famalyam asalanan fag fanggalangun sis Yawi at bale at basad alad? Kafag fanggalangun sik mafasamanan ay kanya Yawi at fon ayu fag afud laman famalyam ngay taw Israel at asalanan sis Yawi at daga salubangan.

¹⁸ Aroro kafag taguk wa nafasakbo sat Mafasamanan fag Suluk, naon am nangus kanya fag fanggalangun sis Yawi at bale at basad alad kata ku longan ayu.”

¹⁹ Ay Arun nabalus Muisis te, “Aro sbalabag, ku ngay baguama nafon at fanggalangun laman famalyam asalanan ay fagirugun fag fanggalangun, ay fagdua anbul. O nunda ro dewa anfasludan takatanya, Yawi guseganan nu naon au katsi fag menit famalyam asalanan fag fanggalangun?”

²⁰ Ay Muisis nafadiuganan Arun at famalus anya.