Kulusas 1 - Fanawbuid tagsibaliwas Fakayabian

Famasigad ay Fagusegananun

¹ Au Pablu, tam Fun Isus at nasugu kata Dius at fakaylatun, ay anggan tam faduksay Timuteu at magamut si angku.

² Griruk ami sa ayu Dius at nafili fag ngay taw sanya sfuruan Kulusas, am at matuyan fag ngay faduksay, ay at kinsadi sa tam Fun Isus. Sumawa nangus fia ayu Dius tam Mama at fagmagalangun ay at fagmanabayanun.

³ Kabavn kayu ginan ami gdarangin ayu, guseganan ami sas Dius, tam Fun Isus at Mama.

⁴ Aroro nadungug ami ay fagafanudun sa tam Fun Isus anggan ay fakesugun sas Dius at nafili fag ngay taw.

⁵ E fagafanudun tuam ay e fakesugun aroro e fagsegun tuam ay fagnamulun at mafalganan sis banwa. Nasaful wam sabaliwa ay fagfanyaun, gina nafadungug sa ayu at matuyan fag longan, at Masine fag Barita

⁶ at kindasug sa ayu. At Masine fag Barita karapyag sas fagdaul daga, ay ngayuk taw gafanud kata ayu, siginan nu bagu am gdungug ay gtogdungug Dius at kagalangan.

⁷ Nasaful am takatanya siginans Epafras, em fakesugun em faudgufudan, ay tam Fun Isus at fagsuguan at matuyan, ay em kaungbus tagsibo ayu.

⁸ Siginan anya nu gsaful ami te, mafangesug tuam tagsiginan at Masine fag Falad.

⁹ Nu katanya, nu nadungug ami sabaliwa ayu, gfataglayun ami gdarangin ayu. Get ami sas Dius te, kanya nangus gfon ayu fagsafulun ay fagmayamagun siginan at Masine fag Falad at gubuk, laman sumaful am at fakaylatun.

¹⁰ Katanya em darangin laman mafafaning tuam at masine ay at maylat sa tam Fun, ay laman diam e fagayudanun sat masine fag fakamulun, ay kaksvn tua nu katoglag am tam Dius.

¹¹ Ay em darangin yangay te, Dius gfabitsug ayu siginan at fagmabalyananun yud e gfasud, laman magwanta tuam sas nusnge wain fag fagidapun,

¹² gina am guseganan sa tam Mama, aroro kanya nafasine ayu laman e afud tuam sat fagnamonun at nafalganan sat ngay taw tagbanwan sad mayamag.

¹³ Ay kanya nafalangfe antam siginans fagmadulumun at fagmabalyananun ay nafalin antam sat fakesugun at Baguama at fagfagtainanan.

¹⁴ Siginan at Baguama, kanya nafalfas antam ay nafalyam tam ngay asalanan.

Dius at Baguama at Fagmabalyananun

¹⁵ At Baguama, kanya wan yud kalag fag Dius at aninu, ay kanya wan tagfunan sas fagayu at awatan.

¹⁶ Aroro fagayu sis banwa ay sis daga takalag ay yud kalag anggan at ngay mabalyanan, ay fagmafunanun, ay fagtainan, ay tagfunan fag ngay falad, kanya fagayu ankawat siginan at Baguama laman sa anya.

¹⁷ Ay kanya tua taguna sas nusnge wain, ay fagayu nusnge wain at kasinean siginan wa anya.

¹⁸ Tam Fun Isus wan fagayu tagafanud at alfuyu, ay at bilug ngay tagafanud wan. Kanya at fakasigadan ay taguna gleleg siginan at fagmabulanan, nu katanya, kanya wan tagbilug sas fagayu.

¹⁹ Aroro Dius naylat te, fagdaul at fagmadiusun namanwan yangay sat Baguama,

²⁰ ay Dius at fakaylatun fagayu at awatan umsadi sa anya siginan at Baguama. Ay siginan at Baguama at taguk at kinbusbus sis fasulungan kayu anke fagmanabayanun, laman fagayu at awatan tagsis banwa ay tagsis daga umsadi sas Dius.

²¹ Ebi ngayayu am siginans Dius, ay am wan at ngay fawayan, aroro siginan ay asalanan ay ay mauri fag amatanganan.

²² Dewa katanya, siginan tam Fun Isus at nabulanan, ansadi tuam sas Dius laman namasalubang ayu sa anya yud e malong ay matuyan.

²³ Katanya ban at kumfasludan nu gbanwan tuam matuyan ay nu gfaksvn tuam ay fagafanudun, ay nu ddi am gubun at Masine fag Barita at nafon sa ayu fag fagsegun. Katanya ay nadungug fag Masine fag Barita, at nafoyung wan sas fagayu taw. Au, Pablu, sik fagsuguan laman kamoyung takatanya.

Pablu Kamoyung sa sangay Tagafanud

²⁴ Katsi guseganan ktua dewa au gidapan aroro sa ayu, laman gfatabu au tam Fun Isus at nainkidapanan at yud yay antabu, laman at ngay taw, tuga at bilug, e tungkul tua.

²⁵ Dius nafili angku laman sik fagsuguan sas Isus at ngay taw laman namayamag au sa ayu tam Dius at longan fagayu,

²⁶ at ngaduge wan nu masuksukan sas fagayu taw ay katsi ansure sa at ngay nafili.

²⁷ Dius kaylat gfasaful sa anya fagayu sabaliwa at algan at maksvn nu madulo, ay kaylat yangay gfasaful sa ayu, yud Udyu fag ngay taw. At masuad, siwa ayu tam Fun Isus, ay siginan anya nabul am ay fagsegun gfaudgufudan anya sat fagmasineun.

²⁸ Kanya wan em fakamoyungun sabaliwa tam Fun Isus sas fagayu taw. Gfamatangan ami sas fagayu taw ay gfayamag ami ay kamoyung kaksvn em fagmakatuun, laman fagayu taw manansalubang sas Dius, ay di e malong aroro siginan at fagmasadiun sa tam Fun Isus.

²⁹ Gugatan au gfakamulun takatanya siginan tam Fun Isus at fon angku fag fagmabitsugun.