Isayas 64 - Fanawbuid tagsibaliwas Fakayabian

¹ Yawi, luangi banwa, ay adagai wan, ay fagayu buksul muigan sa am daga salubangan.

² Afuy nu mafairug way at magong fag ngay sanga ay nu mafauluk way mamam, katanya yangay ban nu kadasug o. Am ngay fawayan ban fag ngay talun at ngay taw gtadtaruyan, ay kanya ban fagayu sumaful te, sinu o.

³ Ebi gina o andaga ay nawat fagayu nusnga setaw at madulo em fagyudun saful, ngay fungsu nauigan sim daga salubangan.

⁴ Siginan ebi dasug katsi ya batang e ndungug ay e nlag takata emu fag Dius, taggubuk sas fagayu tagafanud sa emu.

⁵ Guseganan tuo ngay taw tagfakamulun at matuyan, ay tagfaning am ngay balyawvtan. Dewa katanya, kauri way o emi, aroro gfataglayun way mi gugat nu yud ami gfaning am ngay balyawvtan. Nu katanya, tain ro nu kalangfe ami?

⁶ Fagayu ami wami masine ya gseg emu; em matuyan fag ngay fakamulun fagayu kata way sik fanrarus at masuya, ay ankata ami sik don at kin-gong, ay em ngay fagmauriun ankata sik tagmara nafalayug emi.

⁷ Nusdi sadi si emi we nangakbang sa emu ay gugatan nanted emu, aroro anyayu wo emi, ay nafabayan wo nu kabul ami aroro sa em ngay asalanan.

⁸ Dewa katanya, Yawi, o tua gugat em Mama. Kata o sik takawat tikung, ay ami kata ami at fangawat fag lifak. O at nawat emi fagayu.

⁹ Yawi, lag yap gfaksvn nu kadotama o emi, ay lag gamatangan o em ngay asalanan kabavn ban. Gfainfanyuan ami sa emu te, dungugi tua emi, aroro ami wan am ngay taw.

¹⁰ Am ngay furuan at yud e malong ay anggan furuan Erusalem kata wa sik talun yud e gbanwan.

¹¹ Ankirug wan em fagnansegan fag Bale at yud e malong, nu inda em ngay mangaguyang nu namauseganan emu. Anrasras wan fagayu em fagagbilugun at mafanud.

¹² Dewa katanya, Yawi, o yo ggubuk emi? O maragangan way o, ay o maksvn nu namaurianan o emi?