Isayas 63 - Fanawbuid tagsibaliwas Fakayabian

Yawi nu Gfasud

¹ Sinu kanya takadasug siginans furuan Busra tagsis talun Edum, ay at ke lanbung masine at nadagatun maraska? Kanya kadasug e fagmabalyananun. Yawi wan takadasug, kanya e fagmabalyananun gfalangfe, ay nafoyung te, at ngay taw ban gbabo.

² Wain at lanbung fagmaraskaun kata sik tagturis ubas at lanbung?

³ Yawi nabalus te, “Aroro andotama au maksvn naturis kwan ngay talun at taw kata sik rawvg ubas. Sesadi kway at naturis. Nu katanya, ku lanbung natagukun.

⁴ Nafakamulun au takatanya, aroro andasug wan fag menit nu gfaurianan au ku ngay fawayan ay nu gfalangfe au ku ngay taw.

⁵ Andulo au aroro nusdi sadi we nagubuk angku. Nu katanya, siginan ku fagmabalyananun au way lang at nafalangfe ku ngay taw. Ku dotama wan at nasugu angku laman gfaurianan au ku ngay fawayan.

⁶ Ay aroro kadotama au, nasiad kwan ngay talun at taw, ay nafaranranugan au anya fagayu kata sik ngay tagalangu. Ay naugwag kwan sas daga at ngay taguk.”

Yawi at Fagmasineun

⁷ Namoyung au sabaliwas Yawi at fakesugun. Gfauseganan au anya sas fagayu at nafakamulun sa antam. Ngayu at nafakamulun sa antam fag ngay taw Israel, aroro maksvn nu kafanyu ay nu kesug antam.

⁸ Yawi nalong te, “Matuyan kanya fagayu ku ngay taw, ay ku ngay sisian at yud nafamabo angku.” Nu katanya, Yawi nafalangfe anya fagayu.

⁹ Nusnga setaw kafag ngay taw at nabaluan, kanya anbalu yangay, ay kanya nafalangfe tua anya fagayu siginan at tagbarita tagfasure at fagmasineun. Kanya kesug tua ay kafanyu anya fagayu, ay nafalangfe. Siginan ebi, kanya gulit tua anya fagayu kayu menit.

¹⁰ Dewa katanya, kanya fagayu nafamabo ay nafabaluanan at Masine fag Falad. Nu katanya, Yawi andotama ay nafawayan anya fagayu.

¹¹ Ay dewa katanya at ngay taw namatang at kinlangfe fag ngay menit, gina Muisis gtaban anya fagayu siginans talun Igiptu. Ay kanya fagayu nainto te, “Dada wan Yawi at nafadife antam sis dagat gasfuan tam tagfangguna Muisis takata sik tagulit tupa? Dada wan Yawi at nafon antam At Masine fag Falad?

¹² Dada wan Yawi, at nafon sas Muisis at fagmabalyananun laman gfawabilug dagat si tam salubangan, laman kanya kadungug kabavn?

¹³ Dada wan ebi at nagubuk antam gina tam gdife dagat? Ay di tam antaid kata sik ngay kabayu nu glao sit masine fag dalan.

¹⁴ Yawi at Falad nafafiangalay antam, kata sik ngay baka nu glao sas fagnamafangonan sas datag.” Yawi, nalaga tuo emi am ngay taw, laman gfauseganan tuami emu.

¹⁵ Damai emi siginans banwa, am fagbanwanan at yud e malong ay at masine. Wain am fagyudun ggubuk ya emi, ay am fagyudun gfasure ya am fagmabalyananun sa emi? Wo kesug ya ay kafanyu emi.

¹⁶ O wan em Mama, dewa Abrayam ay Akub yud gtuyan emi te, at ngay kasugfunanan. Yawi, matuyan o wan em Mama ay em Tagfalangfe siginan ebi.

¹⁷ Yawi, wain am fagnaylatun nu kayayu ami siginan am balyawvtan? Wain am fagnafaogatun em amatanganan, laman wami gsuyu emu? Katsi, dogi yap dungugi emi, aroro ami wan am fagsuguan ay o way lang tagagbilug emi.

¹⁸ Ay sik kadugayun, am ngay taw oma tagagbilug am Bale, ay katsi, em ngay fawayan narasras wan.

¹⁹ Siginan ebi o wan tagagbilug emi, ay dewa katanya natuyan o emi te, bunwa am fagagbilugun, ay kata way nu yud o gfangguna emi.