Isayas 59 - Fanawbuid tagsibaliwas Fakayabian

Sik Famararang sa sangay Tagasalanan

¹ Dungugani! Yawi mafalangfe tua, ay gdungug tua nu e get sa anya.

² Ay ngay asalanan wan tagfayayu ayu siginans Dius ay kanya wan at malong at faginyayuun ayu ay at fagyudun gbalus ay darangin.

³ Gfabul am ngay taw, ay gfakamulun nusnga setaw fag ngay fagmauriun. Kamuag am ay glong at mauri.

⁴ Wam gamatangan ya fagmatuyanun; kamuagan am sa ay iba. Mauri way ay ngay amatanganan anggan ay ngay fakamulun.

^5-6 Ay ngay algan at mauri kata sik ule at iklug at ke ganga, nusnga sinu at naon umbul. Ay kata yangay sik baginawa at bale, yud masine fangawat lanbung, nu katanya, we masuad ay ngay algan at mauri. Mauri way ay ngay fakamulun ay kamaidapan wayam.

⁷ Gabanganan am namakamulun at mauri ay gfabul am at yud e asalanan. Kabavn ay amatanganan mauri way, ay nusnga nday am, wam e nafakamulun masine nu bunway fagmauriun way lang.

⁸ Wam e fagsafulun sabaliwas fagmanabayanun, ay wa matuyan ay leleganan. Ay nusnga sinu ban at namaning ay ngay fakamulun, wa yangay ban manabayan.

⁹ Ay kanya wan Dius at fagyudun gfadasug faurianan sa tam ngay fawayan, ay kanya ya ngap nafon sa antam at famabo ay at fagmatuyanun. Nafanya tam yamag, dewa katanya, fagmadulumun way at kindasug, nu katanya, si way tam sfagmadulumun.

¹⁰ Kata tam sik taw yud glag, ay kataid tam dewa swabilug menit, kata nu glao sad dulum. Kata tam sik ngay taw at mabulan nu gfaladlabian sat mabitsug fag ngay taw.

¹¹ Gina tam sis fagidapun, kata tam sik usu nu gsubang, ay gfandeng tam kata sik labikung nu guni. Gfanya tam Dius nu gfaurianan tam ngay fawayan ay nu gfalangfe antam, dewa katanya, ya gugat kafasludan.

¹² Aroro maksvn wan tam asalanan sis Dius at daga salubangan, ay kanya wan fag ngay asalanan fagsafulan te, gafaurianan tam. Anud! Saful oma tam te, gfakamulun way tam at mauri.

¹³ Nafamabo tam ay anyayu Yawi, ay wa tam nafaning tam Dius. Ankuri tam ay nafalingun tibak taw. Ay maksvn nu gamatangan tam te, setain nu mafamuag tam.

¹⁴ Ay kanya wan Dius at fagyudun gfadasug faurianan sa tam ngay fawayan, ay kanya ya ngap nafon sa antam at famabo ay at fagmatuyanun. Aroro nusnga nday we fagmatuyanun ya, ay ngay taw wa masine ya fagfatigwanan.

¹⁵ Anud, fagmatuyanun nalyam wan, ay fagayu tagsaruyan at mauri gafalingunan wan. Ay Yawi nalag takatanya, ay wa guseganan aroro we gfawabilugan ya.

¹⁶ Yawi andulo sat nalag te, nusdi sadi we nagubuk ngay tagafalingunan. Nu katanya, kanya nafasure at fagmabalyananun nu gfalangfe ngay tagafalingunan. Ay aroro sat fagmatuyanun, nagubuk tua anya fagayu.

¹⁷ Kanya nafakamulun at matuyan tuga at famalabag sit dubdub, ay nasulun yangay fakalangfeun tuga at famalabag sit alfuyu. Ay kanya gsulun tuga at lanbung laman famasud ay at maksvn fag dotama.

¹⁸ Kanya namasud at ngay tagfawayan kata at nafakamulun, anggan sa tangayayu fag ngay furuan. Ay kanya ban fagayu lumag wan at dotama.

¹⁹ Ay nusnga nday ban gfababaun ay sumeg anya, aroro kanya kadasug kata mamam nu gfawas kaduge sik maksvn fag tagmara nu gtulud.

²⁰ Yawi nalong te, “At namalangfe ban Akub at ngay kasugfunanan kadasug sas Siun, ay kanya namalangfe fagayu at naubun at ngay asalanan.

²¹ “Ay katatuy ku nasadian sa ayu: wa ban kalyam ku Falad tagbanwan si ayu, ay anggan ku nafoyung ayu fag ngay longan. Ay foyungi kanya fag ngay longan sa ay ngay sisian, ay katanya yangay sat daga vtv fag ngay gaban ay anggan sat ngay kasugfunanan kabavn. Au, Yawi, taglong tuy.”