Isayas 58 - Fanawbuid tagsibaliwas Fakayabian

At Matuyan nu Yud Gfangon laman Gdarangin

¹ Yawi nalong te, “Faksvni nu guro am ay lag gfaragang, kata budyung nu gawang! Longi sa ku ngay taw, Akub at ngay kasugfunanan at ngay asalanan ay at fakamaboun.

² Kayu menit, kanya fagayu nangakbang tua sa angku, laman nanginsaful ku ngay balyawvtan. Ay nu gdama au, kanya fagayu kata sik talun at ngay taw at yud e malong ay at yud kamabo ku ngay suguan. Ay gfalag sa angku te, kaylat nangakbang sa angku ay nanget sa angku fagmatuyanun.

³ Kanya fagayu gdog yay glong sa angku te, ‘Wami nafangon laman gdarangin, dewa katanya, wo kasalag emi. Nafamababaun ami, dewa katanya, wo yangay kasalag.’ Katatuy ku famalus ayu: At matuyan, kaduge am yud gfangon laman gdarangin, ay sadili way ay fagamatanganun. Gfaidapan am ay ngay tagfakamulun.

⁴ Doma am gfangon ya laman gdarangin, dewa katanya, gawayan way am, ay garingangan, ay gfadfalangan. Lag am gseg te, gdungug kro ayu dewa am yud gfangon laman gdarangin.

⁵ Gina am yud gfangon laman gdarangin, maksvn nu kamababaun am. Garungan am kata sik ugun at ngay don. Gsulun am lanbung tagfatoglag te, kabalu am, ay gtaygilidan am sis dafug. O nunda kata kanya at matuyan nu yud gfangon laman gdarangin? O nu glong ro am guseganan au takatanya?

⁶ Ay ku fakaylatun nu yud am gfangon laman darangin, sik darangin tua ke fagmatuyanun: Faragangi wan nu gfakamulun am at mauri, ay matuyani tua nu gfawabilugan am, ay falfasi ngay tagafagsuguanan ay gubuki tagafalingunan.

⁷ Foni fakonun sas fagayu takalunus, fasakboi sa ay ngay bale at yud e kwa, foni lanbung sat yud e lanbung, ay gubuki ay ngay kalongan.

⁸ Ay nu katanya tua ay fakamulun, dumamlag am kata nu bagu kamenit, ay namafia kwan ayu. Au Yawi at matuyan tagsi ay fagunan, ay siginan ku fagmabalyananun tagsi ay faguyanan, gdiri ktua ban ayu.

⁹ Ay ginanya ban, kakbang am sa angku laman get gubuk, ay gbalus ktua ban ayu. Faragangi wan nu kamaidapan am, ay nu glong am at yud matuyan, ay nu garingang am at mauri,

¹⁰ abat ngate, foni tua ay fakonun sa sangay takalunus, ay foni sa sangay tagafalingunan at ngay fagayudanun, laman gdamlag tua ban am sis fagmadulumun, ay laman yabi umkata swabilug menit.

¹¹ Kabavn galaga ktua ban ayu ay gfapsug, dewa maidap nu mabanwan am. Gfabitsug kban ayu, ay umkata ban am sik tanum at marabung, ay kata sik bulbug at yud kalanggang.

¹² Ay ngay kasugfunanan ban gdog yay nangawat ay ngay furuan taglugo wan nu marasrasan ay namasine ban ngay fagtungkudan turuk. Ngay taw ban gtoglag ayu te, sik tagfasine am at kinrasras fag ngay alad ay fag ngay bale.

¹³ Ay nu gfaning tuam gugat ku ngay faugali sabaliwas Famiangalay fag Menit, ay nu ddi ban am gugat gamatang ay sadili fakaylatun ginanya fag menit, ay nu gtuyan tua ban am kafag menit te, sik famauseganan, siginan nu gfaragang ay ngay sadili fakaylatun, ay sa nu garingang am at yud e tungkul,

¹⁴ ay nu nafafaning tua ban am takatanya, mauseganan tua ban nu gfakamulun am sa angku. Ay gfae fagusegananun kban ayu si ay talun. Namayu kban ay gutluan si ay mangaguyang Akub at nafon ayu fag daga. Umfasludan ban takatanya, aroro au Yawi taglong tuy.”