Isayas 50 - Fanawbuid tagsibaliwas Fakayabian

¹ Yawi nalong sat ngay taw te, “O nunda naiyan kwan furuan Erusalem kata sik mangama at naiyan at mangena? Inday am rirukan am famatuyan? O nunda nafataban au emu sa tibak talun at taw kata sik taw at nafafagsuguanan at sisian sat fagbedanan, laman famayad at bedan? Duan! Am fagnatabananun aroro siginan am ngay asalanan. Erusalem, naiyan au emu, aroro nafamabo o.

² Wain am fagyudun naylat angku ebi gina au bagu kadasug? Wain am fagyudun gbalus angku ebi gina au guro emu? O nunda kwa mafalangfe emu? Mafalanggang kway dagat siginan sik aringang. Ay mafakata kway talun at magong ngay liskung laman ngay albon umbul.

³ Ay mafadulum kyangay banwa kata sik malayung fag lanbung takabalu fag taw at fagsulunun.”

Dius at ngay Fagsuguan at Mafamaning

⁴ Yawi tam Fun nafoyung angku ku fagnanlongun laman namabitsug au at ngay mamomuy. Kayu balabag Yawi gfulo angku laman gdungugan au at foyungan.

⁵ Yawi tam Fun naringang sa angku ay gdungugan au. Kdi nafamabo ay kdi nalagyu anya.

⁶ Nafabayan au nu e gfalang ku guyuy, ay nasalubang au sa sangay taggulad ku umi. Nafabayan kwan nu gfalingun angku ay nu gtufe ku mata.

⁷ Dewa katanya, kdi napla, aroro Yawi tam Fun nagubuk angku. Nu katanya, nafaksvn au ku amatanganan kata sik gang, aroro nasaful au te, kdi ban umkapla.

⁸ Dius munakbang tua angku. Kanya wan at nalong te, kdi e asalanan. Sinu taglong te, e asalanan au? Salubangi angku!

⁹ Dungugani! Yawi tam Fun ku taggubuk. Sinu at malong te, e asalanan au? Kanya kata way sik lanbung takadan, fatung at naon.

¹⁰ Sinu am takalimu Yawi ay tagfaning at fagsuguan at ngay foyungan? At masine, afanudi tua sas Yawi dewa am sit madulum fag dalan at yud e yamag.

¹¹ Dewa katanya, dirii, fagayu am at ke algan namauri sa ay iba, aroro am yay ban at nangafaurianan kata ay ngay algan! Yawi ban tagfaurianan ayu, ay umbul ban am sat maksvn fag anini.