Isayas 48 - Fanawbuid tagsibaliwas Fakayabian

Taw Israel Maksvn nu Kamabo

¹ Dungugani, am, Akub at ngay kasugfunanan, at ngayan yangay te, Israel, tagsiginans Uda at kasugfunanan. Maksvn nu gfatuyanan am sas Yawi at ngayan nu get am sas Israel at Dius. Dewa katanya, kamaningan wayam, aroro wa matuyan ay ngay ugali.

² Ay glong am te, am wan tagbanwan sit yud e malong fag furuan, ay gafanud am sas Yawi at Mabalyanan, Israel at Dius.”

³ Kanya nalong ayu te, “Ebi nalong au ayu te, katanya ban at kumfasludan. Ay katsi nafafasludan kwan.

⁴ Nasaful au te, maksvn nu yud am gfaning angku. Ay liug nu matugas kata sik sanbung, ay ay dangasan nu matugas kata sik tansu.

⁵ Ebi nalong kwan sa ayu, fagayu ku fagnamakamulunun. Ebi gina yud anfasludan, nalong kwan sa ayu laman wam lumong te, ay ngay fagsegan at mawatan kayu ay sanbung, kanya tua at naguna nafoyung ay at nafafasludan takatanya.

⁶ Nadungug wam ebi ku ngay algan, ay nalag yangay am nu kafasludan fagayu, dewa katanya, wam gafanud te, au at nafafasludan. Siginan katsi, glong kwan takafasludan ban ku yud yay batang gfoyung sa ayu, ay fagyudun yay saful.

⁷ Katsi yay nu gfakamulun au takatatuy laman wam glong te, saful wami.

⁸ Wam nadungugan ay wam natogdungug kanya fagayu, aroro siginan ebi wam gdungugan. Nasaful kwa te, kamabo am, aroro siginan nu kasalug am kamabo wayam.

⁹ Ay aroro sa ku fagmasineun, nafaragang ktua ku dotama sa ayu, laman kdi gfamin ayu.

¹⁰ Nu gfasine au ayu, di kata nu gfasine sik salapi, aroro nu gfasine au ayu siginan tua nu gfaidapan au ayu.

¹¹ Nafakamulun au takatanya laman sa ku fagmasineun. Kwa kaylat kae fakaplaun, ay kwa gfon sa sangay fagsegan ngay famauseganan angku.

¹² Ku nafili fag ngay taw Israel, dungugani. Au wan Dius; au wan at fakasigadan ay at fakatabuan.

¹³ Au wan at nawat fagdaul daga at fagmatungkudan, ay au yangay at narafad banwa. Ay nu nasugu au, kanya fagayu gfaning.

¹⁴ Fagayu am mafuli ay dungugani: Sinu fag fagsegan at nafoyung te, ku fagadgalangan ban namawayan Babilunya, laman namakamulun ku algan sanya fag talun? Duan!

¹⁵ Au tua at nalong anya ay au yangay at nafili anya. Gsugu au anya ay kanya ban gbabo tua.

¹⁶ Akbangi sa angku ay dungugani: Siginan ngay sfagsigadan kwe nalong at masuksuk. Ay gina ku longan kafasludan, sanya kwan.” Ay katsi Yawi tam Fun nasugu angku. Dius nasugu angku gadgaloan at Masine fag Falad.

¹⁷ Yawi ay Tagfalangfe, Israel at Dius at yud e Malong glong te, “Au, ay Dius Yawi at nafoyung ayu te, tain at masine sa ayu, ay au tagtaban ayu sat matuyan fag dalan.

¹⁸ Nu nafaning di am ku ngay suguan, anke fagmanabayanun tua ro am, kata sik familugan mamam, ay anke fagmatuyanun tua ro am kata sik lugwak sis tigyangan dagat.

¹⁹ Ay ay ngay kasugfunanan ro ngayu tua kayu lagnas, ay di ban gafaurianan.”

²⁰ Loi wan siginans Babilunya! Ay fadungugi sas fagdaul daga ay maksvn fag fagusegananun te, Yawi nafalangfe tua at fagsuguan, at ngay taw Israel.

²¹ Ay kanya fagayu di ndanum gina Dius gtaban anya fagayu sit magong fag ngay talun, aroro kanya nafasure mamam siginan sad gang at nafon sa anya fagayu. Ay kanya nabaltak sik gang, ay mamam nafamilugan sanya ginan.

²² Dewa katanya, Yawi glong te, “At mauri ban fag taw we fagmanabayanun.”