Isayas 46 - Fanawbuid tagsibaliwas Fakayabian

Babilunya at ngay Fagsegan

¹ Babilunya at ngay fagsegan, Bel ay Nebu, mataygilid sis asnu at faguyudanun. Kanya mabyat, ay tagguyudan fag asnu kalufuy.

² Kanya fag ngay fagsegan mataygilid, ay wa mafafalangfe at nafasakay anya. Ay anggan kanya fag ngay fagsegan natabanan yangay.

³ Akub at ngay kasugfunanan, am at sawad fag ngay taw Israel, dungugani angku. Nalaga au ayu siginan ngay nu kasalug am.

⁴ Galaga kban ayu dewa ban am anfagtainan wan ay gubanun. Nawat au ayu, ay nangalaga au ayu. Ggubuk au ayu ay namalangfe.

⁵ Dada nu gfaladlabian am angku? O nunda e kata angku?

⁶ Tibak taw gfasure gintu ay sanbung salapi, ay namawat sa sangay taw takawat fagsegan, ay kanya fagayu nantudan ay nanseg at nafawat fag fagsegan.

⁷ Ay namuba sat fagnamalindugan ay kanya sanya way gugat aroro wa malelegan. Ay nu e nandarangin sa anya, wa gbalus, ay wa ggubuk gina e fagidapun.

⁸ Am fag ngay takamabo, amatangi ku ngay nafakamulun.

⁹ Amatangi tua gugat te, au wan Dius, ay we tiba ya.

¹⁰ Siginan ngay sfagsigadan nalong kwan takafasludan ban. Ay fagayu ban ku ngay nalong umfasludan, ay namakamulun kban nusnga setaw ku fagyafakamulunun.

¹¹ Guro kban sik taw siginan tangayayu fag talun sibaliwas fakamenitan, kanya ban at namafasludan ku ngay algan. Ay kanya ban namakata au sik bio at madot. Namakamulun kban ku ngay nalong ay ku ngay algan.

¹² Dungugani angku, am fag ngay taw takamabo, ay at yud matuyan.

¹³ Wa ban glugo, namae fagmatuyanun au furuan Erusalem. Munakbang wan nu gfalangfe au, ay namae fagusegananun kban taw Israel.