Isayas 44 - Fanawbuid tagsibaliwas Fakayabian

Yawi Way Lang Dius

¹ Dewa katanya, katsi, Israel ku fagsuguan, dungugani. Akub at kasugfunanan, nafili au emu.

² Au, Yawi at nawat ay at nagubuk emu. Lag kalimu, o wan ku fagsuguan ay ku nafili.

³ Aroro namon au sa emu sik mamam famalyam am fakadanumun, ay at namarugme at magong fag daga. Ay namon au ku Falad sa am ngay kasugfunanan ay namayu kban anya fagayu,

⁴ kata sik ngay makmak tagtugbung sis day bunaw ay kata sik ngay kayu tagsis tigyangan liskung.

⁵ Ay tiba glong te, ‘Au Yawi ktua at taw,’ ay tiba glong te, ‘Au Akub ktua at kasugfunanan.’ Ay tiba nanriruk sat daluap Yawi at ngayan, ay nantuyan at sadili te, taw Israel.”

We Masuad ngay Fagsegan

⁶ Yawi wan Israel at Fun ay at Tagfalangfe. Yawi at Mabalyanan nalong te, “Au wan fagsigadan ay fakatabuan. We tibak dius sas day angku.

⁷ Sinu takata angku? Longi si ku daga salubangan at kinfasludan siginan nu gfasik talun au ku ngay taw. Ay longi yangay te, katanya ban takafasludan.

⁸ Lag kalimu ay lag gafanawa. O nunda ebi kya nafasaful sa ayu ku algan? Am wan ku ngay tagfatuyan. O nunda e tibak dius tagsaman angku? Duan! Kwe fagsafulun tibak gang fagsarirungan tagsaman angku.

⁹ We tungkul ngay taw takawat ngay fagsegan, ay wa yangay e tungkul at fakesugun fag ngay fagsegan. Nusnga sinu tagseg takatanya fag ngay fagsegan kata nu yud glag ay nu yud e fagsafulun, ay umke fakaplaun way.

¹⁰ Nusnga sinu takawat ngay fagsegan we fagsafulun, aroro kanya fag ngay fagsegan wa magubuk anya.

¹¹ Amatangani! Fagayu ban tagseg ngay fagsegan umke fakaplaun, aroro at nawat ngay fagsegan sik taw way. Ngay takawat ngay fagsegan nu kaful di sa ku salubangan, kanya ro fagayu umlimu ay umkapla.

¹² Sik takawat nusnge wain siginans sanbung gfasasad afuy sanbung, ay arodi gfalang laman kawat fagsegan. Ay kanya kamomuy ay arvs wa gamatang ya aroro kalunus ay kadanum.

¹³ Sik takawat nusnge wain siginans kayu glifung sik kayu, ay gfasine laman kawat gfafaningan sik taw. Ay arodi, ggaruy kata sik masine fag taw ay nafasat fagsegan at bale.

¹⁴ Ay laman e fangawat tua gugat, kanya gagbilug ngay fun kayu at natugbung sisad araw. Ay tibaginan gtanum sik kayu, ay arak gfatugbung.

¹⁵ Ay sik lifung at famaygang way, famatama at fakonun ay at fagfangenbungan. Ay sik lifung at fangawat sik fagsegan ay kanya gtudan gseg.

¹⁶ Ay at naglifungan at famaygang wan laman famatama at yafun, ay at fakonun nu ntama wan, kon wan ay napsug. Ay kanya gfangenbung ay glong te, ‘Vy! Fadi, at kaenbung.’

¹⁷ Ay at nagsawadan at fangawat wan fagsegan, ay gdarangin sat nawat fag fagsegan te, ‘Falangfei angku aroro o wan ku dius!’

¹⁸ Kafag ngay taw wa nasaful at fakamulun. Natabun at ngay mata ay wa glag. Ay natabun yangay at ngay amatanganan ay wa gtogdungug.

¹⁹ We namatangan ya te, ‘Kafag kayu sik lifung ku famatama ku nanan, ay ku fagsugban way yamas, ku fakonun. O nangawat kyay sik mauri fag fagsegan at sawad? O nanseg au sa sik lifung kayu?’

²⁰ Ngay taw takawat takatanya, kata way nu kon dafug. At fagyudun mamatanganan at nafalyam anya, ay takatanya, wa mafafalangfe at sadili. Ay wa kaylat glong te, ‘Ku nawat fag fagsegan bunwa sik dius.’ ”

²¹ Yawi nalong te, “Israel, amatangi takatanya, aroro ku fagsuguan o. Au at nawat emu laman namaning o angku, ay kdi ban kalyam emu.

²² Ay nafalyam kwan am ngay asalanan kata sik linyabu ay sik ayuyus nu kalyam. Afolii sa angku laman gfalangfe au emu.”

²³ Banwa, alubadi useganani! Fagdaul daga, uroi! Am fag ngay buksul ay fag ngay araw, alubadi! Aroro Yawi ban namalangfe Akub at ngay kasugfunanan, ay namasure at fagmabalyananun sa sangay taw Israel.

²⁴ Katatuy Yawi ay Tagfalangfe at nawat ayu at longan: “Au Yawi at nawat fagayu nusnge wain. Au wan at narafad banwa, ay au way lang at nawat fagdaul daga.

²⁵ Kwa nafafasludan at yud matuyan fag ngay taglong at ngay foyungan. Ay nafayud au e masuad ngay tagfangalga at nafangalga takadasug ban, ay nasalag au at ke ngay fagsafulun at ngay longan, nu katanya, wa nke masuad at fagsafulun.

²⁶ Ay dewa katanya, namafasludan ktua ku ngay taglong at ngay longan. Gfoyung au te, ‘Gdog yay ban e namanwan sas furuan Erusalem, ay gdog kyay ban namawat tibak furuan sis talun Uda at kinrasras wan.’

²⁷ Ay nu nalong kban te, ‘Ngay liskung, alanggangi,’ matuyan, kalanggang.

²⁸ Nalong au sas Sirus te, ‘O ban tagulit ku ngay taw, ay at namakamulun fagayu ku fakaylatun. Sugui te, Dogi yap awati furuan Erusalem, ay anggan ku bale.’ ”