Isayas 40 - Fanawbuid tagsibaliwas Fakayabian

Nafasun Dius at ngay Taw

¹ Dius nalong te, “Fasuni ku ngay taw.

² Malukmei tua nu garingang am sa sangay taw Erusalem. Foyungi anya te, antabu wan at fagidapun, ay nafalyam kwan at ngay asalanan. Nafaurianan au anya fagayu maksvn aroro sat ngay asalanan.”

³ Ay e sik aringang guro te, “Falganani Yawi at dalan sis talun at yud e taw. Faturunani tam Dius at fagnanloan.

⁴ Fapnui ngay tagubungan, ay fadatagi ngay buksul ay ngay fungsu, ay anggan ngay tagbudbuksulanun fag ngay daga.

⁵ Umsure ban Yawi at fagmabalyananun, ay fagayu ban taw lumag takatanya. Umfasludan ban takatanya, aroro au Yawi at nalong.”

⁶ E naringang sa angku te, “Foyungi!” Ay nainto au te, “Nataw ro ku fagnamoyungun?” Ay nabalus te, “Foyungi te, fagayu taw kata way sik makmak ay at kamasinean kata yangay sik barugwak.

⁷ Makmak kalangke ay at ngay barugwak katong gina Yawi nafatagmara.

⁸ Makmak kalangke ay at ngay barugwak katong, dewa katanya, tam Dius at longan katanya tua gugat kabavn.”

⁹ Am fag ngay taw tagbuba at masine fag barita sas Siun, Erusalem fag furuan, undaudi sa tangabat fag buksul, ay uroi foyungi at masine fag barita. Uroi ay dangay kalimu; foyungi sa sangay furuan tagsis Uda te, “Kadasug wan ay Dius.”

¹⁰ Yawi tam Fun kadasug, ay namagtainan e fagmabalyananun. Kanya kadasug wan gbuba at ngay famonun sat ngay taw.

¹¹ Kanya nangulit at ngay taw kata sik tagulit tupa ay gsalilian at ngay tupa riangan, ay gtabanan fia masine at ngay tupa tina.

¹² Sinu at masuad sat daluap fagdaul dagat, ay sinu at madango banwa? Ay sinu at masuad fagdaul daga sa sik bang, ay sinu at mafafabudbungguan ngay buksul ay ngay fungsu?

¹³ Sinu tagsaful Yawi at amatanganan? Ay sinu at mafalu anya te, fakatatuyi tua am fakamulun?

¹⁴ Ay sinu at fagnangakbangan laman gfayamag anya, ay sinu at nafoyung anya at matuyan fag dalan? Ay sinu at nafae fagsafulun anya, ay at nafayamag anya laman sumaful?

¹⁵ Sas Yawi, ngay talun at ngay taw kata way sik anting si sik fagsuadan, ay kata sik dafug sis famabudbungguan; ay tagsis wabilug dagat fag ngay talun kagan way sik dafug.

¹⁶ Tagsis Lebanun fag ngay mangilafang ya kasakan laman fagnangirugun fag ngay fanggalangun, ay tagsanya fag ngay kayu ya kasakan laman famaygang sa sangay fagirugan.

¹⁷ Sas Dius, ngay taw sas fagayu talun kata way nu yud e tungkul.

¹⁸ Nu katanya, dada nu mafaladlabian am Dius? Ay dada nu mafafaningan am anya?

¹⁹ O gfaladlabian am sa sangay fagsegan? Sik takawat nawat sik fagsegan ay nadafut gintu, ay nafasanya sik famasine fag salambitan at mawatan sanbung salapi.

²⁰ Sik taw at yud e kwa at yud mafon takatanya fag fanggalangun, gfili sik kayu at yud gfangayabuk, ay gfawat sa sik tagsaful kawat sik fagsegan at yud kataygilid.

²¹ O nunda yam nasaful ay yam batang gdungug? O nunda ye nafoyung ayu siginans fagsigadan? O yam natogdungug siginan ngay nu kawat fagdaul daga?

²² Dius malunggung sit fagbanwanan sis tungud fagdaul daga ay gfunan, ay nu glag at ngay taw ste swa daga kata way sik ngay fitfit. Kanya nawat banwa kata nu narafad sik umut, ay kata nu kawat sik bale ramit laman ngay taw at fagbanwanan.

²³ Kanya naiyan ngay fun ste swa daga siginan at ngay fagfagtainanan laman we tungkul ya.

²⁴ Kanya fagayu kata way sik tanum bagu gtugbung at bagu yay kae lalid, ay Yawi nauyup ay anlangke masakit, ay tagbaribungan fag tagmara nafalayug anya fagayu kata sik upa.

²⁵ At yud e malong fag Dius glong te, “Dada ya nu namaladlabian am angku? O nunda e kata angku nu mabalyanan?”

²⁶ Tangdai sas banwa! Sinu nunda at nawat ngay galeme? Dius wan at nawat kanya fagayu, ay gfasadsadian gfasure gina glong at mesa ngayan. Ay siginan at fagmabalyananun, nusdi sadi di e nalyam.

²⁷ Ngay taw Israel, Akub at ngay kasugfunanan, wain ay fakamayudun te, “Yawi wa ggubuk emi gina ami e fagidapun, ay ku Dius wa kasalag sa em ngay fagayudanun.”

²⁸ O nunda yam saful ay yam batang gdungug te, Yawi, at yud e fakatabuan fag Dius, at nawat fagdaul daga? Kanya di kamomuy ay di kalufuy ay we taw saful at amatanganan.

²⁹ Kanya gfabitsug tua at mamomuy ay at yud e fagmabitsugun.

³⁰ Ngay baguama kamomuy yangay ay kalufuy ay kataid,

³¹ ay dewa katanya, fagayu tagafanud sas Yawi gdog yay fia umke fagmabitsugun. Kanya fagayu glayug tua kata sik bio. Dewa gtarung, wa kalufuy, ay dewa glao, wa kamomuy.