Isayas 4 - Fanawbuid tagsibaliwas Fakayabian

¹ Ginanya ban fag buknga, wa ngayu ya at mangama. Nu katanya, fituk mangena gagoan sik mangama ay kanya ban fagayu glong te, “Adadwai sa emi fagfitu! Ay ami mandi ban tagbayad em fakonun ay em lanbung, laman ban wami gafaplan te, wami e indugan.”

Yawi Gdog yay Ggubuk Furuan Erusalem

² Dewa katanya, ginanya ban fag buknga, Yawi gdog yay namasine ay namarabung fagayu fananumun sis Israel, ay at ngay gutluan ban gfae fagusegananun ay gfae fagfanagsagun sat kinsawad fag ngay taw Israel.

³ Ay fagayu ban at kinsawad ay tagleleg yay sis Siun, at masuad, Erusalem fag furuan daul, Yawi ban gtuyan anya fagayu te, at matuyan fag ngay taw.

⁴ Ay siginan ban tam Fun Dius nu ginsaful kata nu girug, kanya ban gfegus tagsis furuan Erusalem fag ngay mangena at fagmasuyaun, ay gfegus ngay taw Erusalem at ngay lanbung tagatagukun.

⁵ Ginanya ban, Yawi nangawat linyabu laman glanbung furuan Erusalem ay sas fagayu at maful sanya, kaduge mamenit. Ay nangawat yangay ban sik afuy tagigang laman gyamag gina mayabi. Siginan ban takatanya, at fagmasuloun nanuklub furuan Erusalem.

⁶ Ay at fagmasuloun kata sik famalanbung gina maroy ay sik fagsarirungan gina gfulug.