Isayas 33 - Fanawbuid tagsibaliwas Fakayabian

Dius Nanggubuk at ngay Taw

¹ Afanyuan am fag ngay tagrasras, am at yud batang e nagdalanan takatanya. Afanyuan am fag ngay takamabo, am at yud batang e nagdalanan nu e kamabo ayu. Ay nu ntabu wam grasras ay kamabo, am yangay ban at fagrasrasun ay at fakamaboan.

² Yawi, afanyui emi aroro gafanud tuami sa emu. Fabitsugi emi kayu menit, ay falangfei emi gina ami gidapan.

³ At kaksvnan nu garingang o, fagayu taw glagyu. Ay gina o nlindug, fagayu talun at ngay taw nafansaruayan wan.

⁴ Ay namamin ban o fagayu at ngay ramraman, ay umkata sik ngay tanuman gina ngay liung nafamin.

⁵ Yawi tagtungud sas fagayu, aroro kanya gbanwan sis banwa. Kanya namasure ban at fagmatuyanun ay at fagmamatanganun sas furuan Erusalem.

⁶ Kanya wan tagbakvd ayu, ay gdiri wa fia ayu ay namon ayu sik fagmamatanganun ay fagsafulun. Ay at mafanud tua fag fagmaramramanun, tagsuyu tua Yawi.

⁷ Fagayu am, dungugani! At maseganama fag ngay taw glao sa sangaba dalan ay get gubuk. Ay ay ngay nasugu tagfae fagmanabayanun maksvn nu gwayway.

⁸ Ay we glao ya sa sangaba dalan. Ay nafamabo wan at nasadian ay wa gfae tungkul ya at ngay tagfatuyan. Ay we fagsuyuun ya taw.

⁹ Afanyuan talun Israel. Anlangke wan Lebanun at ngay kayu, ay kapla wan. Datag Sarun kata way sik talun at yud e taw. Nafangatongan wan ngay kayu at don sas Basan ay sas Karmel.

¹⁰ Yawi nalong te, “Katsi namakamulun kwan, ay fagayu ban taw sumeg angku.

¹¹ Am fag ngay taw Asirya, we fanambagun ay ngay algan ay fagayu ay fakamulun. Ay ay fakadotamaun kata sik afuy tagfamin ayu.

¹² Umkirug ban am yakmay umkata dafug. Kata yangay am sik madugi fag makmak nu e nalifung ay e nairug.

¹³ Am fag ngay talun at ngay taw, dewa at munakbang ay dewa tangayayu, dungugani ku ngay nafakamulun ay toglagi te, mabalyanan au.”

¹⁴ Tagasalanan fag ngay taw sis Siun gtadtaruyan kalimu, ay glong te, “Kanya fag Dius kata sik tagigang fag afuy at yud karabung. Ay sinu si antam at manamanwan sas Dius at salubangan?”

¹⁵ At manamanwan sas Dius at salubangan, tagfakamulun tua at masine ay at yud kamuag, ay at yud galabian salapi, ay at yud get sik famayad. Ay at yud gfadiuganan tiba nu gfabul tibak taw, ay at yud gfakamulun fagayu nusnge wain at mauri.

¹⁶ Takatanya fag ngay taw at kumlangfe siginans faurianan. Kanya nu gbanwan kata nu si tua tangabat ay at mogat fag furuan, sit ke tagbia fag ngay gang fagsarirungan. Ay wa ban kamin at fakonun ay at fanginum.

¹⁷ Am fag ngay taw Israel, lumag ban am sik mabalyanan fag fun nu gfunan sat tagbia fag fagfagtainanan.

¹⁸ Ay nangamatang ban am at malimu fag buknga ebi gina Asirya at ngay fun andasug, ay gtap ay ngay bale fagulitan ay nu seyu at fagmabulun ay ramraman.

¹⁹ Ay dewa katanya, wa ban am lumag kanya fag ngay takamatungudun, tagaringang ay fagyudun saful fag fangaringang.

²⁰ Damai Siun, tam fagnangafulan fag furuan kayu ginan tam e fagmafulun. Kanya fag furuan at sadi at ngayan Erusalem, sik manabayan fag furuan at masine nu kabanwan. Kanya kata sik mogat fag bale ramit, ay at ngay turuk di kagulad ay fagayu at ngay siuk di mgatvng.

²¹ Sanya wan Yawi nu gfalag sa antam te, kanya tua tam Dius at Mabalyanan. Erusalem umkata sik furuan at ke tagbia fag mamam ay ke bulbug, ay at ngay fawayan at ngay sakayan lino wa madife sanya.

²² Katanya Yawi at fakamulun aroro kanya wan tam fun ay tam tagwabilug, ay takawat ngay suguan. Kanya wan tagfalangfe antam.

²³ Erusalem kata sik sakayan lino at yud marugut at fantabing at turuk, ay wa mafarafad at famalao fag ramit. Dewa katanya, umdasug ban sik menit ngayu ban fag ramraman at fagmabulun siginan at ngay fawayan. Dewa at yud malo fag ngay taw umke kwa tua ban.

²⁴ Sis Erusalem wa ban e glong te, “E fakasaitun au.” Ay Dius ban gfalyam wan tagsanya at ngay asalanan.