Isayas 24 - Fanawbuid tagsibaliwas Fakayabian

Dius at Faurianan sas Fagdaul Daga

¹ Fagayu am, dungugani! Yawi rumasras ban fagdaul daga, ay namasaruayan fagayu taw.

² Sadi way ban fagayu taw at fakadasugan, dewa sik tagfon fanggalangun ay sik taw, ay dewa sik fun ay sik fagsuguan, ay dewa sik tagfaebayad ay sik tagbayad, ay dewa sik tagfabedan ay sik tagbedan.

³ Umrasras ban fia fagdaul daga ay wa ban e sawad fagayu taw tagbanwan sanya. Umfasludan ban takatanya aroro Yawi wan at ke longan.

⁴ Daga ban umgong ay umtugas. Ay fagdaul daga umkalyam ban, anggan at ngay takadungug ay at mabalyanan fag ngay taw.

⁵ Ngay taw tagbanwan sas fagdaul daga nafauri wan at fagbanwanan, aroro wa nafaning Dius at ngay suguan ay wa nadungugan at ngay longan. Kanya fagayu nafamabo ebi at nasadian sas Dius te, namaning tua ban anya.

⁶ Nu katanya, Dius namauri wan fagdaul daga, ay at ngay taw umfaurianan aroro siginan at ngay asalanan. Ngayu bank taw umkirug ay wa ban ngayu at kumsawad.

⁷ Fagayu ban tanuman wat ubas umlangke wan, ay umkamin waban at fanlangu. Ay fagayu ban taguseganan kabalu,

⁸ ay wa ban e kadungug ya at masine fag ngay fagfawangun at awang, kata fagfadkalinganun ay fagfawangun ke ngay bakyang, ay wa ban e guro ya guseganan.

⁹ Wa ban e gfangalubadan ya gina gmamaman, ay at fanginum ban mayat way.

¹⁰ Umrasras ban at furuan ay mabaluanan way. Madingdingan way ban fagayu bale laman we sumakbo.

¹¹ Fagayu ban taw guro sa sangaba dalan, grvbvy fanlangu. Ay at fagusegananun ban umsik fakabaluun. Ay sas fagdaul daga we fagmanabayanun ya.

¹² At furuan marasrasan way ban gugat, anggan at sakbawan.

¹³ Wa ban ngayu takasawad taw. Ay sas fagayu talun at ngay taw sas fagdaul daga, umkata sik fun ulibu ay sik fun ubas gina bagu katabu grabas at rawvg.

¹⁴ At kinsawad ban fag ngay taw gfanguroan guseganan. Ay tagbanwan sas fakayabian baliwa namoyung ban Yawi at fagmabalyananun.

¹⁵ Nu katanya, fagayu taw tagbanwan sas fakamenitan ay tagbanwan sa sangay tigyangan dagat, segi Yawi, Israel at Dius.

¹⁶ Ay umdungug ban tagfangalubadan sas fungfung daga te, “Segi, Dius at matuyan.” Ay dewa katanya, au afanyuan kway fag taw. Kamomuy au! Aroro takamabo fag ngay taw gfataglayun way nu kamabo.

¹⁷ Fagayu am tagbanwan sas fagdaul daga, fakalimuun, ay lusung, ay litag gfanya wa ayu.

¹⁸ Fagayu ban taw at lumagyu aroro e nalimuan umtong sasad lusung, ay fagayu ban at nalfas siginan sad lusung umsiuk sas sangdaw. Maksvn ban nu karak, ay daga at fagmatungkudan muigan.

¹⁹ Fagdaul daga umkarang ban ay umbaltak,

²⁰ ay granranugan kata sik tagalangu, ay muigan kata sik balean tagmara nu nadalan. Fagdaul daga gabyatan at asalanan, ay kanya ban umrasras ay wa ban gdog ya umlindug.

²¹ Ginanya ban, Yawi namauri at mabalyanan fag ngay awatan sis banwa, anggan ngay fun iste sfagdaul daga.

²² E namatong ban anya fagayu sasad lusung kata sik ngay maubungan. Nu nlangfe ban ngayuk menit, umfaurianan wan.

²³ Magdanun ay menit umdulum ban, aroro Yawi at Mabalyanan gfunan ban sas Buksul Siun, sis furuan Erusalem. Ay sanya ban nu msure at kamasuloan sa sangay fagtainan at daga salubangan.