Isayas 19 - Fanawbuid tagsibaliwas Fakayabian

Sik Foyungan sabaliwas Igiptu

¹ Katatuy at foyungan sabaliwas talun Igiptu: Damai! Yawi gsakay sis linyabu ay masakit nu kadasug sas talun Igiptu.

² Yawi nalong te, “Namae awayan au ngay taw Igiptu: sik duksay ban nangawayan, ay tagfasabale nangawayan yangay, ay anggan sik furuan namawayan ban tibak furuan, ay sik fagfagtainanan namawayan ban tibak fagfagtainanan.

³ Ay ngay taw Igiptu ummomuy ban at amatanganan, ay namasayuan kban at ngay algan. Kanya ban fag ngay taw nanget gubuk sat ngay fagsegan, ay sa sangay labang, ay sa sangay mabara ay anggan sa sangay tagsaful gbalawvn.

⁴ Namafagtainan kban sa anya sik madot fag fun.” Katanya tam Fun, Yawi at Mabalyanan at longan.

⁵ Liskung ban Nilu umlanggang,

⁶ ay anggan talun Igiptu at ngay liskung umbalangug ay umkatat. Ay tangabat fag ngay makmak umlangke wan,

⁷ ay anggan at ngay tanuman sis tigyangan Liskung Nilu umlangke yangay. Ay umgong wan at munakbang sis Liskung Nilu fag ngay gamasun, ay umyango wan at ngay tanum sanya.

⁸ Ay ngay tagfangalbon sis Liskung Nilu gwayway, ay umbalu, ay ummomuy.

⁹ Ay ngay takawat at masine fag ramit umbalu yangay.

¹⁰ Ay ngay tagsimat ramit umbalu maksvn ay anggan tibak tagfakamulun sanya.

¹¹ Tagsis Suan fag fun at ngay fagsuguan wa ban e nasafulan. Ay Igiptu at fun at mamatanganan fag ngay tagfalu gfoyung sik yud e tungkul fag ngay fangatulun. Tain ro nu malong am sas Igiptu at fun te, “Ngay mamatanganan ami fag ngay taw, ay sik ngay fun ami at kasugfunanan”?

¹² Igiptu at fun, dada wan katsi am ngay taw at mamatanganan? Nu anud kanya fagayu sik ngay mamatanganan, nanginto o anya te, setain katsi Yawi at Mabalyanan at algan sas talun Igiptu.

¹³ Ay ansik yud mamatanganan Suan at fun at ngay fagsuguan, ay Memfis at ngay tagfangguna gadayan ban. Satu ro kafag ngay tagfunan tua tagfangguna ngay taw Igiptu, ay dewa katanya, kanya way at nadaya ngay taw.

¹⁴ Yawi nafasagsagan kafag ngay tagfangguna at famalun, laman wa matuyan fagayu taw Igiptu at fakamulun, kata sik tagalangu ginranugan glao sat nafangkokan.

¹⁵ Nusnga sinu fag taw sis talun Igiptu wa mafagubuk at sadili talun, dewa mabalyanan ay at yud e kwa, ay dewa takadungug ay at yud kadungug.

¹⁶ Ay ginanya ban fag ngay menit, ngay taw Igiptu gfaning kata sik mangena at yud mabitsug, ay kalimu gtadtaruyan aroro Yawi at Mabalyanan namaurianan.

¹⁷ Kanya ban fagayu kalimu taw Uda, nusdi lang nadungug at ngayan kalimu wan. Katanya Yawi at Mabalyanan at algan sa anya.

¹⁸ Ay ginanya ban fag menit, limak furuan sis talun Igiptu namaning Yawi at Mabalyanan, ay garingang Ebreu fag fangaringang. Ay kafag limak furuan at sadi at ngayan te, Menit fag Furuan.

¹⁹ Ginanya yangay ban fag menit, e nangawat ban sik fagirugan sas Yawi sis talun Igiptu, ay namoli yangay sik gang sat taba daga laman gamatang Yawi.

²⁰ Kanya ban sik fagsafulan ay famatuyan te, Yawi at Mabalyanan sis talun Igiptu. Ay nu ginain ngay taw Igiptu nu get gubuk sas Yawi, aroro gidapan tibak taw nu gfalingun anya, Yawi sumugu ban tibak taw at nanggubuk ay at namalangfe anya.

²¹ Yawi ban namatoglag at sadili sanya fag ngay taw, ay ginanya yangay ban fag menit kafag ngay taw tumoglag Yawi, ay gseg ban anya ay namon sa anya nusnge wain fag fanggalangun. Ay namatuyanan ban sas Yawi, ay namafasludan at ngay nafatuyanan.

²² Yawi ban namaurianan kanya fag ngay taw Igiptu, ay dewa katanya, namafia yay ban anya. Kanya fag ngay taw nangakbang sas Yawi, ay Yawi gbalus ban at darangin ay gfafia.

²³ Ginanya ban fag menit, umke dalan siginans talun Igiptu sitsigons Asirya. Ay ngay taw Igiptu ay ngay taw Asirya gfoyfolian ban gugat, ay magamut ban gseg.

²⁴ Ginanya ban fag menit, taw Israel nangagamut sa sangay taw Igiptu ay Asirya. Ay kanya fag tuluk talun at ngay taw sik mauseganan sas fagdaul daga.

²⁵ Yawi at Mabalyanan mamanyun ban anya fagayu ay glong te, “Gfamanyun au ku ngay taw Igiptu, ay ngay taw Asirya, ku ngay nawat, ay taw Israel ku fagagbilugun.”