Isayas 1 - Fanawbuid tagsibaliwas Fakayabian

¹ Tuy fag fafil gfayamag sabaliwas Dius at nafalag fag taginfan sas Isayas, Amus at baguama, sabaliwas Uda ay Erusalem ebi gina Usya, Utam, Akas ay Esekyas gtudtubusan gfunan sis Uda.

Sik Tagasalanan fag Talun

² “Au, Yawi, glong au te, am tagsis banwa ay tagsis daga, dungugani! Nalaga au ay nafagurang ku ngay sisian fag ngay taw Israel, dewa katanya, kanya fagayu kamabo way angku.

³ Ngay baka gtoglag tua at tagalaga, ay ngay asnu saful tua nu dada at fagnamafangonan, dewa katanya, ku ngay taw Israel wa gtoglag angku, ay we fagsafulun.”

⁴ Ida! Kanya fagayu ngay tagasalanan way, ay sik gaban taw tagfakamulun at mauri sat iba. Ay sas fagdaul at talun maksvn wan at fagmauriun, nu katanya kanya fagayu kata nu gbuba at mabyat fag famubaun. Am fag ngay taw at maksvn nu mauri, natalyuyan am Yawi, nafalingun am Israel at Dius at yud e Malong, ay wam gfaning ya anya.

⁵ Ngay taw Israel, wain ay fakamaboun gugat? O nunda kaylat am gafaurianan? Kabavn ay amatanganan wa mabayan, anggan ay basad taw anmomuy.

⁶ Ay siginan ay alfuyu sitsigon ay basad darafa e fakasaitun wan; fagdaul ay bilug nalayungan wan, ay e fagafalanganan, ay e ngay fakarukan. Kafag ngay fakasaitun kabaga, ay wa kafutus ya ay we famafia.

⁷ Ay talun anrasras wan ay nirug wan ay ngay furuan. Ay tibak talun at ngay taw naago siginan ayu ay ngay gamasun, ay nalag wam fia kanya fagayu nu grasras. Nu katanya, kanya fagayu we fanambagun ya.

⁸ Ay furuan Erusalem kata way lang sik bale famoy swabilug tanuman wat ubas, ay kata yangay sik bale fagulitan swabilug tanuman unduy ay kata sik furuan at maligungan at ngay fawayan.

⁹ Yawi at Mabalyanan ro way nafasawad ya antam, ankata wa ro tam Suduma ay Gumura.

¹⁰ Ay am fag ngay tagfangguna sis Suduma, dungugani fia Yawi at longan sa ayu, ay am fag ngay taw Gumura asafuli Dius at ngay faugali.

¹¹ Katatuy Yawi at longan te, “We tungkul sa angku ay ngay fanggalangun dewa ngayu. Kasuya kwan ay ngay fagirugun fag ngay tupa anggan ay fanggalangun fag ngay baka at taba. Ay kwa guseganan ya ay fanggalangun fag ngay baka ay ngay kambing at taguk.

¹² Sinu at nasugu ayu laman namuba am sa angku ay fanggalangun? Faragangi wan nu gfauri am ku bale.

¹³ Faragangi wan nu gfon am sa angku ay ngay fanggalangun, wa ngap e tungkul. Kauri kway gayuk ay ngay famaebebanglu fag lune at ayuk. Maksvn nu kauri au ayu galay am maful sabaliwa Magdanun nu Bagu Kasure ay Famiangalay fag Menit, aroro dewa ngap am maful, mauri way ay fakamulun.

¹⁴ Kauri kmandi nu maful am sabaliwa Magdanun nu Bagu Kasure ay tiba ya ay fagmafulun. Kwa magwanta takatanya ay fagmafulun, kata nu e famubaun au at mabyat.

¹⁵ Dewa ngap am gdarangin gugat, kwa kasalag ayu. Ay dewa malayun nu gdarangin am, kwa gdungugan ayu, aroro ngayu wan ay nafabul taw.

¹⁶ Fasinei wan ay ngay sadili kata nu gigus am. Faragangi wan nu gfakamulun am at mauri sa ku daga salubangan.

¹⁷ Ananadi fakamuluni at masine, ay ugalii at matuyan. Ay gubuki fagayu tagafalingunan. Fasudsudani tua nu ggubuk am dewa sat yud e fagtainan ya. Ay lag gfabayan ngay fagbubayun nu gafalingunan.”

¹⁸ Yawi glong te, “Wainyayam, gyadyamagan watam! Dewa maksvn ay fagmauriun namalaksi au ayu, kata nu gbakbak at masuya fag ramit ay at kinfegus wan, laman umkata am sik dingin at barugwak nu malaksi.

¹⁹ Nu gfaning tua ban am angku, gfon kban ayu ngayuk gutluan siginan ay daga, laman ay fakonun.

²⁰ Dewa katanya, nu gfataglayun way ban am kamabo angku, matuyan kabul ban am. Umfasludan takatatuy, aroro au Yawi taglong tuy.”

Sik Tagasalanan fag Furuan

²¹ Amatangani! Ebi furuan Erusalem sik matuyan oma fag furuan, ay katsi, kata way sik takamatugtug fag mangena. Ebi ngay taw tagbanwan sanya, matuyan oma, ay katsi, sik ngay takamabul way.

²² Furuan Erusalem, am sanbung salapi ankata sik gang, ay am fanlangu, anke suglat mamam.

²³ Am nafili fag ngay tagfangguna sik ngay takamabo way, ay ansadi sa sangay tagfangkamul. Ay kanya fagayu kaylat gbul ngay famaylatan fag ngay famayad anggan ngay famonun. Ay wa ggubuk at yud e fagtainan ya, ay wa kasalag ngay fagbubayun nu nke fagidapun.

²⁴ Nu katanya, em Fun, Yawi at Mabalyanan, Israel at Dius glong te, “Dungugani! Namadasug kban ku dotama ay namasud ku ngay fawayan siginan sik maksvn fag faurianan.

²⁵ Gfadasug kban sa ayu ku faurianan laman namasaman ayu siginan ay maksvn fag fagmauriun, ay umkalyam wan ay ngay asalanan.

²⁶ Ay gdog kyay ban nanfili sik ngay tagwabilug ay sik ngay tagfalu longan laman sa ayu. Ay ay furuan ban kangayan te, sik matuyan ay tagkasakan fag furuan, aroro ngay tagbanwan sanya masine ay matuyan at ugali.”

²⁷ Aroro sit kamatuyanan, furuan ban Erusalem, umlangfe, ay fagayu ban at nafababaun ay naubun at ngay asalanan umsik matuyan.

²⁸ Dewa katanya, ngay takamabo ay ngay tagasalanan gsud ban gafaurianan, ay at kinyayu siginans Yawi umkamin ban.

²⁹ Am fag ngay taw sis Erusalem, maksvn ban nung am kapla, aroro naseg wayam ngay fun kayu daul, ay fagsegun te, umke fagmanabayanun am, ay gina am gseg ay ngay tanum ay nafangayan te, yud e malong.

³⁰ Umkata ban am sik fun kayu takarabas at ngay don, ay kata sik tanuman at kin-gong wan.

³¹ Ay at mabalyanan ban fag taw umkata sik baruk, ay at fakamulun kata sik batsio, ay fagdua umsik igang, ay wa ban e mafarabung ya kanya fag afuy.