Galasya 6 - Fanawbuid tagsibaliwas Fakayabian

Gudgubukani

¹ Ku ngay faduksay, ay faduksay nu nke asalanan way, am at ke Masine fag Falad gubuki anya laman umfoli nu gafanud sa tam Fun. Fakamatoani anya manabayan, dewa katanya, dirii tua laman diam gaaloan anya.

² Gubuki tua nusnga sinu si ayu at ke fagidapun. Takatanya fag balyawvtan gfaning tuam tam Fun Isus at suguan.

³ Ay nusnga sinu tagamatangan te, “Gtungud ktua ku ngay iba,” ay nu dway matuyan, kanya gdaya way at sadili.

⁴ At masine galay am at sadi amatangani tua gugat te, o masine tua ay fakamulun. Ay nu matuyan tua, useganani. Dewa katanya, lag gfaladlabian ay sadili say ngay iba.

⁵ Aroro at masine galay sik taw bubai at mesa famubaun.

⁶ Nusnga sinu tagadal Dius at Longan masine nu ggubuk ay nu gfon sat takamoyung nusnge wain at masine.

⁷ Lag am kamuag, aroro Dius di gadayan. Nusnga setaw sik taw at natanum, katanya yangay ban at faggutluun.

⁸ Ay nusnga sinu fag taw at fagugatanun gtanum nu sa way at bilug at fakaylatun, umdasug ban sas faurianan. Dewa katanya, tagugatan tua gtanum sabaliwa at Masine fag Falad, kanya ban gumutlu leleg at yud e fakatabuan siginan at Masine fag Falad.

⁹ Nu katanya, lag tam kamomuy gfakamulun at masine. Nu ndasug ban sit filian fag menit, matuyan mul ban tam at famonun nu ddi tam anmomuy.

¹⁰ Nu katanya, kaduge nu e buknga, fakamuluni tua at masine sas fagayu taw, kaugat wan sa tam ngay faduksay tagafanud.

Taguyan fag Famasaful

¹¹ Nu glag am ku rirukan, gbia nu marirukan; au at nariruk takatanya.

¹² Ngay taw tagfabulun ayu te, “Fae fakatoglagani,” kaylat way tibak taw Udyu nu gfauseganan anya. Aroro takatanya fag taw kalimu at ngay iba nu namaurianan anya, nu nafoyung way ro te, tam Fun Isus at nabulanan at mafalangfe taw.

¹³ Kanya fagayu dewa e fakatoglagan, wa gfaning Muisis at Faugali, ay gfabulun way ayu te, “Fae fakatoglagani,” laman siginan at foyungan kamatungudun te, anke fakatoglagan tuam.

¹⁴ Lag au nangus kamatungudun, nu dway sabaliwa tam Fun Isus at nabulanan sas fasulungan kayu. Aroro siginan takatanya, fagayu nusnge wain ste sfagdaul daga we tungkul ya sa angku, ay anggan au kwa yangay e tungkul ya sas fagdaul daga.

¹⁵ Nu katanya, wa mafanud ya dewa e fakatoglagan ay yud e fakatoglagan. At mafanud, Dius tua nu gfabagu antam.

¹⁶ Dius at fagmanabayanun ay at fakafanyun sumawa nangus fia at ngay taw tagfaning takatanya fag foyungan.

¹⁷ Ay siginan ban nangus katsi, nusnga sinu fag taw lag gfamut ya ku fagidapun. Aroro ku ngay fangtat wan tagfatuyan te, au wan Isus at fagsuguan.

¹⁸ Ku ngay faduksay, sumawa nangus fia ayu tam Fun Isus at fagmagalangun. Anud.