Galasya 5 - Fanawbuid tagsibaliwas Fakayabian

Isus Nafalfas tua Antam

¹ Katsi bunwa tam sik fagsuguan ya, aroro tam Fun Isus nafalfas tua antam. Nu katanya, mabakvdi tua sa ay fagafanudun, ay lag am gdog ya nangafagsuguanan.

² Au Pablu glong au ayu te, amatangani ku longan ayu. Nu nafae fakatoglagan am laman gamatangan am te, umsik matuyan sas Dius at daga salubangan, gfae yud wam e tungkul tam Fun Isus at nafakamulun.

³ Gdog kyay gfoyung ayu te, nusnga sinu tagfae fakatoglagan, masine nu gfaning tua fia Muisis at Faugali fagayu.

⁴ Nusnga sinu tagugatan laman umsik matuyan sas Dius at daga salubangan siginan nu gfaning Muisis at Faugali, ansaruayan wan siginan tam Fun Isus, ay siginans Dius at fagmagalangun.

⁵ Dewa katanya, em fagsegun ay em fagafanudun siginan at Masine fag Falad, Dius gtap tua emi kata nu yud ami e asalanan.

⁶ Aroro nusnga sinu at kinsadi sa tam Fun Isus, we tungkul ya dewa e fakatoglagan ay yud e fakatoglagan. Nu bunway, at mafanud, ke fagafanudun tua takalag sit fakamulun siginan nu mafangesug.

⁷ Ebi masine oma ay ngay fakamulun. Sinu at nasalag nu gfakamulun am at matuyan?

⁸ Matuyan, bunwa Dius at nafaragang nu gfakamulun am takatanya, aroro sia wan at nafili ayu.

⁹ Kata sik faydayuanan te, sik famabia tinapay dewa alay way mafabia way fagdaul tinapay.

¹⁰ Aroro siginan tam fagmasadiun sa tam Fun, natuyan au te, diam gfabadbalian ay amatanganan sabaliwa tibak foyungan. Ay natuyan kyangay te, Dius ban gfaurianan nusnga sinu fag taw at nafamomuy ay ngay amatanganan.

¹¹ Ku ngay faduksay, e glong te, gfoyung au te, masine fagayu taw nu gfae fakatoglagan laman katap kata nu yud e asalanan. Nu matuyan di takatanya, wain ngay taw at fagfauriun yay gugat angku? Nu gfoyung kway ro takatanya, wa ro e tungkul tam Fun Isus at nabulanan sas fasulungan kayu.

¹² Ngay taw tagfamomuy ay ngay amatanganan, kanya fagayu dangay lang gfae fakatoglagan nu bunway gatvngi wa daul.

¹³ Ku ngay faduksay, Dius nafili ayu laman diam sik ngay fagsuguan ya. Dewa katanya, at fagnafalfasun ayu bunwa laman namaning am ay bilug at fakaylatun, nu bunway edkesugani tua ay gudgubukani.

¹⁴ Aroro Muisis at Faugali fagdaul ansadi sa sik suguan te, “Esugi am iba kaksvn nu kesug o emu.”

¹⁵ Dewa katanya, nu gawayan way am gugat kata ngay mangilafang, umkamin am.

At Masine fag Falad ay Taw at Ugali

¹⁶ Nu katanya, glong au ayu te, ugalii tua kata at Masine fag Falad at fakaylatun, ay lag gfaning ay sadili fakaylatun.

¹⁷ Aroro tam bilug at ngay fakaylatun wa gfadiuganan at Masine fag Falad at fakaylatun. Ay at Masine fag Falad at fakaylatun wa gfadiuganan tam bilug at ngay fakaylatun. Kanya fag dua gbadbaboan way. Nu katanya way, wam mafakamulun ay fakaylatun gfakamulun at masine.

¹⁸ Dewa katanya, nu at Masine tua fag Falad tagsi ayu, wam gagbilugan ya Muisis at Faugali.

¹⁹ Wa kasuksuk tam bilug at ngay fakamulun: fagfanugtugun, ay fagnamatugtugun, ay at mauri fag ugali, ay fagmauriun,

²⁰ ay nu gseg at yud matuyan fag ngay fagsegan, ay fagfangufitun, ay fakauriun ay iba, ay fakamawayanun, ay fagfangalabianun, ay fagfangadotamaun, ay fakamasadiliunun, ay fagbadbaboanun, ay faginkafudanun,

²¹ ay fagfangasulupun, ay fagfangalanguun, ay fakamasaweun nu guseganan sat mauri, ay tiba yak ugali takatanya. Gfararang au kata ebi taguna ku foyungan ayu te, nusnga sinu tagfakamulun takatanya wa ban umtap sas Dius at fagfagtainanan.

²² Dewa katanya, katatuy tua takalag si sik taw at leleganan siginan at Masine fag Falad at gubuk: kanya mafangesug tua, ay guseganan, ay manabayan, ay magwanta, ay mafangafanyu, ay e fagmasineun, ay mafamaning,

²³ ay malukme, ay gfaragang at sadili. We suguan tagsalag takatanya fagayu.

²⁴ Nusnga sinu at kinsadi sa tam Fun Isus, kanya naubun wan at dan fag ugali ay at mauri fag fakaylatun.

²⁵ Dakngani gbanwan watam sit Masine fag Falad at fagmabalyananun, fataglayuni nu gfaning tam anya.

²⁶ Lag tam kamatungudun, ay lag gfauri tam ngay iba, ay lag gfangalabian.