Galasya 4 - Fanawbuid tagsibaliwas Fakayabian

¹ Katatuy ku longan at masuad. At nangagbilug ban kaduge nu masisian, kata yay sik fagsuguan, dewa ban kanya tagagbilug fagayu.

² Ay nafatigwanan anya sa sangay tagalaga, yakmay andasug sit mama at nafalganan fag menit.

³ Ay anggan itam, gafagsuguanan tam fagdaul daga at ugali, gina tam yud gafanud sa tam Fun Isus.

⁴ Dewa katanya, gina andasug at nafalganan fag menit, Dius nasugu at baguama ste swa daga. Kanya ansalug siginan sik mangena, ay gugali gfaning Muisis at Faugali.

⁵ Kanya namalfas fagayu taw tagbanwan sis Muisis at Faugali at fagmabalyananun, laman Dius gtap tua antam te, at ngay sisian.

⁶ Aroro Dius tua tam at ngay sisian, kanya nafon antam at Baguama at Falad laman mauro tam anya te, “Mama.”

⁷ Nu katanya, katsi bunwa tam sik ngay fagsuguan ya, nu bunway at ngay sisian tua tam. Ay aroro Dius tua tam at ngay sisian, magbilug ban tam at ngay fatuyanan.

Pablu Kesug ngay Tagafanud sis Talun Galasya

⁸ Ebi, gina am yud natoglag Dius, gafagsuguanan am tibak fagsegan.

⁹ Ay katsi natoglag tuam Dius, ay at mafanud, Dius tua at natoglag ayu laman at ngay sisian. Nu katanya, wain ay fagfaningun yay ngay foyungan at yud e tungkul ay at yud e fanambagun? Wain ay fakaylatun yay nangafagsuguanan takatanya fagayu?

¹⁰ Nustua, e nafili am menit, magdanun ay banwa, ay tiba yak buknga.

¹¹ Nu katanya, gafanawa au te, fangulan way ban manga ku ngay nainlufuyan laman sa ayu.

¹² Ku fakesugun fag ngay faduksay, gurungan au glong sa ayu te, ugalii tua kata angku, nu malfasan au siginan takatanya fagayu, aroro ankata au ayu fag ngay yud Udyu, at kinkalfas wan sa kafag ngay faugali. Wam nafakamulun at mauri sa angku.

¹³ Saful am te, anke fakasaitun kway ku fagnafoyungun sa ayu at Masine fag Barita ebi taguna.

¹⁴ Dewa ku fakasaitun sik famaskud sa ayu, diam nafalingun angku ay diam nafauri. Nu bunway nafasakbo tuam angku kata nu gfasakbo am Dius at tagbarita, ay kata nu gfasakbo am tam Fun Isus.

¹⁵ Dada wan ebi ay fagusegananun ay nafalag sa angku? Natuyan au te, nu masine di, nagulad wam ay mata ay nafon sa angku.

¹⁶ Ay katsi, o gfangayan wam angku te, ay fawayan aroro nafoyung au at matuyan sa ayu?

¹⁷ E ngay taw sanya maksvn nu gfaylatan ayu, dewa katanya, at algan wa matuyan. Kanya fagayu kaylat way gfasaruayan ayu siginan angku, laman kesug am anya.

¹⁸ Kanya fagayu masine way ggubuk ayu, nu masine tua at algan, deyud au sanya ay sanya kman.

¹⁹ Ku ngay sisian, gdog au gidapan kata sik mangena tagafasalugun yakmay kban nalag te, siwa ayu tam Fun Isus at ugali.

²⁰ Nasanya kyay nangus, ay namakamatoan ayu aroro maksvn nu gafanawa au ayu.

Faydayuanan sabaliwas Agar ay Sara

²¹ Ay katsi, longi sa angku te, fagayu am takaylat gfaning Muisis at Faugali, o yam nasaful at masuad kafag faugali at fagyalongun?

²² Anriruk wa te, Abrayam e duak baguama. At sadi siginan way at fagsuguan fag mangena, ay at sadi siginan tua at mangena fia.

²³ At baguama sit fagsuguan ansalug tua fia kata tibak sisian. Dewa katanya, at mangena fia at sisian ansalug laman gfafasludan Dius at fatuyanan.

²⁴ Tuy sik faydayuanan. Kafag duak mangena kata duak nasadian. Agar fag fagsuguan, kata at nafon fag nasadian sis Buksul Sinay. Fagayu at kinsalug siginan anya, sik ngay fagsuguan yangay.

²⁵ Agar, sik fafaskudanan Buksul Sinay sis talun Arabya, ay kata yangay katsi fag furuan Erusalem aroro kanya anggan at ngay sisian sik ngay fagsuguan way lang.

²⁶ Dewa katanya, tagsis banwa fag Erusalem bundi fagsuguan, kanya wan tuga tam mina.

²⁷ Kata at marirukan sis Dius at Longan te, “Uroi useganani, o fag mangena at yud batang gdalan fagidapun sabaliwa nu gfasalug. Aroro am mangama dewa naubun emu, am sisian ban ayu yap tua tibak mangena at magamut tua gugat at mangama.”

²⁸ Ku ngay faduksay, am wan Dius at ngay sisian siginan Dius at fatuyanan, kata Isak nu kasalug.

²⁹ Ginanya, sik sisian at kinsalug maugali gfauri sik sisian at kinsalug siginan at Masine fag Falad at fagmabalyananun. Kata kanya takafasludan katsi.

³⁰ Dewa katanya, katatuy at rirukan sis Dius at Longan: “Aiyani wan am fagsuguan fag mangena ay at sisian. Aroro kafag fagsuguan fag mangena at sisian wa masine nange afud sat yud fagsuguan fag mangena at sisian at fagnangagbilugun ban.”

³¹ Nu katanya, ku ngay faduksay, bundi tam sik fagsuguan fag mangena at ngay sisian, nu bunway, itam at yud tua fagsuguan fag mangena at ngay sisian.