Galasya 3 - Fanawbuid tagsibaliwas Fakayabian

Nu Gfaning Faugali ay mannga Fagafanudun

¹ Am fag ngay taw Galasya wam mamatanganan! Kata nu e nafasagsagan ay amatanganan. Mayamag oma at foyungan sa ayu sabaliwas Isus tam Fun at nabulanan sas fasulungan kayu.

² Ginto au sa ayu te, o at Masine fag Falad antayuk sa ayu aroro nafaning am Muisis at Faugali, o mannga aroro nafanud am sa ay nadungug fag Masine fag Barita?

³ Wam mangaro mamatanganan! Nafasigad am ay bagu fag leleg siginan at Masine fag Falad at gubuk, ay wain yay ay fagugatanun yay nangasik matuyan siginan ay sadili fagmabitsugun?

⁴ O we masuad ya sa ayu ay nagdalanan? Malgau sabv yay.

⁵ Ay ginto kyay fia sa ayu te, o Dius at fagnafonun sa ayu at Masine fag Falad ay at fagnafakamulunun sa ayu at madulo, o aroro gfaning am Muisis at Faugali? Duan! At Masine fag Falad gbanwan si ayu, aroro siginan ay nadungug ay ay fagafanudun sat Masine fag Barita.

⁶ Katanya yangay Abrayam at nagdalanan. “Kanya gafanud sas Dius, ay Dius natap anya kata nu yud e asalanan.”

⁷ Nu katanya, mayamag wa te, fagayu tagafanud sas Dius Abrayam at ngay sugfun.

⁸ Dius at Longan nafoyung ebi te, Dius gtap yangay yud Udyu fag ngay taw kata nu yud e asalanan, aroro siginan at fagafanudun. Ay Dius nafoyung yangay at Masine fag Barita sas Abrayam te, “Siginan emu, gfadante kban fagayu talun at taw.”

⁹ Abrayam gafanud sas Dius, ay Dius nafon sa anya nusnge wain, ay anggan sas fagayu tagafanud sa anya.

¹⁰ Umfaurianan ban ngay taw tagamatangan te, umtap kata nu yud e asalanan siginan nu gfaning Muisis at Faugali, aroro katatuy at kinriruk: “Umfaurianan ban nusnga sinu fag taw at yud gfaning at kinriruk sis Muisis at Faugali fag fafil.”

¹¹ Nu katanya, mayamag wa te, Dius wa gtap nusnga sinu fag taw kata nu yud e asalanan siginan nu gfaning at faugali, aroro e rirukan te, “Sik taw at kintap kata nu yud e asalanan nu siginan tua at fagafanudun sas Dius, kanya ban gleleg tua.”

¹² Muisis at Faugali wa siginans fagafanudun. Aroro e rirukan te, “Nusnga sinu fag taw tagfaning Muisis at Faugali, kanya gleleg tua.”

¹³ Wa tam mafafaning Muisis at Faugali fagayu, ay nu katanya, Dius nafaurianan antam. Tam Fun Isus anfaurianan laman sa antam, ay nafalfas antam siginan takatanya fag faurianan. Aroro katatuy at kinriruk sit Rirukan te, “Nusnga sinu at kinrabing sa sik kayu gafaurianan.”

¹⁴ Dius nafakamulun takatanya laman at nafatuyanan ebi sas Abrayam umfasludan yangay sas yud Udyu fag ngay taw siginan tam Fun Isus, laman siginan tam fagafanudun sa anya, magbilug tam at Masine fag Falad, Dius at nafatuyanan.

Muisis at Faugali ay Dius at Fatuyanan

¹⁵ Ku ngay faduksay, gfoyung au sa ayu sik faydayuanan te, sik nasadian nu nkaksvn wan, nusnga sinu wa mafabali ay wa mafamut ya.

¹⁶ Dius nafatuyanan sas Abrayam ay sat ngay kasugfunanan. Nu gfatuyanan, wa nalong te, “sa ban am ngay kasugfunanan,” at masuad, ngayu, nu bunway, nalong way te, “sa ban am kasugfunanan,” at masuad, sadi way. At fagfatungulan tam Fun Isus wan.

¹⁷ Katatuy ku longan at masuad: nu nlangfe ufatk sandan tuluk safuluk banwa, Muisis at Faugali andasug, ay kanya wa namae yud e tungkul Dius at nasadian sas Abrayam, ay wa mafayud e masuad at fatuyanan sa anya.

¹⁸ Aroro kanya fag famonun nu siginan way tam fagfaningun Muisis at Faugali, bunwa siginans Dius at fatuyanan. At matuyan, kanya fag famonun andasug sa antam siginan Dius at fatuyanan sas Abrayam.

¹⁹ Nu katanya, wain at fagnafonun yay Muisis at Faugali? At fagnafonun laman ngay taw sumaful te, e asalanan, ay umfasludan takatanya sitsigon at nafatuyanan sas Abrayam at kasugfunanan. Dius nafon kafag faugali sat ngay tagbarita, ay kafag ngay tagbarita nafoyung sa sangay taw siginan sik tagwabilug.

²⁰ Dewa katanya, wa kata kanya Dius at fatuyanan. Kanya nu gfon sas Abrayam kafag fatuyanan, bundi siginan sik tagwabilug ay siginan sangay tagbarita, nu bunway siginan tua fia anya.

Ngay Sisian ay ngay Fagsuguan

²¹ O Muisis at Faugali at masuad wa gfadiuganan Dius at fatuyanan? Duan! Katatuy at masuad. Aroro kafag faugali nu mafae leleg di taw, Dius ro gtap fagayu taw kata nu yud e asalanan siginan at fagfaningun kafag faugali.

²² Ay Dius at Longan nafoyung sa antam te, fagayu taw sas fagdaul daga gafagsuguanan asalanan. Nu katanya, fagayu tagafanud sas Isus tam Fun magbilug tua ban Dius at ngay fatuyanan.

²³ Dewa katanya, gina tam yud gafanud, maubungan tam sis Muisis at Faugali at fagmabalyananun yakmay nafoyung sa antam tam fakalangfean siginan tam fagafanudun.

²⁴ Nu katanya, Muisis at Faugali tagalaga antam yakmay tam Fun Isus andasug, laman siginan nu gafanud tam sa anya, Dius gtap antam kata nu yud tam e asalanan.

²⁵ Ay katsi e fagafanudun tua tam, ay Muisis at Faugali we fagmabalyananun ya sa antam.

²⁶ Siginan nu nsadi am sa tam Fun Isus, anngayan am te, Dius at ngay sisian, aroro gafanud am sa anya.

²⁷ Ay ansadi am sa tam Fun Isus siginan nu kasurung am, ay gugali am kata anya.

²⁸ Nu katanya, we fagsamanun ya taw Udyu ay yud Udyu, ngay fagsuguan ay yud fagsuguan, mangama ay mangena. Fagayu am masadi tuam aroro sa ay nasadian sa tam Fun Isus.

²⁹ Dakngani am wan tam Fun Isus at taw, am wan at matuyan fia Abrayam at ngay kasugfunanan at nangagbilug Dius at ngay nafatuyanan.