Galasya 2 - Fanawbuid tagsibaliwas Fakayabian

Pablu ay Tiba yak Nasugu

¹ Ay nu nlangfe labi ufatk banwa, gdog kyay nalo sas Erusalem gadgaloan Bernabe. Ay nataban kyangay Titu.

² Anfoli kway sas Erusalem aroro Dius nafasaful angku te, sanyai fag furuan. Ay gina au sanya, nafayamag au sa sangay tagfangguna sabaliwa at Masine fag Barita ku nafoyung sas yud Udyu fag ngay taw. Ay nafakamatoan au anya fagayu gina yud sanya tibak taw, aroro kwa kaylat nu dway ban e tungkul ku nainlufuyan at kinlangfe ay anggan katsi.

³ Ku ufud Titu, dewa sik taw Gresya, we nafabulun anya te, “Fae fakatoglagani.”

⁴ Fakatanyaun, aroro ngay taw takamaningan te, gafanud, ansuglat si antam laman masuksuk ginsaful te, tain tam Fun Isus nu gfalfas antam, ay kanya kaylat nu gdog tam gafagsuguanan Muisis at Faugali.

⁵ Dewa katanya, wami nafaning at fakaylatun nusdi alay, laman ban si tua ayu at Masine fag Barita at fagmatuyanun.

⁶ Dewa katanya, ngay tagafanud at ngay tagfangguna we nafamut ya ku foyungan. Baliwan nu sa angku, nusnga sinu fag taw gsud way, aroro Dius we fagfili.

⁷ Nu bunway kanya fagayu nasaful te, Dius nafatigwanan sa angku laman namoyung au at Masine fag Barita sas yud Udyu fag ngay taw, kata Pedru nu gfoyung sa sangay taw Udyu.

⁸ Aroro Dius nafili Pedru laman kamoyung sa sangay taw Udyu, ay kanya yangay fag Dius at nafili angku laman at nanfamoyung sas yud Udyu fag ngay taw.

⁹ Santiagu ay Pedru ay Uan at ngay kintoglag te, tagafanud at ngay fagtainan, nasaful wa te, Dius nafon yangay angku fagmakatuun laman kamoyung kyangay at Masine fag Barita. Nu katanya, kanya fag tulu naylat emi Bernabe laman at nanfamoyung yangay at Masine fag Barita. Ay nadiuganan ami te, ami Bernabe at nanfamoyung sas yud Udyu fag ngay taw, ay Santiagu ay Pedru ay Uan at nanfamoyung sa sangay taw Udyu.

¹⁰ Ay kanya fag tulu nalong sa emi te, lag gfabayan ngay yud e kwa, ay katanya wa fia ku fakaylatun ku fagnamakamulunun.

Pablu Nagras Pedru

¹¹ Gina Pedru andasug sas furuan Antiukya, nagras au anya sis fagngayuan taw, aroro mayamag te, nu gfakamulun gsalan.

¹² Aroro gina Santiagu at nasugu fag ngay mangama yud yay andasug, Pedru gfangon gfasfuan yud Udyu fag ngay tagafanud. Ay dewa katanya, Santiagu at ngay nasugu nu ndasug, Pedru wa kaylat ya gfasuglatan at yud Udyu fag ngay tagafanud, aroro kalimu ngay tagfoyung te, at yud Udyu fag ngay tagafanud masine nu gfae fakatoglagan.

¹³ Anggan tibak tagafanud fag ngay taw Udyu nafaningan Pedru, kanya fagayu dewa nasaful te, gsalan way. Ay anggan Bernabe nafaningan wan.

¹⁴ Ay nu nalag au te, at ngay fakamulun wa matuyan ay wa gfaning at Masine fag Barita at fagmatuyanun, sis salubangan fagayu taw nalong au sas Pedru te, “Sik taw Udyu oma o, ay dewa katanya, gfaning yay o at yud Udyu fag ngay taw at faugali. Wain am fagfabulunun sas yud Udyu fag ngay taw te, faningi taw Udyu at faugali?”

Fakalangfean sa tuas Fagayu Taw

¹⁵ Ami fag ngay taw Udyu gina ami ansalug, dimi kata at yud Udyu fag ngay taw tagasalanan.

¹⁶ Dewa katanya, nasaful ami te, Dius gtap sik taw kata nu yud e asalanan siginan nu gafanud sas Isus tam Fun, ay bundi siginan at nafaningan Muisis at Faugali. Ay gafanud yangay ami sa tam Fun Isus laman Dius gtap emi kata nu yud ami e asalanan siginan nu gafanud ami sa tam Fun Isus, ay bundi siginan nu gfaning Muisis at Faugali. Aroro Dius wa gtap nusnga sinu fag taw kata nu yud e asalanan nu siginan way nu gfaning kafag Faugali.

¹⁷ Ay nu gugatan ami nangatap kata nu yud e asalanan nu siginan oma em fagafanudun sa tam Fun Isus, ay nu ntuyan way te, gasalanan yaymi, o malong ami te, tam Fun Isus nafae asalanan emi? Duan!

¹⁸ Nu gdog kyay nangugali kata Muisis at Faugali, au yay tagfatuyan te, e asalanan kyay.

¹⁹ Siginan yay Muisis at Faugali, nasaful au te, we fagmabalyananun ya sa angku kafag Faugali, laman gugali ktua gfaning Dius.

²⁰ Ay kata nu nbul au sas fasulungan kayu gasfuan tam Fun Isus, ay katsi ku ugali gfaning ktua tam Fun Isus. Ay kaduge au gleleg ste swa daga, gafanud au sas Dius at Baguama at nesug angku ay at nafon at sadili laman sa angku.

²¹ Kwa gfayud e tungkul Dius at fagmagalangun. Aroro Dius nu gtap sik taw kata nu yud e asalanan nu siginan way nu gfaning Muisis at Faugali, wa ro e tungkul tam Fun Isus at nabulanan.