Galasya 1 - Fanawbuid tagsibaliwas Fakayabian

¹ Au Pablu, sik nasugu, bundi taw at nafili ay at nasugu angku, nu bunway tam Fun Isus tua ay Dius tam Mama, kanya at nafadog nafaleleg Isus siginans fagmabulanan.

² Iste yangay tam ngay faduksay ku faudgufudan, gina au griruk sa ayu fag ngay tagafanud at nangaful sa sangay furuan sis talun Galasya.

³ Sumawa nangus fia ayu Dius tam Mama ay tam Fun Isus at fagmagalangun ay at fagmanabayanun.

⁴ Tam Fun Isus nafon at leleg laman gfalyam tam ngay asalanan, kata tam Dius at fakaylatun, laman gfalangfe antam siginans fagmauriun tagfunan ste swa daga.

⁵ Segi tam Dius kabavn ban. Anud.

We Tibak Masine fag Barita

⁶ Ku ngay faduksay, kadulo au te, at kasakit nu gubun am Dius, at nauro ay at nafili ayu siginan tam Fun Isus at fagmagalangun sa ayu. Kanya tua at Masine fag Barita. Dewa katanya, katsi nafaning way am sik bagu fag foyungan ay namatangan te, kanya wan at masine fag barita.

⁷ At matuyan, we tibak masine fag barita. Ku fagnalongun katanya, e gfasagsagan ay amatanganan ay gugatan namabali at Masine fag Barita sabaliwa tam Fun Isus.

⁸ Dewa ami ay mannga sik tagbarita siginans banwa tagfoyung ayu tibak masine fag barita tagsaman em fagfoyungun sa ayu fag Masine fag Barita, Dius nangus gfaurianan anya.

⁹ Gdog au glong, kata ebi em longan te, Dius nangus gfaurianan ban nusnga sinu tagfoyung tibak masine fag barita tagsaman ay nafaning.

¹⁰ O ku fagnafoyungun takatanya laman ngay taw gfauseganan angku? Duan! Ku fakaylatun Dius tua tagfauseganan angku. Nu kaylat kway ro ngay taw nu gfauseganan angku, bunwa au tam Fun Isus at fagsuguan.

Dius Nauro Pablu

¹¹ Ku ngay faduksay, kaylat au nu nasaful am te, bundi siginans taw ku foyungan fag Masine fag Barita.

¹² Ay bundi taw at nafoyung angku, tam Fun Isus tua.

¹³ Nadungug wam ku ugali gina au gfaning taw Udyu at fagafanudun, nafaidapan au Dius at ngay taw ay naugatan kyangay namamin kanya fagayu.

¹⁴ Ay gtungud kyay ku ngay ibama gina au gfaning taw Udyu at fagafanudun. Ay au amaseganama kyap tua gfaning em ngay mangaguyang at faugali.

¹⁵ Dewa katanya, aroro siginan Dius at fagmagalangun, kanya nafili tua angku siginan yay nu yud au ansalug, ay nauro angku laman at fagsuguan.

¹⁶ Kanya nafasure sa angku at Baguama laman nanfamoyung au at Masine fag Barita sas yud Udyu fag ngay taw. Ay gina Dius nafasure sa angku takatanya, kwa nananginto sas nusnga sinu.

¹⁷ Ay kwa nasas Erusalem laman namakamatoan sat naguna angku ansik ngay nasugu, nu bunway nalo au sas talun Arabya. Ay sanya ginan, anfoli au sas furuan Damasku.

¹⁸ Ay nu nlangfe tuluk banwa, nalo au sas Erusalem laman nansibo Pedru, ay labi limak menit nu sanya au gfaudgufudan anya.

¹⁹ Ay kwe nalag sanya tibak nasugu, ku nalag Santiagu way lang, tam Fun at faduksay.

²⁰ Ku rirukan sa ayu matuyan. Dius saful wa te, kwa kamuagan.

²¹ Ay sanya ginan nalo au sas Sirya ay sas Silisya.

²² Ay ginanya, sis talun Udea fag ngay tagafanud sa tam Fun Isus ya natoglag angku.

²³ Kafag ngay taw nadungug te, ebi tagfauri anya fagayu, katsi kamoyung wan sabaliwas fagafanudun, ebi ataw dewa gugatan namamin.

²⁴ Nu katanya, kanya fagayu maksvn nu gseg Dius aroro sat kinfasludan sa angku.