Filipus 1 - Fanawbuid tagsibaliwas Fakayabian

¹ Ami fagdua, Pablu ay Timuteu, tam Fun Isus at ngay fagsuguan. Griruk ami sa ayu Dius at nafili fag ngay taw siginan nu nsadi am sa tam Fun Isus, sanya sfuruan Filipus, anggan sa ay ngay fagtainan ay sa ay ngay tagtanud:

² Sumawa nangus fia ayu Dius tam Mama ay tam Fun Isus at fagmagalangun ay at fagmanabayanun.

Pablu at Darangin sa sangay Tagafanud sis Filipus

³ Guseganan au sa ku Dius galay au namatang ayu.

⁴ Galay au gdarangin ayu, guseganan au

⁵ aroro siginan nu bagu am gafanud dasug katsi, ggubuk tuam kamoyung at Masine fag Barita.

⁶ Natuyan au te, Dius at nafasigad sa ayu fag fakamulun at masine, kanya ban gfataglayun yakmay tam Fun Isus anfoli.

⁷ At masine nu gamatangan ktua gugat takatanya sabaliwa ayu fagayu aroro matuyan te, kesug au ayu. Am ku faudgufudan gbul Dius at fagmagalangun, dewa gina au maubungan ay dewa gina au kamoyung at Masine fag Barita at kamatuyanan, ay gina au gfaksvn ngay taw at fagafanudun.

⁸ Dius nasaful wa te, kesug au ayu fagayu kata tam Fun Isus nu kesug ayu.

⁹ Gdarangin au sas Dius laman kaksvn nu kedkesugan am, ay kae fagsafulun ay fagmamatanganun,

¹⁰ laman saful tuam gfili fagayu at masine. Nu katanya tua ay amatanganan, diam e malong ay diam e fagmauriun gina ban tam Fun Isus andasug fag menit,

¹¹ ay anggan si tua ayu tam Fun Isus at fon at masine fag ugali, laman gfae fagmasineun ay gfauseganan Dius.

Matuyan fag Leleg Tagfaning Isus

¹² Ku ngay faduksay, kaylat au nu sumaful am te, at kindasug sa angku fag ngay maidap gbia at fanggubukun nu gfarapyag at Masine fag Barita.

¹³ Aroro fagayu tagulit ay tiba yak taw sis fun at bale daul nasaful te, ku faginkubungun galo au fia tam Fun Isus.

¹⁴ Siginan yangay nu maubungan au, ngayu tam faduksay at kinkaksvn at fagafanudun sas Dius, ay maseganama yangay nu kamoyung Dius at longan.

¹⁵ At matuyan tibak taw nu kamoyung sabaliwa tam Fun Isus galabian way ku fakamulun ay kaylat gfawayan. Ay dewa katanya tibak taw nu kamoyung, at algan matuyan tua.

¹⁶ Kafag ngay taw at matuyan at amatanganan kamoyung sabaliwa tam Fun Isus aroro kesug angku, ay kanya fagayu nasaful te, ku fagmaubunganun aroro nafoyung au at Masine fag Barita at kamatuyanan.

¹⁷ Ay tibak taw nu kamoyung bunwa siginan at matuyan fag amatanganan nu bunway siginan at mauri way fag algan. At fakaylatun gfaugat ku fagidapun kaduge au maubungan.

¹⁸ Dewa katanya, kwa gasalagan anya fagayu. Abat ngate, guseganan kway aroro e kamoyung tua sabaliwa tam Fun Isus, kanya fagayu at algan dewa matuyan ay mauri. Ay guseganan au gugat,

¹⁹ aroro nasaful au te, siginan ay darangin ay siginan tam Fun Isus at Falad at gubuk, umkalfas au ste ginans fagubungan.

²⁰ Ay ku fakaylatun ay ku fagsegun kdi ban nangus umkapla nusnga setaw at kumdasug sa angku, abat ngate, gfaksvn au ku amatanganan, laman dewa au gleleg yay ay dewa au nbul wan, gfauseganan ktua gugat tam Fun Isus.

²¹ Aroro dewa au gleleg yay, tam Fun Isus tagagbilug ku leleg, ay nu nbul kwan, e tungkul kwan.

²² Baliwan kaduge au gleleg mafafakamulun au at masine fag ngay fakamulun. Kwa saful katsi nu inday ku fagfiliun.

²³ Gawabilugan au te, inday tuy fagdua at masine: kabul kwan ay mannga gleleg kyay. Kaylat kwan gfalyam ku leleg katsi laman gfaday tigyangan kwan tam Fun Isus, aroro tuy wan tiba tungud at masine sa angku,

²⁴ ay dewa katanya, amasine yap tua nu gleleg kyay, laman sa ayu.

²⁵ Aroro katanya, gtuyan au te, gleleg kyay ban ay gfadgaloan ayu fagayu laman ggubuk au ayu nu gfataglayun am ay fagafanudun ay ay fagusegananun sa tam Fun.

²⁶ Ay nu ndasug kban sa ayu, kaugat nu guseganan am sa angku ay kaugat yay ban nu gfauseganan am tam Fun Isus.

²⁷ Nu katanya, ugatani nu gfaning am tam Fun Isus at Masine fag Barita. Aroro, nu katanya tua ay fakamulun, umdasug kman sanya ay duan, antuyan kwa fia te, takadungug si ayu maksvn nu masadi am ay nu ggudgubukan am gfabadbaboan laman ban tibak taw gafanud sat Masine fag Barita,

²⁸ ay diam kalimu ay ngay fawayan. Takatanya ay fakamulun gfatoglag te, ay fawayan ban umfaurianan, ay dewa katanya, Dius gfalangfe tua ban ayu.

²⁹ Dius nu gfon sa ayu at fagmabalyananun gfaning tam Fun Isus bundi lang siginan ay fagafanudun nu bunway siginan yangay ay fagagwantanun aroro sa anya.

³⁰ Katsi, ansadi am sa angku gfabadbaboan kata ay nalag ku fagidapun ebi ay ay nadungug fag fagidapun tagsi yay gugat angku dasug katsi.