Filemun 1 - Fanawbuid tagsibaliwas Fakayabian

¹ Au, Pablu, at maubungan aroro sa tam Fun Isus, ay ste yangay tam faduksay Timuteu, griruk ami sa emu, Filemun, em fakesugun ay em faudgufudan gfakamulun,

² ay sa em faduksay Apia, ay sas Arkipu, Dius at fagsuguan kata emi, ay sa sangay tagafanud takaful gugat sam bale.

³ Sumawa nangus fia ayu Dius tam Mama ay tam Fun Isus at fagmagalangun ay at fagmanabayanun.

Filemun at Fagafanudun ay at Fakesugun

⁴ Kabavn guseganan au sas Dius galay au gdarangin emu,

⁵ aroro nadungug au te, kesug tuo tam Fun Isus, ay kesug yangay o Dius at ngay taw fagayu.

⁶ Ay gdarangin au te, gina o gfoyung sam iba sabaliwa am fagafanudun, sumaful o fia fagayu at masine tam nabul siginan tam Fun Isus.

⁷ Ku faduksay, anggan au guseganan kyangay ay ansun, aroro siginan nu kesug o, nafae fagmanabayanun tuo anya fagayu.

Pablu at Fagetun sas Filemun laman sas Unesimu

⁸ Nu katanya, aroro sa tam Fun Isus, e fagmakatuun au masugu emu te, fakamuluni at matuyan.

⁹ Dewa katanya, aroro kesug au emu, gfalukmeanan au get sa emu. Au, Pablu, mafufuama kwan ay maubungan au aroro sa tam Fun Isus.

¹⁰ Get au sa emu laman sa ku sisian Unesimu ku nataban sas fagafanudun gina au maubungan ste.

¹¹ Ebi ginan, kanya we fanggubukun sa emu, dewa katanya, katsi gbia at fanggubukun sa anta.

¹² Katsi gfafoli kwan sa emu ku fakesugun ku sisian Unesimu.

¹³ Ku fakaylatun nangus gfabanwan kyay anya ste, laman tagungbus emu taggubuk angku kaduge au maubungan aroro sat Masine fag Barita.

¹⁴ Dewa katanya, kwa kaylat gfakamulun takatanya, nu dway o e suguan. Kwa kaylat nu ggubuk o angku nu gafabulunan way o, nu bunway laman am algan tua fia.

¹⁵ Malgau, at faginyayuun sirut emu laman ban kanya nu nfoli magamut tuam gugat.

¹⁶ Kanya dewa am fagsuguan, gtuyan ban o anya te, am fakesugun fia am faduksay. Maksvn nu kesug au anya, ay o gtungud yay, bunwa te, aroro kanya am fagsuguan, nu bunway am faduksay fia sa tam Fun.

¹⁷ Nu katanya, nu am fagadgalangan au fia, aylati wan anya, kata nu kaylat o angku.

¹⁸ Kanya nu e asalanan way ay e bedan sa emu, sa waban angku nu get o.

¹⁹ Au Pablu at nariruk tuy: au waban tagbayad sa emu. At matuyan, e bedan o sa angku siginan am natoglagan tam Fun Isus.

²⁰ Ku faduksay, nu katanya, glong au sa emu te, aylati ku fagetun sa emu aroro sa tam Fun. Fae fagmanabayanuni ku amatanganan aroro tagfaduksay ta sa tam Fun Isus.

²¹ Ku amatanganan mabitsug nu griruk au aroro natuyan au te, namaning ban o angku. Nasaful au te, am fagnamakamulunun ban gtungud yay ku fagetun.

²² Sadi ya ngaro ku fagetun sa emu. Falganani sim bale ku fagtaglayunan, aroro gafanud au te, umfoli kyay ban sa ayu kata ay ngay darangin.

Fakatabuan at Longan

²³ Epafras ku ufud ste at maubungan aroro sa tam Fun Isus glong emu te, O manabayan tuo?

²⁴ Ay anggan Markus, ay Aristarku, ay Demas, ay Lukas, ku ngay ufud tagfakamulun glong yangay emu te, O manabayan tuo?

²⁵ Sumawa nangus fia ayu tam Fun Isus at fagmagalangun.