Fangatulun 8 - Fanawbuid tagsibaliwas Fakayabian

Fagusegananun sas Fagsafulun

¹ Fagsafulun ay fagmamatanganun kata sik takamoyung.

² Kanya malindug sa tangabat fag afud dalan, tagsis sagbatan,

³ ay sas furuan daul at ngay sakbawan, ay sa sangay dalan. Ay kanya maksvn nu guro te,

⁴ “Am fag ngay taw sas fagdaul daga dungugani ku ngay longan.

⁵ Am at yud e fagsafulun, at masine e fagsafuluni tua. Ay am at yud mamatanganan, atogdungugi tua.

⁶ Dungugani ku ngay fagnanlongun sa ayu, aroro katanya tua at matuyan ay at ke fanambagun.

⁷ Fagayu ku nalong mafanud tua, ay fagayu taglong at mauri maksvn nu kauri au.

⁸ Fagayu ku nalong matuyan, kdi kamuag ay kdi gfandaya.

⁹ Ku ngay nalong mayamag ay mafanud sa sik taw tagsaful gtogdungug.

¹⁰ Fae tungkuli tua si emu fagsafulun, ay nu gfasine au ay ugali, aroro kanya at kamafanudan gtungud yay sanbung salapi ay gintu.

¹¹ Aroro fagsafulun amafanud yap tua sik dalag at masine, ay amafanud yap tua sas nusnga setaw am fakaylatun.

¹² Au wan fagsafulun, saful au kayamag nu setain at kasakan, ay at yud kasakan. Ay gsaful kyangay gamatangan nu setain at matuyan.

¹³ Sik taw tagsuyu Yawi, di gfakamulun sas fagmauriun. Ay kauri au takamabo ay takamatungudun, ay takamuag ay fagayu tagugali at mauri.

¹⁴ Sik tagsaful au gfangatulun, ay ku fagsafulun matuyan tua, mamatanganan ktua ay mabalyanan.

¹⁵ Siginan angku, ngay fun mafangguna tua, ay ngay tagfangguna saful tua kawat at kasakan fag ngay faugali.

¹⁶ Siginan angku fagayu tagfangguna gfunan tua masine. Kanya fagayu at matuyan fag ngay tagfangguna.

¹⁷ Kesug au fagayu takesug angku, ay fagayu tagrvbvy angku lumag angku.

¹⁸ Makatu au gfon ramraman, famauseganan, fagekwaun ay famabo.

¹⁹ Ku fagmakatuun gfon gtungud yay gintu ay sanbung salapi.

²⁰ Glao au sat matuyan ay sat mafanud fag dalan.

²¹ Gfon au fagmaramramanun sas fagayu taw takesug angku, ay gfapnu au at ngay fagfungsuan ramraman.

²² Ebi Yawi gina kawat fagayu nusnge wain, nawat wa angku.

^23-26 Siginan yay ebi, kanya nawat wa angku. Sanya kwan gina yud e fagdaul daga, ay e dagat, ay e ngay bulbug, ay e ngay buksul, ay e ngay fungsu, ay e ngay gamasun, ay anggan ngay lukbu.

²⁷ Ay gina kawat banwa, sanya kwan, anggan gina kawat banwa ay daga at fatuan.

²⁸ Sanya kyangay gina gfae ngay linyabu, ay gina gfae mamam ngay bulbug,

²⁹ ay gina gfae tigyangan dagat laman mamam di glangfe, ay gina kawat fagdaul daga at fagtungkudan.

³⁰ Ay kata au sik tagsaful kawat nusnge wain, ay si kway gugat Yawi at day tigyangan. Ay gfauseganan au gugat anya, ay kabavn mabayan au sit day tigyangan.

³¹ Guseganan au at nawat fagdaul daga, ay tagbanwan sanya fag ngay taw.

³² Nu katanya, ku ngay sisian, dungugani fia angku, mauseganan tua nusnga sinu tagfaning ku ngay foyungan.

³³ Dungugani fagayu ku ngay foyungan ayu, laman umke fagsafulun am, ay kabavn lag kalyam.

³⁴ Masine sik taw at amatanganan nu sa tua gugat angku, laman gdungugan angku.

³⁵ Aroro nusnga sinu fag taw at natoglag angku, masine ay ngaduge tua nu gleleg, ay Yawi gfauseganan anya.

³⁶ Dewa katanya, nusnga sinu fag taw at yud nafaning ku ngay foyungan, gfaurianan way at sadili. Ay fagayu takauri angku, grvbvy way fakabulun.”