Fangatulun 6 - Fanawbuid tagsibaliwas FakayabianFamamut Famararang 1 Ku sisian, nu nafatuyanan way o te, o waban tagbayad am iba at bedan, fakatai fia am longan, 2 ay nu dway o mafafasludan am fatuyanan, 3 katatuy am fakamulun, laman umsine am fatuyanan sam iba, nangakbang o sa anya, ay namawakalong o sa anya te, kwa nakatu gbayad. 4 Lag o gfaragang nu namafainfanyuan sa anya, 5 yakmay o yud kataip ya sanya fag bedan, kata sik manuk tungud at nalfas ay sik arasyo at nalagyu siginan at ngay nanggamat anya. 6 O at momuy, damai dabdab, ay asafuli at fagmamatanganun, laman anggan o saful yangay o. 7 Dewa yud e gfangguna, ay yud e gsugu anya fagayu, 8 Saful tua gfaful at fakonun gina mangune, ay gina fanggutluan, laman ban e fakonun tua sis abagat. 9 Ay o at momuy, gtiug way o gugat, Ginain ya ban nung o kafulo? 10 Nu gtiug way o lang sirut ay nu gfiangalay way o lang sirut, 11 takadasug sa emu fagidapun, ay wa kae sawad ya si emu am ramraman, kata nu e nafangkamul. 12 At yud e tungkul ay at mauri fag taw at ngay nalong, fakamuagun way lang. 13 Ay kanya gligbat ayu sirut, ay gyafe at ngay daluap, ay gfatungtung ayu sirut at darafa, laman gfaylatan at ngay iba. 14 Ay kanya matungud at fakamuaganun, ay kabavn at namatangan namakamulun at mauri, ay kanya gfasigad ngay awayan. 15 Nu katanya, masakit faurianan nu kadasug sa anya, ay we mananggubuk ya anya. 16 Yawi at fakauriun fituk ugali: 17 takamatungudun, ay takamuag, ay takamabul, 18 ay at ke algan mauri, ay at masakit gfakamulun at mauri, 19 ay takamuag nu gfatuyan, ay tagfae fagawayanun at iba. 20 Ku sisian, faningi tua am ngay fagtainan at foyungan ay at suguan emu. 21 Fabanwani gugat sim amatanganan laman di kalyam si emu. 22 Kanya wan tagfoyung ay tagdiri ay tagfamatang emu kaduge o gbanwan, dewa nusnga setaw am fakamulun. 23 Aroro am ngay fagtainan at ngay foyungan ay at ngay suguan kata sik salung gyamag sam dalan, ay at ngay famararang gfoyung emu sat matuyan fag ugali, laman sam fagmasineun ay nu nafafaning tua ban o, ngaduge tua ban nu gleleg o. 24 Ay gfayayu yangay emu siginan at mauri fag mangena at famaylatanun fag longan. 25 Lag o gafaylatan at kasinean, ay lag o gatabanan sat ngay famaylatanun. 26 Sik mangama at nafanugtug sat mauri fag mangena at kamafanudan kata way lang sik famul sadik tinapay, ay at nafanugtug sat ibama at bubay, at famayad at leleg wan. 27 Nu nafoli way o sik afuy sam tungud balangbang, matuyan, kairug waro fia am lanbung. 28 Ay nu nasiad way o sik singsing afuy, kasugba ro wo am darafa. 29 Nu katanya, nu natugtug way o am iba at bubay, nangidapan ban o. 30 Sik taw takalunus nu nafangkamul way, lag yap gfaurianan anya. 31 Dewa katanya kanya fag taw nu nalagan way, gbayad fituk kayu at nafangkamul, at ngay ramraman ro dewa namin wan. 32 Tagfanugtug sat ibama at bubay, we fagsafulun, ay gfauri ya at sadili, 33 ay kanya ban gidapan, ay kabavn ban gafaplan gugat. 34 Sik mangama tagfangasulup maksvn nu gfangadotama, ay nu gfasud we afanyu ya. 35 Ay dewa o gfon ngayuk famayad, kanya wa kaylat gbul. |
Copyright © 2021 by OMF International, Philippines
OMF International